ބާސެލޯނާ (ފެބްރުއަރީ 16) - މެންޗެސްޓާ ޔުނައިޓެޑާއި ބާސެލޯނާ އަކީ ވެސް ޗެމްޕިއަންސް ލީގުގައި ވާދަކުރަން ބޭނުންވާ ދެ ކްލަބު ކަމަށާއި ދެ ކްލަބު ވެސް މި ވަގުތު އޮތީ ރަނގަޅު މިސްރާބުގައި ކަމަށް ޔުނައިޓަޑްގެ ކޯޗު އެރިކް ޓެން ހާގް ބުނެފި އެވެ.
ޔޫރޮޕާ ލީގުގެ ނޮކައުޓްގެ ޕްލޭ އޮފް ބުރުގައި މިރޭ ބާސެލޯނާގެ ދަނޑުގައި މި ދެ ޓީމު ކުރިމަތިލާނެ އެވެ. މިއީ 30 އަހަރުގެ ތެރޭގައި ޗެމްޕިއަންސް ލީގުގެ ބޭރުން މި ދެ ޓީމު ކުރިމަތިލާނެ ފުރަތަމަ ފަހަރެވެ.
ޗެމްޕިއަންސް ލީގުގައި މި ދެ ކްލަބު އެންމެ ކުރިމަތިލީ 2019 ވަނަ އަހަރުގެ މުބާރާތުގެ ކުއާޓާ ފައިނަލްގަ އެވެ. އޭގެ ކުރިން ބާސެލޯނާ އިން ވަނީ 2009 ވަނަ އަހަރާއި 2011 އަހަރުގެ ޗެމްޕިއަންސް ލީގުގެ ފައިނަލްގައި ޔުނައިޓެޑް ބަލިކޮށްފަ އެވެ.
ބާސެލޯނާ އިން ޔޫރަޕްގެ ތައްޓެއް އެންމެ ފަހުން ހޯދީ 2015 ވަނަ އަހަރެވެ. ޔުނައިޓެޑަށް އެންމެ ފަހުން ލިބުނު ޔޫރަޕްގެ ތައްޓާކީ 2017 ވަނަ އަހަރުގެ ޔޫރޮޕާ ލީގެވެ.
މެޗުގެ ކުރިން މީޑިއާއާ ވާހަކަދަައްކަަމުން ޔުނައިޓަޑްގެ ކޯޗު ޓެން ހާގް ބުނީ ދެ ކްލަބު ވެސް އޮތީ ރަނގަޅު މިސްރާބެއްގައިި ކަމަށެވެ. އަދި ދެ ޓީމުގެ ވެސް އަމާޒަކީ ޗެމްޕިއަންސް ލީގުގައި ވާދަކުރުން ކަމަށް ޓެން ހާގް ފާހަގަކުރި އެވެ.
"ދެ ޓީމުގެ ވެސް އަމާޒަކީ ޗެމްޕިއަންސް ލީގު. އެކަމަކު، މި ވަގުތު މި އޮތީ ޔޫރޮޕާ ލީގުގައި. ދެ ކްލަބު ވެސް ޖެހޭނީ ރީސެޓްކުރަން. އެކަމަކު މިހާރު މި އޮތީ ރަނގަޅު މިސްރާބުގައި،" ޓެން ހާގް ބުންޏެވެ.
ބާސެލޯނާގެ ކޯޗު ޒަވީ ހެނާންޑޭޒަށް ތައުރީފްކުރަމުން ޓެން ހާގް ބުނީ މިހާރު ބާސެލޯނާގެ ފަރާތުން ފެންނަނީ ނެދަލޭންޑްސްގެ ލެޖެންޑް ޔޯހަން ކްރައިފްގެ ވިސްނުމުގައި ބައްޓަންކުރި ކުޅުމުގެ ސްޓައިލް ކަމަށެވެ.
"ބާސެލޯނާއާ ދެކޮޅަށް ކުޅުމަކީ ވަރަށް ރަނގަޅު ކަމެއް. މިއީ އަހަންނަށް ވަރަށް ކަމުދާ ކްލަބެއް. މިހާރު ބާސެލޯނާގެ ފަރާތުން ފެންނަނީ ފާއިތުވި ދެ ތިން އަހަރު އެ ޓީމުގެ ފަރާތުން ނުފެންނަ ވަރުގެ ކުޅުމެއް،" ޓެން ހާގް ބުންޏެވެ.
ޔުނައިޓެޑްގެ މާކަސް ރަޝްފޯޑަކީ މި ވަގުތު މުޅި ޔޫރަޕްގެ ފުޓްބޯޅަ އަށް ބެލިޔަސް އެންމެ ނުރައްކާތެރި ފޯމެއްގައި ހުރި ކުޅުންތެރިޔާ ކަމަށާއި އޭނާ އަށް ސަމާލުވާނެ ކަމަށް ބާސެލޯނާގެ ކޯޗު ޒަވީ ހެނާންޑޭޒް ވަނީ ބުނެފަ އެވެ.
ބާސެލޯނާގެ ދަނޑުގައި މިރޭ އެ ޓީމުން ޔުނައިޓެޑާ ބައްދަލުކުރާ މެޗު ފަށާނީ މާލޭ ގަޑިން 23:45 ގަ އެވެ.
