ބާސެލޯނާ (ފެބްރުއަރީ 6) - ސްޕެނިޝް ލީގުގެ އެންމެ ފަހުގެ ޗެމްޕިއަން ރެއާލް މެޑްރިޑް ކުޅުނު މެޗުން މަޔޯކާ އަތުން 1-0 އިން ބަލިވުމުގެ ފައިދާނަގައި، ބާސެލޯނާ އިން 3-0 އިން ސެވިއްޔާ ބަލިކޮށް ލީގުގެ އެއް ވަނައިގައި އަށް ޕޮއިންޓުގެ ލީޑެއް ނަގައިފި އެވެ.
ރޭގެ މެޗުތަކަށް ފަހު ބާސެލޯނާ އެއް ވަނައިގައި އޮތީ 20 މެޗުން 53 ޕޮއިންޓާ އެކު އެވެ. ދެ ވަނައިގައި އޮތީ 20 މެޗުން 45 ޕޮއިންޓާ އެކު ރެއާލް އެވެ. ތިން ވަނައިގައި އޮތް ރެއާލް ސޮސިއެޑާޑް ވަނީ ރޭ 1-0 އިން ރެއާލް ވަލޮޑޮލިޑް އަތުން ބަލިވެފަ އެވެ. ސޮސިއެޑާޑްގެ އޮތީ 20 މެޗުން 39 ޕޮއިންޓެވެ.
މަޔޯކާ ދަނޑުގައި ރޭ ރެއާލް ކޮޅަށް އެ ޓީމުން ޖެހި ހަމައެކަނި ގޯލަކީ 13 ވަނަ މިނިޓްގައި ރެއާލްގެ ނަޗޯ ގޮންޒާލޭޒް އަތުން ބައިކޮޅަށް ވަން ގޯލެކެވެ. މަޔޯކާގެ ވޭދާތު މުރީގީ އަށް ލިބުމުގެ ކުރިން ނަޗޯ ބޮލުން ޖައްސާލި ބޯޅަ ގޯލަށް ވަނީ ރެއާލްގެ ގޯލުގައި ހުރި ކީޕަރު އަންޑްރީ ލުނިން ބޯމަތިން ގޮހެވެ. ރެއާލްގެ ކީޕަރު ތިބޯ ކޯޓުއާ އަނިޔާގެ ސަބަބުން ރޭގެ މެޗުގައި ނުކުޅެ އެވެ.
ނަތީޖާ ހަަމަހަމަކޮށްދޭން ރެއާލަށް އެންމެ ހުސް ފުރުސަތެއް ލިބުނީ މެޗުގެ 60 ވަނަ މިނިޓްގަ އެވެ. ރެއާލްގެ ވިނީޝިއުސް ޖޫނިއާ އަށް މަޔޯކާގެ ކީޕަރު ޕެޑްރަގް ރަޖްކޮވިޗް ކުރި ފައުލަކަށް ދިން ޕެނަލްޓީން މާކޯ އަސެންސިއޯ ފޮނުވާލި ބޯޅަ ކީޕަރު ރަޖްކޮވިޗް ވަނީ މަތަކޮށްފަ އެވެ.
މިއީ 2019 ވަނަ އަހަރުގެ ފަހުން މަޔޯކާ އަތުން ރެއާލް ބަލިވި ފުރަތަަމަ ފަހަރެވެ. މި ދެ ޓީމު އެންމެ ފަހުން ބައްދަލުކުރި 14 މެޗުގެ ތެރެއިން މަޔޯކާ އަށް މޮޅުވެވުނީ ދެ މެޗުންނެވެ.
ސެވިއްޔާ ކޮޅަށް ރޭ ބާސެލޯނާގެ ތިން ގޯލު ވެސް ޖެހީ މެޗުގެ ދެ ވަނަ ހާފުގަ އެވެ. އެ ގޮތުން ބާސެލޯނާ އަށް ގޯލު ހުޅުވައިދިން ލަނޑު ޖެހީ 58 ވަނަ މިނިޓްގައި ޖޯޑީ އަލްބާ އެވެ. މިއީ އޭރިއާތެރެއިން ބާސެލޯނާގެ ފްރޭންކް ކެސިއޭ ދިން ބޯޅަ އަކުން އަލްބާ ގޯލުގެ ދުރު ކަނަށް ބޯޅަ ފޮނުވާލައިގެން ޖެހި ގޯލެކެވެ.
މެޗުގެ 70 ވަނަ މިނިޓްގައި ބާސެލޯނާގެ ދެ ވަނަ ލަނޑު ޖެހީ ގަވީ އެވެ. މިއީ ސެވިއްޔާ ޑިފެންސް ފަހަތަށް އައި ބޯޅައެއް ހޯދުމަށް ފަހު، ރަފީނިއާ ހުސްކޮށްލާފައި ދިން ބޯޅައަކުން ގަވީ ކާމިޔާބުކުރި ލަނޑެކެވެ. އޭގެ ނުވަ މިނިޓް ފަހުން، ޖޯޑީ އަލްބާ ނެގި ހުރަހަކަށް ހުސްކޮށް އަަރައި، ރަފީނިއާ ވަނީ ބާސެލޯނާގެ ތިން ވަނަ ގޯލު ޖަހައިފަ އެވެ.
ސެވިއްޔާ އަށް މި މެޗުގައި ބާސެލޯނާގެ ކީޕަރު މާކް އަންދްރޭ ޓާ ސްޓެގެން ހާސްކޮށްލެވޭ ވަރުގެ ހަމަލާއެއް ފޮނުވާނުލެވުނެވެ.
