އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހުގެ ވަފުދެއް ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އަރިހަށް ވަޑައިގެންފި އެވެ.
ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރުކަން ވެސް ކުރައްވާ، މަޝްހޫރު ވިޔަފާރިވެރިޔާ ގާސިމްއާ މަޝްވަރާ ކުރެއްވުމަށް، އެ މަނިކުފާނުގެ ރިސޯޓު، އދ. އަތޮޅު ސަން އައިލެންޑަށް ހޮނިހިރު ދުވަހު ވަޑައިގެންނެވީ އެމްޑީޕީގެ ޕާލިމެންޓަރީ ގްރޫޕުގެ ލީޑަރު މުހައްމަދު އަސްލަމާއި ރައީސް ސޯލިހުގެ ކޮއްކޯފުޅު، އަދި ހުޅުމާލޭ ދާއިރާގެ މެމްބަރު އަލީ ނިޔާޒެވެ.
އެ ދެ ބޭފުޅުން އެނބުރި މާލެ ވަޑައިގަންނަވާނީ މާދަމާގެ ވަގުތެއްގައިކަން އަދަދު ނޫހަށް ވަނީ އެނގިފަ އެވެ.
ރައީސް ސޯލިހުގެ ވަފުދުން ގާސިމްއާއެކު ކުރެއްވި މަޝްވަރާއާ ގުޅޭ ގޮތުން ދެ ޕާޓީން އަދި ރައީސް ސޯލިހުގެ ފަރާތްޕުޅުން ވެސް ބަހެއް ނުލިބުނެވެ.
އަސްލަމް އާއި ނިޔާޒު މިރޭ ގާސިމްއާއެކު ފަރިއްކުޅެއްވަން ފެއްޓެވުމުގެ ކުރިން ނަންގަވާފައިވާ ފޮޓޯއެއް އަދަދު ނޫހަށް ލިބިފައިވެ އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެހެން ޕާޓީތަކާއެކު ކޯލިޝަން ހެދުމުގެ ބާރު އެމްޑީޕީގެ ގައުމީ މަޖިލީހުން ރައީސް ސޯލިހަށް ވަނީ ދީފަ އެވެ.
ސަން އައިލެންޑުގެ އެ ބައްދަލުވުންތަކުގެ ކަންކަން އެނގޭ ބޭފުޅަކު، ނަން ސިއްރެއްގެ ގޮތުގައި ހިފެއްޓުމަށް އެދިވަޑައިގެން އަދަދު ނޫހަށް ވިދާޅުވީ މަޝްވަރާތައް ކުރެއްވީ ރިޔާސީ އިންތިހާބުގައި ރައީސް ސޯލިހާއެކު ކޯލިޝަން ހެދުމާ ގުޅޭ ގޮތުންނެވެ. އިތުރު ތަފުސީލެއް އޭނާ ވެސް ނުދެއްވަ އެވެ.
"މިހާރު އޮންނާނީ އެ މަޝްވަރާތައް. އެ ބޭފުޅުން ވެސް ވަޑައިގެންނެވީ އެކަމަށް،" އޭނާ ވިދާޅުވި އެވެ.
ރިޔާސީ އިންތިހާބުގައި ވާދަ ކުރައްވާން ނިންމަވާފައިވާކަން މިދިޔަ އަހަރުގެ ޖޫން މަހު އިއުލާނު ކުރެއްވުމަށް ފަހު، ގާތް ބޭފުޅުންނާއެކު ރައީސް ސޯލިހު ވަޑައިގެންނެވީ ސަން އައިލެންޑަށެވެ. އެ ދަތުރުފުޅުގައި އެހެން ބޭފުޅުންގެ ހާޒިރުގައި ރިޔާސީ އިންތިހާބާ ގުޅޭ ވާހަކަތައް ދެ ލީޑަރުން ވެސް ނުދައްކަވާ ކަމަށް، ބައްދަލުވުމުގައި ބައިވެރިވެވަޑައިގެންނެވި ބޭފުޅަކު ފަހުން ވިދާޅުވި އެވެ.
ގާސިމްގެ ތާއިދު ހޯއްދެވުމަށް ރައީސް މަސައްކަތް ކުރައްވާއިރު، މި ހަފުތާގައި ޖުމްހޫރީ ޕާޓީގެ ކޮންގްރެސް އޮންނާނެ އެވެ. އެ ކޮންގްރެސްގައި ޖުމްހޫރީ ޕާޓީން ރިޔާސީ އިންތިހާބުގައި ވާދަކުރައްވާނެ ކެންޑިޑޭޓަކު ކަނޑަނާޅެ އެވެ.
