ލަންޑަން (ފެބްރުއަރީ 15) - 2018 ގައި ތައިލެންޑުގެ ހޮހޮޅައިން ސަލާމަތްކުރި ފުޓްބޯޅަ ޓީމުގެ 12 ކުދިންގެ ތެރެއިން ކުއްޖަކު މަރުވެއްޖެ އެވެ.
ޑުއަންފޭ ޕްރޮމްތޭ، 17، ގެ މަރާ ގުޅިގެން ތައިލޭންޑުގެ ސަރުކާރުން ސޯޝަލް މީޑިއާގައި ހިއްސާކޮށްފައިވާ ޕޯސްޓެއްގައި ބުނެފައިވަނީ އޭނާ މަރުވީ އެކްސިޑެންޓެއްގައި ލިބުނު އަނިޔާގެ ސަބަބުން ކަމަށެވެ. ނަމަވެސް އިތުރު ތަފުސީލެއް ދީފައެއް ނުވެ އެވެ. އިނގިރޭސި މީޑިއާތަކުން ރިޕޯޓުކުރާ ގޮތުގައި އޭނާ މަރުވީ ލެޗެޝާ ހޮސްޕިޓަލުގައި ފަރުވާ ދެމުން ދަނިކޮށެވެ.
ޕްރޮމްތޭ އިނގިރޭސިވިލާތުގައި މިހާރު ދިރިއުޅެނީ އެ ގައުމުގެ ފުޓްބޯޅަ އެކަޑަމީއަކުން ލިބުނު ޖާގައެއްގެ ބޭނުން ހިފުމަށެވެ. އޭނާއަށް އެ ފުރުސަތު ހޯދަދިން ތައިލޭންޑުގެ ޖަމްއިއްޔާއެއް ކަމަށްވާ 'ޒިކޯ ފައުންޑޭޝަން' އިން ވަނީ ޕްރޮމްތޭގެ އާއިލާއަށް ތައުޒިޔާ ކިޔާފަ އެވެ.
2018 ގައި ޕްރޮމްތޭ އަދި އޭނާގެ ޓީމުގެ އަނެއް 11 ކުދިން ދެ ހަފުތާއަށް ތައިލެންޑުގެ ހޮހުޅައެއްގައި ތާށިވުމުން އެ ކުދިން ސަލާމަތްކުރި ތައިލޭންޑުގެ އަދި ބައިނަލްއަގުވާމީ އެކި ގައުމުތަކުގެ އެހީއާއެކު އެވެ. ބޯ ވިއްސާރައިގެ ސަބަބުން ހޮހޮޅައިގައި ތާށިވި އެ 12 ކުދިން ސަލާމަތް ކުރުން އޭރު ވެގެންދިޔައީ ދުނިޔޭގެ ފެންވަރުގައި ފާހަގަކޮށްލެވުނު ކާމިޔާބީއަކަށެވެ.
