ފްލޮރިޑާ (ފެބްރުއަރީ 09) - އިނގިރޭސި ވިލާތުގެ އަމީރު ހެރީ އަދި އަނބިކަނބަލުން މޭގަންގެ މައްޗަށް، މޭގަންގެ ދައްތަ ސަމަންތާ މާކަލް އަބުރުގެ ދައުވާ ކޮށްފި އެވެ.
ފްލޮރިޑާގެ ކޯޓެއްގައި ކޮށްފައިވާ މި ދައުވާ އަކީ މޭގަން އަދި ހެރީ 2021 ގައި އޯޕްރާ ވިންފްރީ އަށް ދިން އިންޓަވިއެއްގައި މޭގަން އަކީ އޭނާގެ މައިންބަފައިންގެ ހަމައެކަނި ދަރި ކަމަށާއި ބޮޑުވީ ބޭބެއެއް ނުވަތަ ދައްތައެއް ނެތި ކަމަށް ބުނި ބުނުމާ ގުޅިގެންނެވެ.
ސަމަންތާއަކީ މޭގަންގެ ބައްޕަގެ އިތުރު ކައިވެންޏަކަށް ލިބިފައިވާ ދަރިއެކެވެ. އަދި މޭގަން ކުޑައިރު އޭނާގެ އެކި ކަންކަމުގައި ސަމަންތާ ބައިވެރިވި ކަމަށް އޭނާގެ ދައުވާގައި ބުނެފައިވެ އެވެ.
އެ އިންޓަވިއުގެ ސަބަބުން ލިބުނު ގެއްލުމުގެ ބަދަލުގައި ސަމަންތާ ވަނީ 75،000 ޑޮލަރުގެ ބަދަލެއް ހޯދައިދިނުމަށް އެދިފަ އެވެ.
ސަމަންތާގެ ދައުވާގައިވާ މައިގަނޑު ނުކުތާތަކަކީ:
- މުޅި ދުނިޔޭގެ ކުރިމަތީގައި މޭގަން، އޭނާގެ އަގު ވައްޓާލާ ނަފުރަތު އުފެއްދުން
- މޭގަން ބޮޑުވަމުން އައިއިރު އޭނާ އާއި ސަމަންތާއާ ދެމެދު އޮތް ގުޅުމަކީ ހީނަރު ގުޅުމެއް ކަމަށާއި އެއީ ދެބެންގެ ދެމެދުގައި އޮންނަ ކަހަލަ ގާތް ގުޅުމެއް ނޫން ގޮތަށް ސިފަކޮށް ދޮގުހެދުން
- މޭގަން އަކީ މައިންބަފައިންގެ ހަމައެކަނި ދަރިކަމަށް ބުނެ ދޮގު ހެދުން
- ބޮޑުވަމުން އައިރު ދިމާވާ ނުވާ ކަންކަން އިންޓަވިއުގައި ހިއްސާކޮށް ދޮގު ހެދުމާއި އެކަމުގެ ސަބަބުން ސަމަންތާ އަދި އޭނާގެ ބައްޕަގެ އަގު ވައްޓާލުން
މި ކަންކަމުގެ އިތުރުން ސަމަންތާ ވަނީ މޭގަންގެ ޅަފަތުގައި ދެބެއިންގެ ދެމެދުގައި އޮތީ ރަނގަޅު ގުޅުމެއް ކަމަށާއި ކުޑައިރު އަބަދުވެސް ދެމީހުން މުއާމަލާތް ކުރި ކަމަށް ބުނެފަ އެވެ. އަދި ދަތި ޅަފަތެއްގެ ގޮތުގައި މޭގަން ސިފަކުރި ސިފަކުރުން ދޮގުކޮށް ސަމަންތާ ބުނެފައިވަނީ މޭގަންގެ ގިނަ ހަރަދުތަކެއް ކޮށްފައިވަނީ އޭނާގެ ބައްޕަ ކަމަށާއި އޭގެ ތެރޭގައި ޕްރައިވްޓް ސްކޫލު ފީ އަދި އެކްޓިން ކެރިއަރު ފެއްޓުމުގައި އެހީވުން ހިމެނޭ ކަމަށެވެ.
މި މައްސަލައިގައި މޭގަން އަދި ހެރީގެ ފަރާތުން ކޯޓަށް ބަޔާން ދިނުމާ ދެކޮޅަށް އަމުރަކަށް އެދުނު ނަމަވެސް މައްސަލަ ބަލާ ގާޒީ އެ އަމުރަށް އިޖާބަ ދީފައެއްނުވެ އެވެ. އެހެންކަމުން މި މައްސަލައިގައި ހެރީ އަދި މޭގަންވެެސް ކޯޓަށް ހާޒިރުވެ ބަޔާން ދޭން ޖެހޭނެ އެވެ.
އިނގިރޭސިވިލާތުގެ ޑިޔުން އެންޑް ޑަޗެސް އޮފް ސަސެކްސް ޝާހީ ޒިންމާތަކާ ދުރަށް ޖެހި، އެމެރިކާގެ ކެލިފޯނިއާއަށް ދިރިއުޅުން ބަދަލުކުރީ މީގެ ތިން އަހަރު ކުރިންނެވެ. އެއަށްފަހު އެ ދެކަނބަލުން އޯޕެރާއަށް ދިން އިންޓަވިއު އަދި މިދިޔަ ޑިސެމްބަރު މަހު ނެޓްފިލްކްސް އިން ރިލީޒްކުރި ޑޮކިއުސީރީޒްގައި ޝާހީ އާއިލާ އަދި މޭގަންގެ އާއިލާއަށްވެސް އެކި ތުހުމަތުތައް ކޮށް ގިނަ ވާހަކަތަކެއް ވަނީ ހިއްސާކޮށްފަ އެވެ.
