ނިއު ދިއްލީ (ފެބްރުއަރީ 14) - އިންޑިއާގެ ބޮޑުވަޒީރު ނަރެންދުރަ މޯދީއަށް ފާޑުކިޔާ ބީބީސީގެ ޑޮކިޔުމެންޓްރީ ރިލީޒްކުރިތާ ދެތިން ހަފުތާއަށްފަހު އިންޑިއާގައި ހުންނަ ބީބީސީގެ އޮފީހަށް އެ ގައުމުގެ އިންކަމް ޓެކްސް އޮފިސަރުން ވަދެފި އެވެ.
ރިޕޯޓުތައް ބުނާ ގޮތުގައި މިއީ އިންޑިއާގެ ޓެކްސް އިދާރާތަކުން ކުރަމުންދާ ތަހުގީގަކާ ގުޅިގެން ހިންގި އޮޕަރޭޝަނެކެވެ.
މިކަމާ ގުޅިގެން ބީބީސީއިން ނެރުނު ކުރު ބަޔާނެއްގައި ބުނެފައިވަނީ އެ ފަރާތުން މި ތަހުގީގަށް ފުރިހަމައަށް އެއްބާރުލުން ދޭނެ ކަމަށެވެ. އަދި މި ތަހުގީގު ވީހާވެސް އަވަހަށް ނިމޭނެ ކަމަށް އުންމީދުކުރާ ކަމަށް ވެސް ބީބީސީއިން ވަނީ ބުނެފަ އެވެ.
ނަމަވެސް އިންޑިއާގެ އިދިކޮޅު ކޮންގްރެސް ޕާޓީއިން ވަނީ މިކަން ކުށްވެރިކޮށްފަ އެވެ. އެގޮތުން އެ ޕާޓީގެ ޖެނެރަލް ސެކްރެޓަރީ ކޭސީ ވެންގޯޕަލް ވިދާޅުވީ، މިކަމުން ދޭހެވަނީ މޯދީގެ ސަރުކާރުން ފާޑުކިޔުންތައް ދެކެ ބިރުގަންނަ މިންވަރު ކަމަށެވެ.
"ބީބީސީ ފަދަ މީޑިއާއަކަށް މޯދީގެ ސަރުކާރުން ބިރުދެއްކުމަށް މި ކުރާ މަސައްކަތް އެންމެ ހަރުކަށި އިބާރާތުން ކުށްވެރިކުރަން، ޑިމޮކްރަސީއާ ބީރައްޓެހި މި އަމަލުތައް ތަކުރާރުވުމަށް ފުރުސަތު ދީގެން ނުވާނެ," އޭނާ ވިދާޅުވި އެވެ.
ކޮންގްރެސް ޕާޓީގެ އިތުރުން އިންޑިއާގެ އެޑިޓާސް ގިލްޑު އަދި އެމްނެސްޓީ އިންޓަނޭޝަނަލްގެ އިންޑިއާ ބޯޑުން ވެސް ވަނީ މި އަމަލު ކުށްވެރިކޮށް ކަންބޮޑުވުން ފާޅުކޮށްފަ އެވެ. އެގޮތުން އެމްނެސްޓީއިން ބުނި ގޮތުގައި އިންޑިއާގެ ސަރުކާރުން ދަނީ އެ ގައުމުގެ ޓެކްސް އިދާރާތަކުގެ ނަހަމަ ބޭނުންކޮށް ފާޑުކިޔާ ފަރާތްތައް ހުއްޓުވުމަށް މަސައްކަތް ކުރަމުންނެވެ.
ފާޑުކިޔުންތަކާއެކު އިންޑިއާގެ ވެރިކަންކުރާ ޕާޓީއިން ވަނީ މޯދީގެ ސަރުކާރުގެ އަމަލުތައް ދިފާއުކޮށްފަ އެވެ. އެގޮތުން ވެރިކަންކުރާ ބީޖޭޕީގެ ތަރުޖަމާނެއް ކަމަށްވާ ގައުރަވް ބަޓިއާ ވަނީ ބީބީސީ އަކީ ދުނިޔޭގައި އޮތް އެންމެ ކޮރަޕްޓު އޮގަނައިޒޭޝަން ކަމަށް ތުހުމަތުކުރައްވާފަ އެވެ.
"އިންޑިއާއަކީ ކޮންމެ މީޑީއާއަކަށްވެސް، ކުންފުންޏަކަށްވެސް ފުރުސަތުދޭ ގައުމެއް، ނަމެވެސް ފިތުނަ އުފެއްދުމަށް ފުރުސަތެއް ނުދެވޭނެ," އޭނާ އިތުރަށް ވިދާޅުވީ މި ތަހުގީގަކީ ސަރުކާރުގެ އޯޑަރަށް ކުރާ ކަމެއް ނޫން ކަމަށާއި މި ތާރީހުގައި މިކަންވުން މިއީ އިއްތިފާގެއް ކަމަށެވެ.
ބީބީސީގެ ޑޮކިއުމެންޓަރީ އަކީ 2002 ވަނަ އަހަރު ގުޖަރާތު ސްޓޭޓުގެ ޗީފް މިނިސްޓަރަކަށް މޯދީ ހުންނެވި އިރު ހިންދޫންނާއި މުސްލިމުންނާ ދެމެދު ހިނގި ހަމަނުޖެހުމާ ގުޅޭ ޑޮކިޔުމެންޓްރީއެކެވެ. އެ ހަމަނުޖެހުމުގައި ގިނައިން މަރުވީ މުސްލިމުންނެވެ. އެ ހާދިސާގައި މޯދީ އަދާކުރެއްވި ދައުރާ ގުޅޭ ގޮތުން "އިންޑިއާ: ދަ މޯދީ ކުއެސްޝަން" ޑޮކިޔުމެންޓްރީގައި ސުވާލު އުފައްދާފައިވެ އެވެ.
އިންޑިއާގައި އެ ޑޮކިޔުމެންޓްރީ ދެއްކުން މަނާކުރުމުގެ އިތުރުން، އޭގެ އެއްވެސް ވީޑިއޯއެއް ސޯޝަލް މީޑިއާގައި ދައުރުކުރުން ވެސް ވަނީ މަނާކޮށްފަ އެވެ. ސޯޝަލް މީޑިއާގައި ވީޑިއޯ ދައުރުކުރުން މަނާކުރަން އެންގީ އިންފޮމޭޝަން ޓެކްނޮލޮޖީއާ ގުޅޭ ގަވާއިދުގެ ދަށުން ސަރުކާރަށް ލިބިދޭ އެމެޖެންސީ ބާރުގެ ބޭނުންކޮށްގެންނެވެ.
ބީބީސީއިން މިހާތަނަށް އެ ޑޮކިޔުމެންޓްރީ އިންޑިއާގައި ދައްކާފައެއް ނުވެ އެވެ. އެހެން ނަމަވެސް ބައެއް ޔޫޓިއުބް ޗެނަލްތަކަށް ވީޑިއޯ ވަނީ އަޕްލޯޑުކޮށްފަ އެވެ. ވީޑިއޯގެ ލިންކުތައް ފޯރުކޮށްދޭ 50 އަށް ވުރެ ގިނަ ޓްވީޓް ބްލޮކް ކުރަން އިންޑިއާ ސަރުކާރުން ވަނީ ޓްވިޓާއަށް އަމުރުކޮށްފަ އެވެ. އޭގެ އިތުރުން ޑޮކިޔުމެންޓްރީއާ ގުޅޭ ހުރިހާ ވީޑިއޯއެއް ބްލޮކްކުރަން ޔޫޓިއުބަށް ވެސް ވަނީ އަންގައިފަ އެވެ.
