ލަންޑަން (ފެބްރުއަރީ 6) - މެންޗެސްޓާ ސިޓީން ގިނަ އަހަރުތަކެއްގެ މަތިން ފައިނޭންޝިއަލް ފެއާ ޕްލޭ (އެފްއޭއެފްޕީ)ގެ އުސޫލުތަކާއި އިނގިރޭސި ޕްރިމިއާ ލީގުގެ ގަވާއިދުތަކާއި ހިލާފަށް ކަންކަން ކޮށްފައިވާ ކަމުގެ މައްސަލަތަކެއް ފެންމަތިވެ، ސިޓީ އަށް ބޮޑު އަދަބެއްގެ ބިރު ބޮޑުވެއްޖެ އެެވެ.
އިނގިރޭސި ނޫސް "ދި ޓައިމްސް"ގެ ސީނިއާ ރިޕޯޓަރު މާޓިން ޒީގްލާ ރިޕޯޓްކޮށްފައިވާ ގޮތުގައި ސިޓީން 2009-2010 ގެ ސީޒަނުން ފެށިގެން 2017-2018 ގެ ސީޒަނާ ހަމައަށް މާލީ ގިނަ ކަންތައްތަކެއް ނިންމާފައިހުރީ އުސޫލާ ހިލާފަށް މަކަރު ހަދައިގެންނެވެ.
ސިޓީގެ އެ މައްސަލަ އިނގިރޭސި ޕްރިމިއާ ލީގުން އަންނަނީ ތަހުގީގު ކުރަމުންނެވެ.
ޕްރިމިއާ ލީގުން ނެރުނު ބަޔާނުގައި ބުނެފައިވަނީ ސިޓީގެ މާލީ މުއާމަލާތްތަކާ ގުޅޭ ގިނަ މައްސަލަަތަކެއް ބަލަަމުން އަންނަ ކަމަށާއި އެ ކަންކަން ހިނގައިދިޔަ ގޮތް، ބެލުމަށްޓަކައި ޕްރިމިއާ ލީގުގެ ބޯޑުން މިނިވަން ކޮމިޝަނަކާ ހަވާލުކުރާނެ ކަމަށެވެ.
އެ ކޮމިޝަނުން މައްސަލައިގެ ތަހުގީގު ނިންމާއިރު، ސިޓީގެ ގިނަ މައްްސަލަތަކެއް ފާހަގަކުރެވި، ސާބިތުވާ ވަރަށް ހެކި ލިިބިއްޖެނަމަ އެ ޓީމަށް ދޭ އަަދަބު ބޮޑުވާނެ އެވެ. އެ ގޮތުން ޕޮއިންޓް އުނިކުރުމާއި ރެލިގޭޓްކޮށްލުން ފަދަ ހަރުކަށި އަަދަބުތައް ވެސް ގަވާއިދުގައި ހިމެނެ އެވެ.
ދާދި ފަހުން، އިޓަލީގެ ޔުވެންޓަސް ވެސް މާލީ ގޮތުން ކަންކަން އޮޅުވާލާފައިވާތީ، އިޓަލީގެ ފުޓްބޯޅަ ފެޑެރޭޝަނުން ވަނީ ޔުވެންޓަސް އަތުން 15 ޕޮއިންޓް އުނިކޮށް، ޔުވެންޓަސްގެ ކުރީގެ ބޯޑު މެމްބަރުންނަށް އެކި މުއްދަތުގެ ސަސްޕެންޝަންްތަކެއް ދީފަ އެވެ.
އިނގިރޭސި ލީގު ބޯޑުން، ސިޓީގެ މާލީ ކަންކަމާ ގުޅޭ މި މައްސަލަ ބަލާ އެ ޓީމުން ވަނީ ޕްރިމިއާ ލީގުގެ ތަށި ތިން ފަހަރެއްގެ މަތިން ހޯދައިފަ އެވެ. އެ ގޮތުން ސިޓީން 2013-2014 ވަނަ އަހަރުގެ ސީޒަނުގައި ޕްރިމިއާ ލީގު ކާމިޔާބު ކުރިއިރު، އެ ފަހަރު ސިޓީގެ މާލީ މައްސަލަތަކެއް ވަނީ ބަލައިފަ އެވެ.
ޔޫއޭއީގެ މަހުޖަނު ޝެއިހް މަންސޫރު، 2008 ވަަނަ އަހަރު ސިޓީ ގަތުމަށް ފަހު, ވޭތުވެދިޔަ 15 ވަރަކަށް އަހަރު ތެރޭ ވަނީ ސިޓީ އަށް ތިން ބިލިއަން ޑޮލަރަށް ވުރެ އިތުރަށް އިންވެސްޓްކޮށްފަ އެވެ. މަންސޫރު ހަވާލުވި ފަހުން، ސިޓީން ހަރަދުކުރާ ގޮތުގެ މައްސަލަ، އެކި ފަހަރުތަކެއްގެ މަތިން އެކި ކްލަބްތަކުން އިނގިރޭސި ލީގު ބޯޑާއި އިނގިރޭސި އެފްއޭ އަދި ޔުއެފާ އަށް ވަނީ ހުށަހަޅައިފަ އެވެ.
