އިސްލާމިކް މިިނިސްޓްރީގެ ކުރީގެ ޕާމަނަންޓް ސެކްރެޓަރީ މުސްއަބް އަބްދުﷲއަށް ސިވިލް ސާވިސް ކޮމިޝަން (ސީއެސްސީ) އިން ބަދަލު ދިނުމަށް އެންގި މައްސަލާގައި އިސްތިއުނާފް މަރުހަލާގެ ބޭނުން ނަހަމަ ގޮތުގައި ހިފި ކަމަށް ހައި ކޯޓުން މިއަދު ނިންމައިފި އެވެ.
މިދިޔަ އަހަރުގެ ޖޫން މަހު އަމަލު ކުރަން ފެށި މަދަނީ އިޖުރާއަތްތަކުގެ ގާނޫނުގައި ބުނާ ގޮތުން، ޝަރީއަތުގެ ނިޒާމު ނަހަމަ ގޮތުގައި ބޭނުން ހިފުމުގެ ގޮތުން މައްސަލައެއް އިސްތިއުނާފު ކޮށްފައިވާ ކަން ޝަރީއަތަށް ސާބިތުވާ ނަމަ، އެ ފަރާތުގެ ކިބައިން މައްސަލަ ރައްދުވާ ފަރާތަށް ކޯޓުގެ ހަރަދު އަތުލެވޭނެ އެވެ.
މުސްއަބު ސަސްޕެންޑު ކޮށްފައިވާ މުއްދަތުގައި އޭނާއަށް އިނާޔަތްތައް ހިމެނޭ ގޮތަށް މުސާރައިގެ ގޮތުގައި ލިބެން ޖެހޭ 86،333.33ރ. އާއި ވަޒީފާއިން ވަކިކުރި ތާރީހުން ފެށިގެން ވަޒީފާގެ އެއްބަސްވުމުގައިވާ މުއްދަތު ހަމަވާއިރު މުސާރައަށްވާ 1،113،333.33 ރ. ދިނުމަށް އަމުރުކުރީ ވެސް ހައި ކޯޓުންނެވެ.
ހައި ކޯޓުން ކުރި އެ ހުކުމާ އެއް ގޮތަށް ސީއެސްސީން ފައިސާ ދައްކަމުން ނުދާތީ، މުސްއަބުގެ ފަރާތުން ސިވިލް ކޯޓަށް އަނެއްކާ ވެސް އެ މައްސަލަ ހުށަހެޅި އެވެ. އަދި، ތިން ދުވަހުގެ ތެރޭގައި އެ ފައިސާ ދިނުމަށް ސިވިލް ކޯޓުން އަމުރު ވެސް ކުރި އެވެ.
އެހެން ވިޔަސް ފައިސާ ދެއްކުމުގެ ބަދަލުގައި ސީއެސްސީ އިން ވަނީ ސިވިލް ކޯޓުން ފަހުން ނެރުނު އަމުރު ހައި ކޯޓުގައި އިސްތިއުނާފްކޮށްފަ އެވެ. މުސްއަބު އެދުނީ މަދަނީ އިޖުރާއަތުގެ ގާނޫނަށް ހަވާލާދީ، އެއީ ކޯޓުގެ ބޭނުން ނަހަމަ ގޮތުގައި ހިފި ކަމަށް ކަނޑައަޅައިދިނުމަށެވެ.
ހައި ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރި ހުކުމުގައި ވަނީ ހައި ކޯޓުން ބަދަލު ދިނުމަށް ކޮށްފައިވާ ހުކުމަކަށް އަމަލު ނުކުރުމަށް އެދެން ޖެހޭނީ މަތީ މަރުހަލާއެއްގެ ކޯޓުގައި އިސްތިއުނާފު ކޮށްގެން ކަމަށެވެ.
ނަމަވެސ،ް އެ މައްސަލަ ސުޕްރީމް ކޯޓުގައި އިސްތިއުނާފް ނުކޮށް، ހައި ކޯޓުން ކުރި ހުކުމާ އެއް ގޮތަށް އަމަލު ނުކުރުން ސިވިލް ކޯޓުން ކުރި ހުކުމެއް އަނެއްކާ ވެސް ހައި ކޯޓަށް ހުށަހެޅީ ހެޔޮ ނިޔަތެއްގައި ކަމަށް ގަބޫލު ނުކުރެވޭ ކަމަށް ހުކުމުގައިވެ އެވެ.
ކޯޓުގެ ހަރަދުގެ ގޮތުގައި 30،000ރ. ނަގައި ދިނުމަށް މުސްއަބުގެ ފަރާތުން އެދިފައިވާއިރު، އެ ފައިސާ ހޯދުމަށް ހުށަހަޅަން ޖެހޭނީ ސިވިލް ކޯޓަށް ކަން މަދަނީ އިޖުރާއަތުގެ ގާނޫނުގައި ބަޔާން ކޮށްފައި އޮންނާތީ އެ ގޮތަށް އަމަލު ކުރުމަށް ވެސް ހައި ކޯޓުން ކުރި ހުކުމުގައިވެ އެވެ.
ހައި ކޯޓުގައި މި މައްސަލަ ބެއްލެވި ފަނޑިޔާރުގެ ބެންޗުގެ ރިޔާސަތުގައި އިންނެވީ ފަނޑިޔާރު މުހައްމަދު ސަލީމެވެ. ބެންޗުގައި ދެން ތިއްބެވީ ފަނޑިޔާރު ދީބަނާޒް ފަހުމީ އަދި ފަނޑިޔާރު މުހައްމަދު ފައިސަލެވެ.
