ބާސެލޯނާ (ފެބްރުއަރީ 17) - އާޖެންޓީނާގެ ކެޕްޓަން ލިއޮނަލް މެސީ މި ސީޒަނަށް ފަހު އެނބުރި ބާސެލޯނާ އަށް ގޮސްދާނެ ކަމަށް ދެކެވޭ ވާހަކަތައް މެސީގެ ބައްޕަ ދޮގުކޮށްފި އެވެ.
ޔޫތު ކެރިއަރުން ފެށިގެން ސީނިއާ ކެރިއަރުގެ 17 އަހަރު ބާސެލޯނާގައި ހޭދަކުރުމަށް ފަހު މެސީ ފްރާންސްގެ ޗެމްޕިއަން ޕީއެސްޖީއަށް ބަދަލުވީ 2021ގަ އެވެ. އޭގެ ފަހުން ޕީއެސްޖީގައި ދެ ވަނަ ސީޒަން ކުޅެމުން އަންނަ, މެސީ އެ ކުލަބާ އެކު ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާނެ އެވެ.
މެސީގެ ކޮންޓްރެކްޓް އާ ކުރުމުގެ މަޝްވަރާތައް ޕީއެސްޖީން ކުރަމުން އަންނައިރު އޭނާ ހޯދުމަށް ކުރީގެ ކުލަބު ބާސެލޯނާ އިން މަސައްކަތް ކުރަމުން އަންނަ ކަމަށް މީޑިއާތަކުން ރިޕޯޓްކުރެ އެވެ. ސްޕެއިންގެ މީޑިއާތަކުން ބުނާ ގޮތުން ބާސެލޯނާގެ ރައީސް ޔޮއާން ލަޕޯޓާ ވަނީ މެސީ އެ ކުލަބަށް ގެނައުމަށް މަސައްކަތްތައް ފަށައިފަ އެވެ.
މި ވާހަކަތަކަށް ރައްދުދެމުން މެސީގެ ބައްޕަ ޖޯޖް މެސީ ބުނީ އޭނާގެ ދަރިފުޅު އެނބުރި ބާސެލޯނާ އިން ފެނުން ދުރު ކަމަށާއި، ކުލަބު ރައީސް އެ ކަމާ ގުޅޭގޮތުން މެސީ އަށް ގުޅާފައިވެސް ނުވާ ކަމަށެވެ.
"އަހަންނަށް ހިއެއް ނުވޭ މެސީ ބާސެލޯނާ އަށް ދެން ކުޅޭނެ ހެނެއް. ކުލަބުގެ ހުށެހެޅުމެއް ނުލިބޭ، ރައީސް ލަޕޯޓާއާ އެކު ވާހަކަދެކެވިފައެއް ވެސް ނެތް" މެސީގެ އޭޖެންޓްގެ ގޮތުގައިވެސް ގިނަ ދުވަސްތަކެއް ވަންދެން މަސައްކަތްކުރި އޭނާގެ ބައްޕަ ބުންޏެވެ.
މެސީ ބާސެލޯނާގައި ކެރިއަރު ނިންމާލުމަކީ މިހާރުގެ ރައީސް ލަޕޯޓާގެ އިންތިހާބީ ވައުދެކެވެ. ލަޕޯޓާ، ބާސެލޯނާ ރައީސްގެ މަގާމުގައި ހުންނަވަނިކޮށް މެސީ އެ ކްލަބް ދޫކޮށްލަން ޖެހުމުން، ވަރަށް ބޮޑަށް މާޔޫސްވި ކަމަށް ވަނީ އެކި ފަހަރު މަތިން ވިދާޅުވެފަ އެވެ.
މެސީ ޕީއެސްޖީއާ އެކު ހަދާފައިވާ ކޮންޓްރެކްޓް އާކުރަން އެ ކުލަބުން ބޭނުންވެ އެވެ. މިދިޔަ އަހަރުގެ ޑިސެމްބަރު މަހު ނިމުނު ވޯލްޑް ކަޕަަށް ފަހު އާ ކޮންޓްރެކްޓްގެ މަޝްވަރާތައް ކުރިއަށްދިޔަ ނަމަވެސް އެކަމުގައި މާ ބޮޑު ކުރިއެރުމެއް ލިބިފައިނުވާ ކަމަށް ފްރާންސްގެ ނޫސްތަކުން ބުނެ އެވެ.
މެސީ، 35، ޕީއެސްޖީއާ އެކު ހަދާފައިވާ ކޮންޓްރެކްޓް އާ ކުރުމަކީ އެކުލަބަށް އެންމެ ރަނގަޅު ނިންމުމަށް ނުވާނެ ކަމަށް އެކުލަބުގެ ކުރީގެ ބައެއް ކުޅުންތެރިން ބުނަމުން އަންނައިރު މެސީ ހޯދުމަށް އެމެރިކާ ލީގުގެ އިންޓަ މިއާމީން އަންނަނީ މަސައްކަތް ކުރަމުންނެވެ. އިންގްލެންޑްގެ ފުޓްބޯޅަ ލެޖެންޑު ޑޭވިޑް ބެކަމްގެ ހިއްސާ އޮންނަ އިންޓަ މަޔާމީން މެސީއަށް ދޭން ހުށަހަޅާ މުސާރަ އަކީ ވެސް ޕީއެސްޖީއިން ދޭ މުސާރަ އަށް ވުރެ ބޮޑު އަދަދެއް ކަމަށް ބެލެވެ އެވެ.
ވޯލްޑް ކަޕްގެ ކުރިން ޕީއެސްޖީގައި ރަނގަޅު ކުޅުމެއް ދެއްކި މެސީ އަށް ވޯލްޑް ކަޕަށް ފަހު އެކަށީގެންވާ ކުޅުމެއް އަދި ނުދެއްކެ އެވެ. އެންމެ ފަހުން، ޔުއެފާ ޗެމްޕިއަންސް ލީގުގެ ދެ ވަނަ ބުރުގައި ޖަރުމަންގެ ބަޔާން މިއުނިކް އަތުން ވެސް ޕީއެސްޖީ ވަނީ ބަލިވެފަ އެވެ.
