ހަމަލާއެއް ދީފި ނަމަ ރަޝިއާއާ ގުޅިގެން ޔޫކްރޭނާ ދެކޮޅަށް ހަނގުރާމައަށް ނުކުންނާނެ ކަމުގެ އިންޒާރު ބެލަރޫސްގެ ރައީސް، އެލެކްސެންޑާ ލުކަޝެންކޯ ދެއްވައިފި އެވެ.
ލުކެޝެންކޯއަކީ ޔުކްރޭނާއި ރަޝިއާއާ ދެމެދު ހިނގަމުންދާ ހަނގުރާމައިގައި ރަޝިއާއަށް ތާއީދު ކުރައްވާ ލީޑަރެކެވެ. އޭނާ ވަނީ މީގެ ކުރިން ޔުކްރޭނަށް ހަމަލާދިނުމަށް ބެލަރޫސްގެ ބައެއް ސަރަހައްދުތައް ބޭނުން ކުރުމުގެ ހުއްދަ ވެސް ރަޝިއާ ސިފައިންނަށް ދީފަ އެވެ.
އެ ހަނގުރާމަ ފެށުނީއްސުރެ ރަޝިއާއިން ވެސް އަދި އެ ގައުމަށް ތާއީދު ކުރާ ގައުމަކުން ވެސް ހުޅަނގުގެ މީޑިއާތަކާ ބައްދަލުކޮށް ސުވާލު ކުރުމުގެ ފުރުސަތު ހުޅުވާލައިފައެއް ނުވެ އެވެ.
ނަމަވެސް ބެލަރޫސްގެ ވެރިކަން ކުރާ ރަށް، މިންސްކުގައި ބޭއްވި ނޫސްވެރިންގެ ބައްދަލުވުމެއްގައި މީޑިއާތަކުން ވަނީ އެކި ސުވާލުތައް އެމަނިކުފާނާ އަމާޒުކޮށްފަ އެވެ.
ހަނގުރާމައިގެ ތައްޔާރީތަކަށް މިދިޔަ އަހަރު ބެލަރޫސްގެ ސަރަހައްދު ބޭނުން ކުރުމަށް ރަޝިއާ ސިފައިންނަށް ހުއްދަ ދިން ގޮތަށް ކުރިއަށް އޮތް ތަނުގައި ވެސް ހުއްދަ ދީފާނަންތޯ ނޫސްވެރިޔަކުކުރި ސުވާލުގެ ޖަވާބުގައި އޭނާ ވިދާޅުވީ އެ ފުރުސަތު ރަޝިއާ ސިފައިންނަށް ދިނުމަށް މިހާރު ވެސް ތައްޔާރަށް ހުންނެވި ކަމަށެވެ.
"އާނ، އަހަރެން ތައްޔާރަށް މިހުރީ މިތަނުގައި ހަރަކާތްތެރިވުމުގެ ފުރުސަތު އެމީހުންނަށް ދޭން، އަހަރުމެންގެ ސަރަހައްދަށް ޔުކްރޭނު ސިފައިންގެ އެންމެ މީހަކު ވަނަސް ހަނގުރާމައިގައި ރަޝީއާއާ ބައިވެރިވާން ވެސް ތައްޔާރަށް އަހަރުމެން މިތިބީ،" ލުކެޝެންކޯ ވިދާޅުވި އެވެ.
ރަޝިއާ އާއި ބެލަރޫސްއާ ދެމެދު އަސްކަރީ ގުޅުންތައް ވަނީ މިފަކަށް އައިސް ވަރަށް ވަރުގަދަ ކޮށްފަ އެވެ. އެގޮތުން ދެ ގައުމުގެ އަސްކަރިއްޔާ ގުޅިގެން ތަފާތު ޑްރިލްތައް ކުރިއަށް ގެންދިއުން ވަނީ އިތުރު ކޮށްފަ އެވެ. އެހެން ނަމަވެސް މިއަދާ ހަމައަށް ވެސް ޔުކްރޭނު ހަނގުރާމައިގެ ތެރެއަށް އެ ގައުމުން ވަދެފައެއް ނުވެ އެވެ.
ލުކެޝެންކޯއަކީ ބެލަރޫސްގެ ރައީސް ކަމަަކަށް އިނގިރޭސިވިލާތާއި، ވިލާތުގެ އިއްތިހާދުގެ އިތުރުން އެމެރިކާއިން ވެސް ބަލައެއް ނުގަނެ އެވެ. ސަބަބެއް ކަމަށް ހުޅަނގުން ދައްކަނީ 2020، ގައި ބެލަރޫސްގެ ރައްޔިތުން މަގުމައްޗަށް ނުކުމެ ކުުރި މުޒާހަރާ އެވެ.
ލުކެޝެންކޯގެ މައްޗަށް ކޮރަޕްޝަންގެ ތުހުމަތުކޮށް ކުރި އެ މުޒާހަރާ ރޫޅާލީ ވަރަށް ހުދުމުހުތާރުކަމާ އެކު އަނިޔާވެރިކޮށް ކަމަށް ހުޅަނގުން ސިފަކުރެ އެވެ.
ޔުކްރޭނުގައި ހިނގަމުންދާ ހަނގުރާމައިގެ ޒިންމާ ނަގަންޖެހޭ ފަރާތަކީ ހުޅަނގު ކަމަށް ލުކެޝެންކޯ ވަނީ ވިދާޅުވެފަ އެވެ.
