ރަޝިއާ-ޔޫކްރެއިން ހަނގުރާމައިގައި ކުރިއަށް އޮތް ހަފުތާތަކުގައި ހަމަލާތައް ވަރުގަދަކުރުމަށް ރަޝިއާއިން ތައްޔާރުވަމުންދާކަމަށް ޔުކްރެއިނުން ބުނެފި އެވެ.
ޔޫކްރެއިނުގެ ގައުމީ ސަލާމަތާ ބެހޭ ކައުންސިލްގެ ސެކްރެޓަރީ އެލެކްސީ ޑަނީލޯ އިނގިރޭސި ނޫސްތަކަށް ދިން އިންޓަވިއުއެއްގައި ބުނެފައިވަނީ ކުރިއަށް އޮތް މަސްތަކަކީ މި ހަނގުރާމައިގެ ގޮތް ނިންމާ ދުވަސްވަރު ކަމުގަ އެވެ.
"އެބަ އިނގޭ މި ހަނގުރާމައިގެ ބޮޑެތި ކުރިމަތިލުންތައް ކުރިއަށް އޮތީކަން، މި ކުރިމަތިލުންތައް މި އަހަރު ތެރޭ، ބެލެވޭ ގޮތުން ކުރިއަށް އޮތް ދެތިން މަސް ތެރޭ ހިނގާނެ" ޑަނިލޯ ބުންޏެވެ.
އަދި މިހާރު ރަޝިއާއިން ތައްޔާރުވަމުންދަނީ އެ ގައުމުގެ އަސްކަރިއްޔާއަށް ދެވެން ހުރި އެންމެ ވަރުގަދަ ހަމަލާތައް ކުރިއަށް އޮތް ހަފުތާތަކުގައި ދިނުމަށް ކަމަށްވެސް އޭނާ ވަނީ ބުނެފަ އެވެ. މީގެއިތުރުން ޑަނިލޯ ބުނީ މިކަމުގެ ނިޝާންތައް މިހާރުވެސް ފެންނަމުންދާކަމަށެވެ.
ޑެނިލޯގެ އިތުރުން ޔޫކްރެއިނުގެ އިސް އަސްކަރީ އޮފިޝަލަކު ވަނީ މިކަން ކަށަވަރުކޮށްދީ ރަޝިއާއިން ތައްޔާރުވަމުންދަނީ ބިމުގެ މަގުގެ އިތުރުން ކަނޑާއި ވައިގެ މަގުންވެސް ހަމަލާތައް ވަރުގަދަ ކުރުމަށް ކަމަށް ބުނެފަ އެވެ.
ޔޫކްރެއިނުން މިފަދަ ތުހުމަތުތަކެއް ކޮށްފައިވާއިރު، އެ ގައުމު އަދި ރަޝިއާއާއެކު ބޯޑަރު ހިއްސާކުރާ ބެލަރުސްއިން ވަނީ އަންނަ ހަފުތާވެސް ރަޝިއާއާއެކު 'އަސްކަރީ ތަމްރީނު' ތައް ކުރިއަށް ގެންދާނެ ކަމަށް ބުނެފަ އެވެ.
މިއާއެކު ޔޫކްރެއިނުގެ އެކުވެރި ހުޅަނގުގެ ބާރުތަކުން ދަނީ އެކި ފެންވަރުގައި ކުރިއަށް އޮތް މަސްތަކުގައި އެ ގައުމަށް އަސްކަރީ އެހީ ފޯރުކޮށްދޭނެކަން އިއުލާންކުރަމުންނެވެ. އެ ގައުމުތަކުގެ ތެރޭގައި އެމެރިކާ، ޕޯޗުގަލް، އިނގިރޭސިވިލާތް އަދި ޖަރުމަނު ހިމެނެ އެވެ.
