ވިކްޓަރީ ސްޕޯޓްސް ކްލަބަކީ އޭނާގެ ކެރިއަރުގެ މުހިންމު ފައުންޑޭޝަނެއް އަޅައިދިން ކުލަބެއް ކަމަށާއި، ދުރާލާ ތައްޔާރުވެ، އެ ކުލަބުގެ މި އަހަރުގެ ޓާގެޓަށް ހާސިލްވެވޭނެ ކަމުގެ ޔަގީންކަން އެބައޮތް ކަމަށް ކޯޗު ސޮބާހު މުހައްމަދު ބުނެފި އެވެ.
މި ސީޒަންގެ ދެ ވަނަ ޑިވިޝަންގައި ކުޅޭނެ ވިކްޓަރީއާ ސޮބާ ހަވާލުވީ އެކުލަބު ފުރަތަމަ ޑިވިޝަނަށް ޕްރޮމޯޓްކޮށް އެފްއޭ އެކަޕްގެ ރަނގަޅު ހިސާބަކަށް ޓީމް ގެންގޮސްދިނުމުގެ ޓާގެޓާ އެއް ކޮށެވެ. ވިކްޓަރީން ރޭ ވަނީ އެ ކުލަބާ ގުޅުނު ފުރަތަމަ ކުޅުންތެރިން ކަމަށްވާ، ގައުމީ ޓީމުގެ ކެޕްޓަން، އަކުރަމް އަބްދުލް ގަނީ (އަކޫ) އާއި މުހައްމަދު އުމެއިރުއާ އެކު ކޮންޓްރެކްޓްގައި ސޮއިކޮށްފަ އެވެ. ދެ ކުޅުންތެރިން ވެސް ކުރިން ވަނީ ވިކްޓަރީ އަށް ކުޅެފަ އެވެ.
ސޮބާގެ ކެރިއަރުގެ އެންމެ ކާމިޔާބު އަހަރުތައް ހޭދަކުރި އެއް ޓީމަކީ ވިކްޓަރީ އެވެ.
ވިކްޓަރީގެ ކޯޗުކަމާ ހަވާލުވުމާ ގުޅޭގޮތުން ސޮބާ ބުނީ، ވިކްޓްރީ އާ ހަވާލުވުމަކީ އަބަދުވެސް ދެކެމުން އައި ހުވަފެނެއް ކަމަށެވެ. އެ ކުލަބުން އޭނާ އަށް އިތުބާރުކޮށްފައި، މި ފަދަ މަސައްކަތެއް ހަވާލުކުރުމުން އުފާކުރާ ކަމަށް ވެސް ސޮބާ ވަނީ ބުނެފަ އެވެ.
ސޮބާ ބުނީ ކެރިއަރުގެ އެންމެ މުހިންމު ފައުންޑޭޝަން އަޅައިދިން ކުލަބު ފުރަތަމަ ޑިވިޝަނަށް އަރުވައިދިނުމަކީ ޓާގެޓް ކަމަށާއި އެކަން ކުރެވޭނެ ކަމުގެ އިތުބާރު އެބައޮތް ކަމަށެވެ.
"މިފުރުސަތަށް އަޅުގަނޑު ވަރަށް އުފާކުރަން، ކުޑައިރުއްސުރެ ދެކެމުން އައި ހުވަފެނެއް މިއީ، އަޅުގަނޑުގެ ކެރިއަރުގައި ވަރަށް ބޮޑު ފައުންޑޭޝަނެއް އަޅައިދިން ކުލަބެއް ވިކްޓްރީ އަކީ. ކެރިއަރުގައި ވަރަށް ބައިވަރު ކާމިޔާބީތަކެއް ލިބުނު ކުލަބެއް ވިކްޓަރީ އަކީ. ދެން ކޯޗެއްގެ ގޮތުގައި މަސައްކަތްކޮށްލަން އެ އިތުބާރުކޮށް މެނޭޖުމަންޓުން ހަވާލުކުރުމަކީ ވަރަށް އުފާކުރާ ކުރާކަމެއް." ފުރަތަމަ ޑިވިޝަންގައި ނިއުރޭޑިއަންޓް، ވެލެންސިއާ އަދި ކުލަބު ގްރީން ސްޓްރީޓްސް އަށް ކޯޗުކޮށްދީފައިވާ ސޮބާ ބުންޏެވެ.
ސޮބާ ވަނީ މިދިޔަ އަހަރު ނިއުރޭޑިއަންޓާ ހަވާލުވެ، އެ ކުލަބު ފުރަތަމަ ޑިވިޝަނަށް ޕްރޮމޯޓްކުރުމުގެ މަސައްކަތްކޮށްފަ އެވެ. މިދިޔަ ސީޒަންގައި ނިއުއާ އެކު ދިމާވި އެންމެ ބޮޑު ގޮންޖެހުމަކީ ތައްޔާރުވާން ވަގުތު ނުލިބުން ކަމަށް ސޮބާ ވަނީ ބުނެފަ އެވެ.
ނިއު ސަސްޕެންޝަނުން ސަލާމަތްވެ، ރަނގަޅަށް ޕްރެކްޓިސް ކޮށްލަން ވަގުތުވެސް ނުލިބުނީ ކަމަށް ވެސް ސޮބާ ބުނެފައިވެ އެވެ. އެހެން ނަމަވެސް މި އަހަރު ދުރާލާ މުބާރާތަށް ތައްޔާރުވާން ވިކްޓަރީގެ މެނޭޖްމަންޓުން ފުރުސަތު ފަހިކޮށްދޭނެ ކަމަށް ބުނެފައިވާތީ މިއީ ރަނގަޅު ނިންމުންކަމުގައި ގަބޫލުކުރާ ކަމަށް ސޮބާ ބުންޏެވެ.
ވިކްޓަރީ އަށް އަކުރަމް އާއި އުމެއިރު ކަހަލަ ކުޅުންތެރިން ގެނައުމަކީ ބޭނުންވާ ޓާގެޓްތަކަށް ދާން ބަލާއިރު، ފަސޭހައެއް ކަމަށް ސޮބާ ގަބޫލުކުރެ އެވެ.
"މިދިޔަ އަހަރު ދިޔަކަމުގައި ވިޔަސް، މި އަހަރު ފުރަތަމަ ޓާގެޓަކީ ފަސްޓް ޑިވިޝަނަށް ޕްރޮމޯޓްކުރުން. ގައުމީ ޓީމްގެ ކެޕްޓަން އަކޫ، ދެން އުމެއިރު ހިމެނޭ ގޮތަށް ރަނގަޅު ޓީމެއް ބިނާކޮށް ފަސްޓަށް އެރުވުން ޓާގެޓަކީ. އެ އިތުބާރު އެބައޮތް. އެއީ މި ނިކުންނަނީ މި ކުލަބުގެ އެކި ހާލަތުގައި ކުލަބާ އެކު މަސައްކަތްކޮށްފައި ހުރީ." ސޮބާ ބުންޏެވެ.
ސޮބާ ބުނީ ފުރަތަމަ ޓާގެޓަކީ ފަސްޓް ޑިވިޝަނަށް ޕްރޮމޯޓްވުންކަމަށާއި، ދެން އޭގެ ފަހުން ބޭނުންވަނީ ސީޒަންގެ ފަހުކޮޅު އޮންނަ އެފްއޭ ކަޕްގައި ރަނގަޅު ނަތީޖާއެއް ނެރުން ކަމަށެވެ. ރަނގަޅު ޓީމެއް ބިނާ ކުރަން މިހާރު ވެސް ކުޅުންތެރިންނާ ވާހަކަ ދެކެވެމުން އަންނަ ކަމަށާއި، ރަނގަޅު ކުޅުންތެރިންތަކެއް ޓީމާ ގުޅޭނެ ކަމުގެ ޔަގީން ކަން ވެސް ސޮބާ ވަނީ ދީފަ އެވެ.
ކުލަބު ގްރީން ސްޓްރީޓްސް ދެ ވަނަ ޑިވިޝަންގެ ޗެމްޕިއަންކަން ހޯދައި، 2017 ވަނަ އަހަރު ފުރަތަމަ ޑިވިޝަނުގައި ކުޅުނުއިރު، އެ ދެ އަހަރު އެ ކްލަބްގައި ސޮބާ ރަނގަޅު މަސައްކަތެއް ކުރި އެވެ.
ސޮބާ ބުނީ ވިކްޓަރީން ގެންނަ ބިދޭސީ ކުޅުންތެރިންނަކީ ވެސް ފެންވަރު ރަނގަޅު ކުޅުންތެރިންނަށް ހެދުމަށް ގިނަ މަސައްކަތްތަކެއް ކުރާނެ ކަމަށާއި، އެ ކުޅުންތެރިންނާ އެކު ވިކްޓްރީ ނިކުންނާނީ ވަރުގަދަކޮށް ކަމަށެވެ.
ދިވެހި ފުޓްބޯޅައަށް ހެޔޮ ބަދަލެއް އައިސް ފޯރި ދެމެހެއްޓުމަށްޓަކައި ނިއު އާއި ވިކްޓްރީ ފުރަތަމަ ޑިވިޝަންގައި އޮތުން މުހިންމު ކަމަށް ސޮބާ ދެކެ އެވެ.
ސޮބާ ބުނީ މިދިޔަ އަހަރުގެ ދެ ވަނަ ޑިވިޝަންގައި ނިއު އާއި ކުޅުނު މެޗުން އެކަން ފެނުނު ކަމަށާއި، ޕްރިމިއާ ލީގުގައި ނުފެންނަ ވަރުގެ ސަޕޯޓެއް އެ މެޗުން ފެނުމަކީ ދިވެހި ސަޕޯޓަރުން އަދިވެސް ތިބި ކަމުގެ ހެއްކެއް ކަމަށެވެ.
ވިކްޓްރީ މިހާރު އޮތް ހާލަތުން ނެގުމަށް ކުރީގެ ކުޅުންތެރިންނާއި ކޯޗުން މަސައްކަތް ކުރުމަކީ މުހިންމު ކަމެއް ކަމަށާއި، އެއީ ޒިންމާއެއް ކަމުގައި ދެކިގެން އެންމެން ބައިވެރިވުމަށް ސޮބާ ގޮވާލި އެވެ.
