މެޑްރިޑް (ފެބްރުއަރީ 5) - ދާދި ފަހުން ނިމުނު ޖެނުއަރީ ޓްރާންސްފާގައި އާ ކުޅުންތެރިން ގެންނަން ރެއާލް މެޑްރިޑުން މަސައްކަތް ނުކުރީ އެ ޓީމުގައި މިހާރު އޮތް ސްކޮޑާ އެކު މި ސީޒަން ކާމިޔާބުކޮށް ނިންމާލެވޭނެ ކަމުގެ ޔަގީންކަން އޮތުމުން ކަމަށް ރެއާލް މެޑްރިޑްގެ ކޯޗު ކާލޯ އަންޗެލޮޓީ ބުނެފި އެވެ.
ޖެނުއަރީ ޓްރާންސްފާގައި ސްޕެނިޝް ކުލަބުތަކުން ހޭދަކުރީ އެންމެ 30 މިލިއަން ޑޮލަރެވެ. ބޮޑެތި ކުލަބުތައް ކަމަށްވާ ބާސެލޯނާ އާއި ރެއާލް މެޑްރިޑުން ކުޅުންތެރިން ގަތުމަށް ހޭދަކޮށްފައިނުވާއިރު، އެތުލެޓިކޯ މެޑްރިޑުން ވަނީ ބާސެލޯނާގެ މެމްފިސް ޑިޕާއީ އާއި ޓޮޓެންހަމް ހޮޓްސްޕާސްގެ މެޓް ޑޮހަޓީ އެ ޓީމަށް ގެނެސްފަ އެވެ.
ދުނިޔޭގެ އެންމެ ބޮޑެތި ކުލަބުތަކުގެ ތެރޭގައި ހިމެނޭ ރެއާލް މެޑްރިޑުން ޖެނުއަރީ ޓްރާންސްފާގައި ކުޅުންތެރިން ގަންނަން މަސައްކަތް ނުކުރާތީ އެ ޓީމަށް މިދިޔަ ސީޒަންގައި ހޯދުނު ކަހަލަ ކާމިޔާބެއް މި އަހަރު ލިބޭނެތޯ ގިނަ ބަޔަކު އަންނަނީ ސުވާލު ކުރަމުންނެވެ.
މި ސުވާލުތަކަށް ކޯޗު އަންޗެލޮޓީ ދިނީ ވަރަށް ފިނި ޖަވާބެކެވެ. އޭނާ ބުނީ ކުޅުންތެރިން ގަންނަން ނޫޅުނީ ކުލަބަށް އާ ކުޅުންތެރިން ބޭނުން ނުވާތީ ކަމަށާއި، އެ ޓީމުގެ ކަންކަން އަބަދުވެސް ދުރާލާ ޕްލޭން ކުރަނީ ވަރަށް ރަނގަޅަށް ކަމަށެވެ.
އެ ގޮތުން ސީޒަން ފެށުމުގެ ކުރިން ރެއާލުން ބޭނުންވާ ހުރިހާ ކުޅުންތެރިން ހޯދައި ޓީމް ވަރުގަދަކޮށްފައި އޮއްވައި އާ ކުޅުންތެރިން ސީޒަންގެ މެދުތެރެއިން ޓީމަށް ގެންނަން ބޭނުންނުވީ ކަމަށް އަންޗެލޮޓީ ވަނީ ބުނެފަ އެވެ.
"އަހަރުމެން ސީޒަން ފެށި ރަނގަޅު ޕްލޭނަކާ އެކު، ސްކޮޑު އޮތީ ބޭނުންވާ ހާލަތުގައި. އަހަރުމެން މި ނުކުންނަނީ ތައްޓަށް ކޮންމެ މުބާރާތެއްގައި ވެސް، އެކަން ކުރެވޭ ވަރު މި ސްކޮޑުގައި އެބަހުރި" ރެއާލް މެޑްރިޑާ އެކު މިދިޔަ އަހަރުގެ ސްޕެނިޝް ލީގާއި ޗެމްޕިއަންސް ލީގު ކާމިޔާބުކުރި އަންޗެލޮޓީ ބުންޏެވެ.
އަންޗެލޮޓީ މި ގޮތަށް ބުނި ނަމަވެސް، ޖުމްލަކޮށް ބަލާއިރު، މި ސީޒަންގައި ރެއާލަށް އެންމެ އެދެވޭ ކުޅުމެއް ނުދެއްކެ އެވެ. އެ ގޮތުން ސްޕެނިޝް ލީގުގައި މިހާތަނަށް ކުޅުނު 19 މެޗުުން ދެ މެޗުން ބަލިވެ ތިން މެޗު އެއްވަރުވެފައިވާއިރު، އެ ޓީމު އޮތީ، ލީގުގެ ކުރީގައި އޮތް، ބާސެލޯނާގެ ފަހަތުން ފަސް ޕޮއިންޓްގެ ފަރަގަކާ އެކު ލީގުގެ ދެ ވަނައިގަ އެވެ.
ސީޒަން ފެށިއިރު ރަނގަޅު ފޯމެއްގައި ހުރި ފޯވާޑް ކަރީމް ބެންޒެމާ އަށް އަނިޔާގެ މައްސަލަތައް މަދުމަދުން ކުރިމަތިލާން ޖެހޭއިރު، މުހިންމު ބައެއް ޑިފެންޑަރުން ވެސް އަދިވެސް ތިބީ ފިޓުކޮށެއް ނޫނެވެ.
ފީފާ ކުލަބު ވޯލްޑް ކަޕްގައި މި މަހު ރެއާލް ކުޅެން ޖެހޭއިރު އެ ޓީމަށް އެކަމުގެ ސަބަބުން އުނދަގޫތަކަކާ ކުރިމަތިލާން ޖެހޭނެކަމަށް ބެލެވެ އެވެ. އެއީ ގާތް ގާތުގައި ލީގު މެޗުތަކެއް ހުރުމާއި، ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ކުޅުންވެސް މި މަހު ފަށާތީ އެވެ.
އެންމެ ފަހުން އެ ޓީމުން ވެލެންސީއާ އާ ދެކޮޅަށް މިދިޔަ ހުކުރު ދުވަހު ކުޅުމަށް ފަހު އެކަށީގެންވާ ރެސްޓެއް ނެތި މަޔޯކާއާ ދެކޮޅަށް މިރޭ ކުޅޭނެ އެވެ. އޭގެ ފަހުން އަންނަ ބުރާސްފަތި ދުވަހު އެ ޓީމު ފީފާ ކުލަބު ވޯލްޑް ކަޕްގެ ސެމީ ފައިނަލުގައި ކުޅޭނެ އެވެ.
ގާތް ގާތުގައި މެޗުތައް ކުޅެން ޖެހުމުން އަންޗެލޮޓީ ވަނީ ސްޕެނިޝް ލީގު ހިންގާ އެލްއެފްޕީ އަށް ފާޑުކިޔާފަ އެވެ. ކުޅުންތެރިންގެ ރައްކާތެރި ކުރުމަށް ޝެޑިއުލް ހަދާ ފަރާތްތަކުން ނުވިސްނާކަމަށް އަންޗެލޮޓީ ވަނީ ބުނެފަ އެވެ.
"އަހަރަމެން އެންމެ ބޮޑަށް ކަންބޮޑު ވަނީ އަރާމުކުރަން 72 ގަޑިއިރު ވެސް ނުލިބި އަނެއްކާ މެޗަކަށް ކުރިމަތިލާން ޖެހޭތީ. މިއީ ރަނގަޅު ގޮތެއް ނޫން." އަންޗެލޮޓީ ބުންޏެވެ.
މަޔޯކާ ދަނޑުގައި ރެއާލާ ދެކޮޅަށް ކުޅޭ މެޗު ފަށާނީ މިއަދު އިރުއޮއްސި ހައެއް ޖަހާއިރު އެވެެ.
