ޖުޑީޝަލް ސާވިސް ކޮމިޝަން (ޖޭއެސްސީ)އިން ބަަލަމުން ދިޔަ ހަތަރު ސުލޫކީ މައްސަލައެއް ސާބިތު ނުވާ ކަމަށް ނިންމައިފި އެވެ.
އެއީ، ތިން ފަނޑިޔާރަކާއި ގުޅިގެން ހުށަހަޅާފައިވާ ހަތަރު މައްސަލަ އެކެވެ. އޭގެ ތެރޭގައި ހިމެނެނީ، ހައިކޯޓުގެ ފަނޑިޔާރު ހުސައިން ޝަހީދުގެ ދެ ސުލޫކީ މައްސަލައަކާއި، ކްރިމިނަލް ކޯޓުގެ ގާޒީ ސޮފްއަތު ހަބީބުގެ ސުލޫކީ މައްސަލައަކާއި، ސިވިލް ކޯޓުގެ ގާޒީ މަރިޔަމް ވަހީދުގެ ސުލޫކީ މައްސަލައެކެވެ.
ފެބްރުއަރީ 12، ގައި ބޭއްވި ޖޭއެސްސީގެ 12 ވަނަ ބައްދަލުވުމުގައި ވަނީ މި މައްސަލަތައް ސާބިތު ނުވާ ކަމަށް ނިންމާފަ އެވެ.
ފަނޑިޔާރު ހުސައިން ޝަހީދުގެ ދެ ސުލޫކީ މައްސަލައެއްް ތަހުގީގުކޮށްފައިވާއިރު، އެއީ ކޮން މައްސަލަތަކެއް ކަމެއް ޖޭއެސްސީން ހާމައެއް ނުކުރެ އެވެ.
ކްރިމިނަލް ކޯޓުގެ ގާޒީ ސޮފްވަތު ހަބީބުއާ ގުޅިގެން ނޮވެމްބަރު 10، 2022 ގައި ބަލަން ފަށާފައި ވަނީ، ސޮފްވަތު ބައްލަވަމުން ގެންދަވާ މައްސަލައެއްގައި ހުލާސާ ބަޔާން ހުށަހެޅި ފަހުން ގާނޫނުގައި ބަޔާންކޮށްފައިވާ މުއްދަތުގެ ތެރޭގައި، މައްސަލައިގެ ހުކުމް ކުރުމުގެ މަޖިލިސް ބާއްވާފައި ނުވާ މައްސަލައެކެވެ.
ޖިނާއީ އިޖުރާއަތުގެ ގާނޫނުގައި އޮންނަ ގޮތުން، ޝަރީއަތުގެ ހިނގި ކަންކަމުގެ މައްޗަށް މައްސަލައެއްގައި ހިމެނޭ ކޮންމެ ހަސްމެއްގެ ފަރާތުން ހުލާސާ ބަޔާނެއް ހުށަހެޅުމަށް ފަހު، 30 ދުވަހުގެ ތެރޭގައި މައްސަލައެއްގެ ހުކުމް އިއްވަން ޖެހެ އެވެ.
ސިވިލް ކޯޓުގެ ގާޒީ މަރިޔަމް ވަހީދުގެ ސުލޫކީ މައްސަލަ ބަލާފައި ވަނީ އެ ކޯޓުގައި ކުރިއަށް ގެންދިޔަ ތަންފީޒީ ގަޒިއްޔާއެއްގައި ހިމެނޭ ހަސްމަކާ އެގަޒިއްޔާއާ ގުޅޭގޮތުން ޝަރީއަތުގެ ބޭރުން މުއާމަލާތުކޮށް، ހުކުމް ތަންފީޒު މައްސަލަތައް ބެލުމުގައި އަމަލުކުރާ އުސޫލާ ކަނޑައެޅިގެނ ހިލާފަށް އަމަލުކޮށްފައިވާކަމަސް ބުނެ ހުށަހެޅުނު ޝަކުވާއަކާ ގުޅިގެންނެވެ.
