އަށް ގައުމަކުން ދިވެހިރާއްޖެއަށް ކަނޑައަޅާފައިވާ ސަފީރުން، ސަފީރުކަމުގެ ފަތްކޮޅު ރައީސް އިބްރާހިމް މުހައްމަދު ސޯލިހްއަށް އަރުވައިފި އެވެ.
ރައީސަށް މިއަދު ފަތްކޮޅު އެރުވި ސަފީރުންނަކީ، މޮންގޯލިއާ ސަރުކާރުން ރާއްޖެއަށް ކަނޑައެޅުއްވި އާ ސަފީރު ގަންބޯލްޑް ޑަމްބަވް، ފްރާންސްގެ ސަފީރު ޖޯން-ފްރަންސުއާ ޕަކްތެތް، ރަޝިޔަން ފެޑެރޭޝަނުގެ ސަފީރު ލިވަން އެސް ޖަގަރްޔަން، ސާބިއާގެ ސަފީރު ސިނިސާ ޕަވިޗް، ހެލެނިކް ރިޕަބްލިކްގެ ސަފީރު ދިމިޓްރިއޮސް އިޔޮއަންނޫ، ރިޕަބްލިކް އޮފް ސްލޮވޭނިއާގެ ސަފީރު މަތާޔާ ވޮޑެބް ގޯޝްގެ އިތުރުން ރިޕަބްލިކް އޮފް ނެމީބިއާގެ ސަފީރު ގެބްރިއެލް ޕީސިނިމްބޯ، އަދި ކެނެޑާގެ ސަފީރު އެރިކް ވޯލްޝް އެވެ.
މިކަމަށްޓަކާ މިއަދު ރައީސް އޮފީހުގައި ބޭއްވި ހާއްސަ ރަސްމިއްޔާތުގަައި ވާހަކަ ދައްކަވަމުން ރައީސް ވިދާޅުވީ، ވޭތުވެދިޔަ ހަތަރު އަހަރުގެ ތެރޭގައި މި ސަރުކާރުން ރައްޔިތުންގެ ތަރައްގީގެ އުންމީދުތައް ހަގީގަތަކަށް ހަދައިދެވިފައިވާ ކަމަށެވެ. އެކަން ހާސިލުކުރެވުނީ އެކުވެރި ގައުމުތަކުގެ އެހީތެރިކަމާއި އެއްބާރުލުން ހޯދައިގެން ކަމަށެވެ.
އަދި ރާއްޖޭގެ ހާރިޖީ ސިޔާސަތު ބިނާކޮށްފައި ވަނީ، އިންސާނީ ހައްގުތައް ކުރިއަރުވައި، ހިމާޔަތްކުރުމާއި، ޑިމޮކްރަސީ ހަރުދަނާކުރުމާއި، އަދި މޫސުމާގުޅޭ ސިޔާސަތުތައް ކުރިއެރުވުން، މި ތިން އަސާސްގެ މައްޗަށް ކަމުގައި ރައީސް ވިދާޅުވި އެވެ.
ރާއްޖެއިން ގިނަ ގައުމުތަކަކަށް އޮން އެރައިވަލް ވިސާ ދޫކުރަމުން އަންނަކަން ފާހަގަކުރައްވަމުން ރައީސް ސޯލިހު ވަނީ ރާއްޖެއިން އެހެން ގައުމުތަކަށް ދަތުރުކުރުމުގައި ލުއިފަސޭހަ ގޮތްްތައް ހަމަޖައްްސައިދިނުމަށް އެދިވަޑައިގެންފަ އެވެ.
