ބޯޑަރު ހުރަސްކޮށް ދެކުނު ކޮރެއާގެ ވައިގެ ސަރަހައްދަށް އުތުރު ކޮރެއާގެ ބެލޫނެއް ވަދެފައިވާ ކަމަށް ދެނެގަނެވިފައިވާ ކަމަށް ދެކުނު ކޮރެއާއިން ބުނެފި އެވެ.
ދެކުނު ކޮރެއާގެ ޑިފެންސް މިނިސްޓްރީއިން ހޯމަ ދުވަހު ބުނި ގޮތުގައި އެ ބޮޑު ބެލޫން އެ ގައުމުގެ ވައިގެ ސަރަހައްދަށް ވަނަސް އޭގެ ސަބަބުން ނުރައްކަލެއް އޮތް ކަމަށް ނުބެލެވުނު ކަމަށެވެ. ނަމަވެސް މިކަމާއި ގުޅިގެން އަޅަންޖެހޭ ސަލާމަތީ ފިޔަވަޅުތައް އަޅާނެ ކަމަށް ވަނީ ބުނެފަ އެވެ.
އުތުރު ކޮރެއާއިން މިކަމާ ގުޅިގެން ބަހެއް ބުނެފައިނުވާއިރު ދެތިން ގަޑިއިރަށްފަހު އެ ބެލޫން ވަނީ އެނބުރި އުުތުރު ކޮރެއާއަށް ވަދެފަ އެވެ.
ދެކުނު ކޮރެއާއިން ބުނީ މި ބެލޫނަކީ ޖާސޫސް ކުރާ ބެލޫނެއް ކަމަށް ނުބެލެވޭ ކަމަށާއި އެއީ މޫސުމީ ދިރާސާއަށް ބޭނުންކުރާ އުޅަނދެއްކަމަށް ބެލެވޭ ކަމަށެވެ.
ދެ ކޮރެއާގެ ދެމެދުގައި ބެލޫނެއްގެ މައްސަލަ ޖެހިފައި މިވަނީ އެމެރިކާގެ ވައިގެ ސަރަހައްދުން ފެނުނު ޗައިނާގެ ބެލޫނެއް ބަޑިޖަހައި ވައްޓާލިތާ 24 ގަޑިއިރު ފަހުންނެވެ.
އާދިއްތަ ދުވަހު އެމެރިކާގެ އަސްކަރީ މުހިންމު ތަންތަން ހުރަސްކޮށް އެ ގައުމުގެ ހުޅަނގު ބިތުން އިރުމަތީ ބިތަށް ދަތުރުކުރަމުންދިޔަ ބެލޫން އެމެރިކާއިން ވައްޓާލީ ރައީސް ޖޯ ބައިޑެންގެ އަމުރުފުޅަށެވެ.
އެއީ ޗައިނާގެ ޖާސޫސީ އުޅަނދެއް ކަމަށް އެމެރިކާއިން ބުނި ނަމަވެސް ޗައިނާއިން ބުނީ އެއީ މޫސުމީ ދިރާސާތައް ކުރާ ބެލޫނެއް ކަމަށެވެ.
