ވެރިކަން ކުރާ މައި ޕާޓީ، އެމްޑީޕީގެ އެތެރޭގައި އުފެދިފައިވާ އޮތް ހިޔާލުތަފާތުވުންތަކުގެ ޒުވާބެއް ރައްޔިތުންގެ މަޖިލީހުގެ ތަޅުމުގައި ހޫނުވެ، މާފަންނު ހުޅަނގު ދާއިރާގެ މެންބަރު މުހައްމަދު ފަލާހުގެ ނަން އިއްވައި ތަޅުމުން ބޭރުކޮށްފި އެވެ.
މަޖިލީހުގެ މިއަދުގެ ޖަލްސާގައި ހުށަހެޅިފައި އޮތް ސަރުކާރު އޮފީސްތަކަށް އިމާރާތްތައް ކުއްޔަށް ހިފުން ހުއްޓުވުމާ ގުޅޭ ގަރާރަކަށް ބަހުސް ކުރައްވަމުން ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ވަނީ އެންމެ ފަހުން ކުރިއަށް ދިޔަ އެމްޑީޕީ ޕްރައިމަރީގެ ވާހަކަ ދައްކަވައިފަ އެވެ.
"އިންތިހާބަކުން ބަލިވީމާ އެއީ ބަލިވީ، ބަލިވި ބަޔަކު ޖެހޭނީ ގަދަވި ބަޔަކު ފަހަތަށް އަރަން، އެއީ ޕާޓީގެ ނިޒާމަކީ، އެއީ ޕާޓީގެ އުސޫލަކީ ވެސް، އެގޮތަށް ނޫޅެންޏާ އެއީ ޕާޓީގައި އުޅޭ ބައެއް ނޫން، އެއީ ވަކިވެވަގެނެގެން އުޅޭ ބައެއް،" އޭނާ ވިދާޅުވި އެވެ.
އަބްދުލްގަފޫރު ވިދާޅުވީ ރައީސް އިބްރާހިމް މުހައްމަދު ސޯލިހު ދާދިފަހުން ބޭއްވި އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވުމުން، އެމަނިކުފާނުގެ ފަހަތަށް ނާރައި މަޖިލީހުގައި ސަރުކާރަށް އެއްޗެހި ކިޔުމަށް ވުރެ "އޮރިޔާމުން މަގުމައްޗަށް ނިކުތުން މާ ރީތި ވާނެ" ކަމަށެވެ.
އޭނާގެ ވާހަކަ ރިޔާސަތުގައި އިންނެވި ވިލިފުށީ ދާއިރާގެ މެންބަރު ހަސަން އަފީފް ވަނީ ހުއްޓުވައި، ހުށަހެޅިފައި އޮތް މައްސަލައަށް ވާހަކަ ދެއްކުމަށް އެދިވަޑައިގެންނެވި އެވެ.
އެ ހިސާބުން ތަޅުން ވަރަށް ހޫނުވެ، މެންބަރުން ވަނީ އަފީފްއާ ނުރުހުންވެ ދެކޮޅަށް އަޑުގަދަ ކުރަން ފަށައިފަ އެވެ. ކިޔާ އެއްޗެއް ސާފު ނުވި ނަމަވެސް އަފީފް ވަނީ އެ ބޭފުޅާއަށް ނިސްބަތްކޮށް އެގޮތަށް ވާހަކަ ނުދެއްކޭނެ ކަމަށް ވިދާޅުވެފަ އެވެ.
އެ ހިސާބުން ވެސް ފަލާހު ހުއްޓާނުލެއްވުމުން، ރިޔާސަތުން ވަނީ އޭނާގެ ނަން އިއްވައިފަ އެވެ. އޭގެ ފަހުން، ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲގެ ނަން އިއްވައި، އޭނާ ވެސް ވަނީ ތަޅުމުން ނެރެފަ އެވެ.
