މެލޭޝިއާ ބޮޑުވަޒީރު އަންވަރު އިބްރާހިމްގެ ދައުރު ނިމެންދެން އެ މަނިކުފާނަށް ތާއިދު ކުރައްވާނެ ކަމަށް، ބައިގަރުނަށް ވުރެ ގިނަ ދުވަހު އެ ގައުމުގެ ވެރިކަންކުރި ޔުނައިޓެޑް މެލޭސް ނޭޝަނަލް އޮގަނައިޒޭޝަން (އަމްނޯ) އިން ބުނެފި އެވެ.
އަމްނޯގެ ސެކްރެޓަރީ ޖެނެރަލް އަހުމަދު މަސްލާން ވިދާޅުވީ ބޮޑުވަޒީރު އަންވަރުގެ ދައުރު ނިމެންދެން އެ މަނިކުފާނަށް ކުރާ ތާއިދު ދަމަހައްޓަނީ ސިޔާސީ ހަމަޖެހުމަށް ކަމަށެވެ.
ގާނޫނު ހަދާ މަޖިލީހުގެ މެމްބަރު ކަމާއި ޑެޕިއުޓީ ފިނޭންސް މިނިސްޓަރުކަން ވެސް ކުރައްވާ އަހުމަދު ވިދާޅުވީ އެއްބައިވަންތަކަމުގެ ސަރުކާރު އެކުލަވާލުމާއެކު މެލޭޝިއާގެ ސިޔާސީ މަސްރަހަށް ހަމަޖެހުން ލިބިފައިވާ ކަމަށެވެ. އެ ހަމަޖެހުން ދެމެހެއްޓުމަށް އޭނާ ވަނީ އެހެން މެމްބަރުންނަށް ވެސް އިލްތިމާސް ކުރައްވައިފަ އެވެ.
ގާނޫނު ހަދާ މަޖިލީހުގައި ރަސްގެފާނު އަބްދުﷲ ރިއާޔަތުއްދީން އަލް މުސްތަފާ ހޯމަ ދުވަހު ކުރެއްވި ތަގުރީރުގައި، ގައުމީ އެއްބައިވަންތަކަމުގެ ސަރުކާރެއް އުފެއްދުމަށް ޕާޓީތަކަށް ވެވުނު އިއްތިފާގަށް މަރުހަބާ ވިދާޅުވި އެވެ. އެ މަނިކުފާނު ވިދާޅުވީ، ބޭނުންފުޅުވަނީ މެލޭޝިއާގައި ހަރުދަނާ ސަރުކާރެއް އެކުލެވިފައި އޮތުމަށެވެ.
ނޮވެމްބަރު މަހު ބޭއްވި މެލޭޝިއާގެ 15 ވަނަ އާންމު އިންތިހާބުގައި އެއްވެސް ޕާޓީއަކަށް ގާނޫނު ހަދާ މަޖިލީހުގެ މެޖޯރިޓީ ނުލިބުނެވެ. އެހެންވެ، މަޝްވަރާ ކުރެއްވުމަށް ފަހު ބޮޑުވަޒީރަކަށް އަންވަރު އައްޔަން ކުރައްވައި، ގައުމީ އެއްބައިވަންތަކަމުގެ ސަރުކާރެއް އުފެއްދުމަށެވެ.
