އެކައުންޓްގެ ސެކިއުރިޓީ އިތުރަށް ވަރުގަދަކުރުމަށް އެތައް ބަޔަކު ބޭނުންކުރާ ފީޗާއެއް ކަމަށްވާ ޓޫ-ފެކްޓާ އޯތެންޓިކޭޝަން އަށް ވެސް ޓްވިޓާ އިން ލާރި ނަގާނެކަން އެ ކުންފުނިން ހާމަކޮށްފި އެވެ.
ޓްވިޓާގެ އޮފިޝަލް އެކައުންޓުން ކުރި ޓްވީޓެއްގައި ވަނީ މި އަހަރުގެ މާޗް 20 ފެށިގެން ޓްވިޓާގެ ސަބްސްކްރައިބާސް ފިޔަވާ އިތުރު ފަރާތްތަކަށް ޓެކްސްޓް މެސެޖް އޯތެންޓިކޭޝަން ބޭނުން ނުކުރެވޭނަކަމަށެވެ.
އަދި, ޓޫ ފެކްޓާ އޯތެންޓިކޭޝަން ބޭނުންކުރަން ބޭނުން ނަމަ އެ ފަރާތައް ޖެހޭނީ ޓްވިޓާއަށް ސަބްސްކްރައިބް ކުރަން ކަމަށާއި ނޫނީ އެހެން އެޕެއް މެދުވެރިކޮށް އެކަން ކުރަން ކަމަށް އެ ޓުވީޓުގައިވެ އެވެ.
އެ ކުންފުނިން ކުރި ޓްވީގުގައި ހިމެނޭ ބްލޮގް ޕޯސްޓްގައި ޓްވިޓާ އިން އިތުރަށް ބުނެފައިވަނީ، އެ ކުންފުނީގެ އަމާޒަކީ ޓްވިޓާއަކީ ވީހާވެސް ރައްކާތެރި އަދި ޕްލެޓްފޯމެއް ކަން އާންމުނަށް ކަށަވަރުކޮށްދިނުން ކަމަށެވެ. އަދި ޓްވިޓާ ނަހަމަ ގޮތުގައި ބޭނުންކުރަމުން އަންނަ ފަރާތްތައް ވެސް ޓޫ ފެކްޓާ އޯތެންޓިކޭޝަން ބޭނުންކުރަމުންދާތީ، މިއީ އެފަދަ ފަރާތްތަކަށް އެޅޭ އިތުރު ހުރަހެއްކަމަށް އެ ކުންފުނިން ބުނެ އެވެ.
ޓްވިޓާ އިން ބުނެފައިވަނީ އެ ޕްލެޓްފޯމް ބޭނުންކުރުމަށް ޓޫ ފެކްޓާ އޯތެންޓިކޭޝަން ބޭނުންކުރުން މަޖުބޫރު ނޫން ކަމަށެވެ. ސަބްސްކްރައިބް ނުކުރާ ފަރާތްތަކަށް އެ ފީޗާ ޑިސްއޭބަލްކޮށްލުމަށް ނުވަތަ އެހެން ގޮތެއް ހިޔާރުކުރުމަށް ޓްވިޓާއިން ވަނީ 30 ދުވަހުގެ މުހުލަތެއް ދީފަ އެވެ.
ޓްވިގާގެ ސަބްސްކްރައިބް ފީޗާއަށް ގިނަ ބައެއްގެ ފާޑު ކިޔުން އަމާޒުވީ އިރު މިހާތަނަށް ސަބްސްކްރައިބްކޮށްފައިވަނީ 180،000 މީހުން ކަމަށާއި އެކަމަށް ލިބެމުން އަންނަ ތަރުހީބު ވަރަށް ދަށްކަމަށް މީޑިއާ ރިޕޯޓްތައް ބުނެ އެވެ.
ބިލިއަނަރު އީލޮން މަސްކް 44 ބިލިއަން ޑޮލަރަށް ޓްވިޓާ ގަތުމަށް ފަހު އެކުންފުނީގެ ހިންގުމަށް އަންނަނީ ގިނަ ބަދަލުތަކެއް ގެންނަމުންނެވެ.
އެގޮތުން، އޭނާ ވަނީ ޓްވިޓާއަކީ ހުރިހާކަމެއް ކުރެވޭ "އެވްރިތިން އެޕް" އަކަށް ހަދާނެ ކަމަށް ބުނެފަ އެވެ. އެގޮތުން، އެހެން ސޯޝަލް މީޑިއާ ޕްލެޓްފޯމްތަކުގައި މިހާރުވެސް ހިމެނޭ ފީޗާއެއް ކަމަށްވާ ވީޑިއޯ ކޯލިން ވެސް ޓްވިޓާއަށް ވަރަށް އަވަހަށް އަންނާނެ ކަމަށް މަސްކް ބުނެ އެވެ.
އޭގެ އިތުރުން ޓްވިޓާ މެދުވެރިކޮށް ފައިސާގެ މުއާމަލާތްތައް ކުރެވޭނެ ނިޒާމެއް ވެސް ގާއިމު ކުރާނެ ކަމަށް އޭނާ ބުނެފައިވެ އެވެ. އަދި އެކަން ކުރުމަށް ބޭނުންވާ ހުރިހާ ރަސްމީ ކަންކަމެއް މިދިޔަ އަހަރުގެ އޮކްޓޫބަރު މަހުން ފެށިގެން އަންނަނީ ކުރަމުންނެވެ.
