ޕެރިސް (ފެބްރުއަރީ 13) - ޔުއެފާ ޗެމްޕިއަންސް ލީގުގެ ދެ ވަނަ ބުރުގައި ބަޔާން މިއުނިކާ ދެކޮޅަށް ފްރާންސްގެ ޗެމްޕިއަން ޕީއެސްޖީން ކުޅޭ މެޗަށް އެ ޓީމުގެ ތަރި ކީލިއަން އެމްބާޕޭ ފިޓްވުމުން ސްކޮޑުގައި ހިމަނައިފި އެވެ.
މި މަހު އެއް ވަނަ ދުވަހު ޕީއެސްޖީން ފްރެންޗް ލީގުގައި މޮންޓްޕެލިއޭއާ ކުޅުނު މެޗުގައި އެމްބާޕޭ އަށް ލިބުނު އަނިޔާގެ ސަބަބުން އޭރު ޕީއެސްޖީން ބުނީ އެމްބާޕޭ ތިން ހަފްތާ އަށް ކުޅުމާ ދުރުގައި ހުންނަން ޖެހޭނެ ކަމަށެވެ.
ހޮނިހިރު ދުވަހުގެރޭ ފްރެންޗް ލީގުގައި މޮނާކޯ އަތުން ޕީއެސްޖީ ބަލިވި މެޗަށް ފަހު އެ ޓީމުގެ ކޯޗު ކްރިސްޓޮފް ގަލްޓިއޭ ގާތުގައި އެމްބާޕޭ އަށް މާދަމާރޭ ބަޔާނާ ދެކޮޅަށް ކުޅެވޭނެތޯ ގިނަ ސުވާލުތަކެއް ކުރިމަތިވި އެވެ.
އެ ސުވާލުތަކަށް ޖަވާބު ދެމުން، ގަލްޓިއޭ ބުނީ އެމްބާޕޭ ފިޓްނަމަ ކުޅޭނެ ކަމަށާއި އެއްވެސް ވަރަކަށް "ރިސްކު ނަގައިގެން" އެމްބާޕޭ ލައްވައި ނުކުޅުވާނެ ކަމަށެވެ.
ބަޔާންގެ ކޯޗު ހޫލިއަން ނާގަލްސްމަން ވަނީ އެމްބާޕޭ ފިޓްނުވާނެ ކަމަށް ބުނެ، ޕީއެސްޖީން ދައްކާ ވާހަކަތައް އަޑުނާހާނެ ކަމަށާއި އޭނާގެ ވިސްނުމަށް އަންނަނީ އެމްބާޕޭ އަނިޔާ ކަމަށް ބުނެ ދެކެވޭ ވާހަކަ އަކީ ޕީއެސްޖީން ރާވައިގެން ކުޅޭ "މައިންޑް ގޭމެއް" ކަމަށެވެ.
މިދިޔަ ދެ ދުވަހު ޕީއެސްޖީން ބޭއްވި ފަރިތަކުރުންތަކުގައި އެމްބާޕޭގެ އިތުރުން، އަނިޔާގައި ހުރި ލިއޮނަލް މެސީ އާއި މާކޯ ވެރާޓީ ވެސް ވަނީ ބައިވެރިވެފަ އެވެ. އެމްބާޕޭ އާއި ވެރާޓީ އަދި މެސީ ވެސް ޕީއެސްޖީން ބަޔާނާ ދެކޮޅަށް ކުޅެން ނެގި 22 ކުޅުންތެރިންގެ ސްކޮޑުގައި ހިމެނެ އެވެ.
ޕީއެސްޖީން އެމްބާޕޭ އާއި މެސީގެ ސޮއި ހޯދި އެންމެ ބޮޑު ބޭނުމަކީ އެ ކްލަބްގެ ތާރިހުގައި ފުރަަތަމަ ފަހަރަށް ޗެމްޕިއަންސް ލީގުގެ ތަށި ހޯދުމުގެ ބޭނުމުގަ އެވެ.
