މުޒާހަރާތަކުގެ ހަބަރުތައް ކަވަރު ކުރުމުގައި ހަރަކާތްތެރިވާ ނޫސްވެރިންގެ ރައްކާތެރިކަން ކަށަވަރުކޮށްދޭން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ފުލުހުންނަށް ގޮވާލައިފި އެވެ.
އެމްޖޭއޭއިން މިހެން ގޮވާލާފައި ވަނީ މިއަދު އިދިކޮޅު ޕީޕީއެމުން ބޭއްވި މުޒާހަރާ ކަވަރު ކުރުމުގައި ހަރަކާތްތެރިވި ބައެއް ނޫސްވެރިންނަށް އަނިޔާވުމާ ގުޅިގެންނެވެ. އެގޮތުން، ޗެނަލް 13ގެ ދެ ނޫސްވެރިއަކަށް އަނިޔާވެފައިވާއިރު، ވީޓީވީގެ ނޫސްވެރިއަކަށް ފުރައްސާރަ ކުރި މައްސަލައެއް ވެސް ވަނީ ފެންމަތިވެފަ އެވެ.
އެމްޖޭއޭއިން ކުރި ޓްވީޓެއްގައި ބުނީ މުޒާހަރާ ކަވަރު ކުރަމުންދިޔަ ޗެނަލް 13ގެ ދެ ނޫސްވެރިއަކަށް އަނިޔާވެފައިވާތީ އެ ޖަމްއިއްޔާއިން ކަންބޮޑުވާ ކަމަށެވެ. މީޑިއާ ފާސް އަޅައިގެން ތިބި ވީޑިއޯގްރާފަރާއި ފޮޓޯ ޖާނަލިސްޓަށް ފުލުހުންގެ ޝީލްޑުން ޖެހި އަނިޔާވެފައި ވާއިރު, ޕެޕާސްޕްރޭގެ އަސަރު ވެސް އެމީހުންނަށް ވަނީ ކޮށްފައިވަ ކަމަށް އެމްޖޭއޭއިން ބުނެ އެވެ.
މުޒާހަރާގައި އަނިޔާވި ނޫސްވެރިންގެ ތެރެއިން އެއް ނޫސްވެރިއަކަށް މި ވަގުތު ގެންދަނީ ހޮސްޕިޓަލްގައި ފަރުވާދެމުންދާ ކަމަށް ވެސް އެ ޓްވީޓުގައި ވެއެވެ.
"އެހެންކަމުން, މުޒާހަރާތައް ރޫޅާލުމާއި ބާރުގެ ބޭނުން ކުރާއިރު ނޫސްވެރިންނަށް ރައްކާތެރިކަން ކަށަވަރުކުރުމަށް ފުލުހުންނަށް ގޮވާލަމެވެ." އެމްޖޭއޭއިން ބުންޏެވެ.
އެމްޖޭއޭއިން އިތުރަށް ބުނީ މުޒާހަރާގެ ބައިވެރިންގެ ފަރާތުން ވީޓީވީގެ ނޫސްވެރިއަކަށް ފުރައްސާރަ ކުރިމަތިވެފައިވާ ކަމުގެ ޝަކުވާ ވެސް މިއަދު ލިބިފައިވާ ކަމަށެވެ. އަދި، މިފަދަ އަމަލުތައް ވެސް އެ ޖަމިއްޔާއިން ކުށްވެރިކުރާ ކަމަށާއި، އަބަދުވެސް ނޫސްވެރިންނަށް ރައްކާތެރި މާހައުލަކަށް ގޮވާލާ ކަމަށް އެ ޖަމްއިއްޔާއިން ބުނެ އެވެ.
މިއަދުގެ މުޒާހަރާގައި އަނިޔާވި ޗެނަލް 13ގެ ނޫސްވެރިއަކަށް އޭޑީކޭ ހޮސްޕިޓަލުގެ އައިސީޔޫގައި ފަރުވާ ދެމުންދާ ކަމަށް އިދިކޮޅު ޕީޕީއެމުން ވަނީ ބުނެފަ އެވެ.
ނަމަވެސް، އޭޑީކޭ ހޮސްޕިޓަލުން 'އަދަދު'އަށް ކަށަވަރު ކޮށްދީފައިވާ ގޮތުގައި، މުޒާހަރާއިން އަނިޔާވެގެން ހޮސްޕިޓަލަށް ގެންދިޔަ އެއްވެސް މީހަކަށް އައިސީޔޫގައި ފަރުވާ ދެމުންނެއް ނުދެ އެވެ. އަދި، އެމީހުންނަށް ފަރުވާ ދެމުންދަނީ އެމަޖެންސީ ރޫމުގައި ކަމަށް ވެސް އެ ހޮސްޕިޓަލުން ބުނެފައި ވެއެވެ.
