ބާސެލޯނާ (ފެބްރުއަރީ 17) - ޔުއެފާ ޔޫރޮޕާ ލީގުގެ ނޮކައުޓް ޕްލޭއޮފް ބުރުގެ ފުރަތަމަ ލެގުގައި ރޭ ބާސެލޯނާ އިން އަމިއްލަ ދަނޑުގައި މެންޗެސްޓާ ޔުނައިޓެޑާ 2-2 އިން އެއްވަރުވެއްޖެ އެވެ.
އަންނަ ބުރާސްފަތި ދުވަހުގެރޭ ޔުނައިޓެޑް ދަނޑުގައި ބާސެލޯނާއާ ދެކޮޅަށް ކުޅޭ މެޗުން ކޮންމެ ޓީމެއް މޮޅުވި ނަމަވެސް އަނެއް ބުރުގެ ފުރުސަތު ލިބޭނެ އެވެ.
ރޭގެ މެޗަކީ ޔޫރަޕްގެ ދެ ވަނަ ފަންތީގެ ކްލަބް ފުޓްބޯޅަ މުބާރާތް، ޔޫރޮޕާ ލީގުގައި ޔުނައިޓެޑާއި ބާސެލޯނާގެ ފުރަތަމަ ކުރިމަތިލުމެެވެ. މީގެ ކުރިން މި ދެ ޓީމު ވަނީ ޗެމްޕިއަންސް ލީގުގައި ގިނަ ފަހަރުތަކެއް މަތިން ބައްދަލުކޮށްފަ އެވެ.
ބާސެލޯނާގެ ނޯ ކޭމްޕްގައި ރޭ ކުޅުނު މެޗުގެ ހުރިހާ ގޯލެއް ފެނިގެންދިޔައީ ދެ ވަނަ ހާފުގަ އެވެ. މެޗުގެ 50 ވަނަ މިނިޓްގައި ރަފީނިއާ ނެގި ކޯނަރަކުން ބާސެލޯނާ އަށް ލީޑުނަގައިދިނީ މާކޯސް އަލޮންސޯ ބޮލުން ގޯލަށް ބޯޅަ ފޮނުވާލައިގެންނެވެ. ބާސެލޯނާ އަށް ލީޑުހިފަހައްޓައިލެވުނީ ދެ މިނިޓެވެ. ޔުނައިޓެޑްގެ ފްރެޑް ދިން ބޯޅައަކަށް އޭރިއާތެރެއަށް ވަދެ، މާކަސް ރެޝްފޯޑް ހަނި އޭންގަލުން ވަނީ ގޯލުގެ ތެރެއަށް ބޯޅަ ވައްދާލައިފަ އެވެ.
މެޗުގެ 59 ވަނަ މިނިޓްގައި ޔުނައިޓެޑުން ވަނީ ލީޑުނަގައިފަ އެވެ. މިއީ ރަޝްފޯޑް ތިރިތިރިން ނެގި ހުރަހެއް ބާސެލޯނާގެ ޑިފެންސް ތެރެއިން ގޮސް، އެ ޓީމުގެ ޖޫލްސް ކޫންޑޭ ފައިގައި ޖެހިފައި ބައިކޮޅަށް ވަން ގޯލެކެވެ. ބާސެލޯނާ އިން އެއްވަރުކުރީ މެޗުގެ 76 ވަނަ މިނިޓްގައި ރަފީނިއާ ޖެހި ގޯލުންނެވެ. އޭރިއާތެރެއަށް ރަފީނިއާ ހުރަސްކުރި ބޯޅަ އެއްވެސް ކުޅުންތެރިއަކު ގައިގައި ނުޖެހި އަމާޒުވީ ގޯލުގެ ކަނަށެވެ.
ބާސެލޯނާ މޮޅުކޮށްދޭން އަންސޫ ފާޓީ ޖެހި ބޯޅައެއް ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ.
މެޗަށް ފަހު ޔުނައިޓެޑްގެ ކޯޗު އެރިކް ޓެން ހާގް ބުނީ ހަގީގަތުގައި ފެނިގެންދިޔައީ ޗެމްޕިއަންސް ލީގު ލެވަލްގެ ފޯރިގަދަ މެޗެއް ކަމަށާއި ދެ ޓީމުގެ ފަރާތުން ފެނުނު އެޓޭކިން ފުޓްބޯޅަ ރަނގަޅު ކަމަށެވެ. ބާސެލޯނާގެ ކޯޗު ޒަވީ ހެނާންޑޭޒް ވަނީ ޔުނައިޓެޑްގެ އޭރިއާތެރެއިން އެ ޓީމުގެ ފްރެޑް އަތުގައި ބޯޅަ ޖެހުމުން ޕެނަލްޓީ ނުދިން މައްސަލައިގައި ނުރުހުން ފާޅުކޮށްފަ އެވެ.
ޔޫރޮޕާ ލީގުގެ ޕްލޭއޮފްގައި ރޭ ކުުޅުނު އެހެން ފާހަގަކޮށްލެވޭ މެޗުތަކުގެ ނަތީޖާ އަށް ބަލާއިރު، ޔުވެންޓަސް ވަނީ އަމިއްލަ ދަނޑުގައި ފްރާންސްގެ ނޯންޓްސްއާ 1-1 އިން އެއްވަރުވެފަ އެވެ. ހޯސޭ މޮރީނިއޯ ކޯޗުކޮށްދޭ އޭއެސް ރޯމާ ވަނީ ރަށުންބޭރުގައި އޮސްޓްރިއާގެ ރެޑްބުލް ސަލްޒްބާގް އަތުން 1-0 އިން ބަލިވެފަ އެވެ. ސެވިއްޔާ އިން 3-0 އިން ޕީއެސްވީ އައިންދޯވަން ބަލިކުރިއިރު، އަޔަކްސް އާއި ޔޫނިއަން ބާލިން ވަނީ 0-0 އިން އެއްވަރުވެފަ އެވެ. އަދި ބަޔާ ލެވަކޫސަން ދަނޑުގައި މޮނާކޯ މޮޅުވީ 3-2 އިންނެވެ.
