މެލޭޝިއާ ބޮޑުވަޒީރު އަންވަރު އިބްރާހިމްގެ އިކޮނޮމިކް އެޑްވައިޒަރުގެ މަގާމުން އިއްޔެ ވަކިވެވަޑައިގެންނެވި އެ މަނިކުފާނުގެ ދޮށީ ދަރިކަނބަލުން ނޫރުލް އިއްޒާ، ފިނޭންސް މިނިސްޓަރަށް ލަފާ ދޭ ޕެނަލްގެ ސެކްރެޓޭރިއޭޓުގެ ކޯޗެއާއަކަށް އައްޔަން ކުރައްވައިފި އެވެ.
މެލޭޝިޔާގެ ބޮޑުވަޒީރަކީ އަދި ފިނޭންސް މިނިސްޓަރަކީ ވެސް އަންވަރެވެ.
މިދިޔަ އަހަރު ނޮވެމްބަރު މަހު ބޭއްވި މެލޭޝިއާގެ އާންމު އިންތިހާބުގައި 42 އަހަރުގެ ނޫރުލް އިއްޒާ ވާދަކުރެއްވި ގާނޫނު ހަދާ މަޖިލީހުގެ ގޮނޑި ދިފާއު ނުކުރެއްވުނެވެ.
އެއަށް ފަހު އޭނާ އައްޔަން ކުރެއްވީ ބޮޑުވަޒީރު އަންވަރަށް މާލީ އަދި އިގުދިސޯދީ ކަންކަމުގައި ލަފާ ދެއްވާ ބޭފުޅެއްގެ މަގާމަށެވެ. އެކަމާ ގުޅިގެން އަންވަރަށް ފާޑުކިޔުންތައް އަމާޒުވަމުން ދިޔައިރު، އެޑްވައިޒަރުގެ މަގާމުން ނޫރުލް އިއްޒަ އިސްތިއުފާ ދެއްވި ކަން އިއްޔެ އޭނާ ވަނީ ހާމަ ކުރައްވައިފަ އެވެ. އަދި ފިނޭންސް މިނިސްޓަރަށް ލަފާ ދޭ ޕެނަލްގެ ސެކްރިޓޭރިއޭޓުގެ ކޯޗެއާއެއްގެ ގޮތުގައި ހިދުމަތް ކުރެއްވުމަށް ލިބިވަޑައިގެންނެވި ދައުވަތު ގަބޫލު ކުރައްވާކަން ވެސް އޭނާ ވަނީ ހާމަ ކުރައްވައިފަ އެވެ.
ފެބްރުއަރީ 7 ގައި އުފެއްދެވި އެ ޕެނަލުގެ މަސްއޫލިއްޔަތުގެ ތެރޭގައި ހިމެނެނީ މެލޭޝިއާގައި މިހާރު ހުރި ސަބްސިޑީތައް މުރާޖައާ ކުރުމާއި ސަރުކާރު ހިއްސާވާ ކުންފުނިތަކުގެ ކަންކަމުގައި ލަފާ ދިނުމާއި، މާލީ ކަންކަމާއި ދަރަންޏާއި ހެޔޮވެރިކަމާ ގުޅޭ ކަންކަމުގައި ލަފާ ދިނުމެވެ.
އެ ޕެނަލްގައި ހިމެނިވަޑައިގަންނަނަވަނީ މެލޭޝިއާގެ ގައުމީ ތެޔޮ ކުންފުނި ޕެޓްރޯނާސްގެ ކުރީގެ ޗީފް އެގްޒެކެޓިވް ހަސަން މަރިކަން، ސަންވޭ ޔުނިވާސިޓީގެ އިކޮނޮމިކްސް ސްޓަޑީޒް ޑިރެކްޓަރު ޔޭ ކިމް ލެންގް އަދި ޔުނިވާސިޓީ މަލާޔާގެ ޕްރޮފެސަރު އޮފް އިކޮނޮމިކްސް ރާޖާ ރާސިއާ އެވެ.
ޕެނަލްގެ ސެކްރެޓޭރިއޭޓުގެ ކޯޗެއާގެ ގޮތުގައި ތިއްބަވާނީ ޕެޓްރޯނާސްގެ ސީނިއާ މެނޭޖަރު ޚައިރިލް އަނޫރު ރަމްލީއާ އާއި ނޫރުލް އިއްޒާ އެވެ.
އެމެރިކާގެ ޖޯންސް ހޮޕްކިންސް ޔުނިވާސިޓީން އިންޖިނިއަރިންގެ ދާއިރާއިން ނޫރުލް އިއްޒަ ޑިގްރީ ހާސިލު ކުރައްވާފައިވާއިރު، ޕަބްލިކް އެންޑް ސޯޝަލް ޕޮލިސީގެ ދާއިރާއިން ބެސް ޑިގްރީއެއް ހާސިލް ކުރައްވާފައިވެ އެވެ.
މެލޭޝިއާގެ ގާނޫނު ހަދާ މަޖިލީހުގެ މެމްބަރުކަން ނޫރުލް އިއްޒާ ކުރިން އަދާކުރެއްވި ނަމަވެސް، މާލީ އަދި އިގުތިސޯދީ ދާއިރާގެ ތަޖުރިބާއެއް ލިބިވަޑައިގެންފައިނުވެ އެވެ.
ނޫރުލް އިއްޒާ އަށް އެޑްވައިޒަރުކަން ދެއްވުމާ ގުޅިގެން އަމާޒުވި ފާޑުކިޔުންތައް ދިފާއު ކުރައްވައި އަންވަރު ވިދާޅުވީ އެޑްވައިޒަރުގެ މަގާމަކީ އުޖޫރައެއް ލިބޭ މަގާމެއް ވެސް ނޫން ކަމަށެވެ. އަދި އެއީ އާއިލީ ބޭފުޅަކަށް މަގާމުގެ ނާޖާއިޒު ބޭނުން ހިފައި، މުއްސަނދިވުމަށް ލިބިފައި އޮތް ފުރުސަތެއް ނޫން ކަމަށް ވެސް އެ މަނިކުފާނު ވިދާޅުވި އެވެ.
