ހުޅަނގުގެ ބާރުތަކުން ޔޫކްރެއިނަށް ދެމުންދާ އަސްކަރީ އެހީތައް އިތުރުވުމާއެކު ރަޝިއާއިން ޓޭންކު އުފައްދާ މިންވަރު އިތުރުކޮށްފި އެވެ.
ރަޝިއާގެ ކުރީގެ ރައީސް އަދި އެ ގައުމުގެ ސަލާމަތީ ކައުންސިލްގެ ޑެޕިއުޓީ ސެކްރެޓަރީ، ޑިމިޓްރީ މެޑްވެޑެވް ވަނީ ޔޫކްރެއިނުގެ އަސްކަރިއްޔާ އަށް އިތުރުވަމުންދާ އަސްކަރީ އެހީތަކަށް ސަމާލުވެ ރަޝިއާއިން ހަނގުރާމަމަތީ ޓޭންކު އުފައްދާ މިންވަރު އިތުރުކުރާނެ ކަމަށް ވިދާޅުވެފަ އެވެ.
ޔޫކްރެއިނުގެ ރައީސް މިހާރު ޔޫރަޕަށް ކުރައްވަމުން ގެންދަވާ ދަތުރުފުޅާ ގުޅިގެން މެޑްވެޑެވް ވިދާޅުވީ ރަޝިއާގެ ދުޝްމަނުން ދަނީ ޓޭންކާއި، އެއާކްރާފްޓާއި، މިސައިލަށް އެދި އެކި ގައުމުތަކަށް ގޮސް އާދޭސްކުރަމުން ކަމަށެވެ.
"1،000 އެއްހާ އައު ޓޭންކު އަދި ބޭނުންކުރަމުންދާ ޓޭންކުތައް އެންމެ ފަހުގެ ޒަމާނީ ފެންވަރަށް ގެނައުމުގެ މަސައްކަތް މިހާރު ވަނީ ފައްޓާފައި" މެޑްވެޑެވް ވިދާޅުވި އެވެ.
ކުރިއަށް އޮތް މަސްތަކުގައި ރަޝިއާ އަދި ޔޫކްރޭނާ ދެމެދު ކުރަމުންދާ ހަނގުރާމަ އަނެއްކާވެސް ވަރުގަދަވާނެ ކަމަށް ދެ ގައުމުންވެސް އަންނަނީ ލަފާކުރަމުންނެވެ. މި އަޑުތަކާއެކު ޔޫކްރެއިނަށް ވާގިވެރިވާ ހުޅަނގުގެ ބާރުތަކުން ވަނީ މި އަހަރު އެކަނިވެސް 400 އަށްވުރެ ގިނަ ޓޭންކު ހަދިޔާކޮށްފަ އެވެ.
