ޕެރިސް (ފެބްރުއަރީ 2) - ފްރާންސްގެ ޗެމްޕިއަން ޕީއެސްޖީ އަށް ކުޅެމުން އަންނަ ތަރި ކީލިއަން އެމްބާޕޭގެ ފަލަމަސްގަނޑަށް ލިބުނު އަނިޔާއާ ހެދި ތިން ހަފްތާ އަށް ކުޅުމާ ދުުރުގައި ހުންނަން ޖެހޭއިރު، މުހިންމު ތިން މެޗު ގެއްލޭނެކަން ކަށަވަރުވެއްޖެ އެވެ.
އެމްބާޕޭ، 24، ފަލަމަސްގަނޑަށް އަނިޔާވީ، ފްރެންޗް ލީގުގައި ރޭ އެ ޓީމުން މޮންޓްޕެލިއޭ އަތުން މޮޅުވި މެޗުގަ އެވެ. އެ މެޗުގެ 21 ވަނަ މިނިޓްގައި އެމްބާޕޭ އަށް އަނިޔާވެގެން ބަދަލުކުރިއިރު، އޭނާ އަތުން ވަނީ ޕެނަލްޓީއެއް ބޭކާރުވެފަ އެވެ. ދެ ފަހަރެއްގެ މަތިން ޖަހަން ލިބުނު ޕެނަލްޓީ އެމްބާޕޭ އަށް ނާކާމިޔާބުވިއިރު، ރީބައުންސް ބޯޅަ ފޮނުވާލީ ހުރަސްދަނޑިމަތިންނެވެ.
ރޭގެ މެޗަށް ފަހު އެމްބާޕޭގެ އަނިޔާގެ ތަފްސީލް ދެނެގަންނަން ހެދި ޓެސްޓްތަކަށް ފަހު، ޕީއެސްޖީން ނެރުނު ބަޔާނެއްގައި ބުނެފައިވަނީ ތިން ހަފްތާއެއް ދުވަހު ކުޅުމާ ދުރުގައި ހުންނަން ޖެހޭނެ ކަމަށެެވެ. އެއާ އެކު، އެމްބާޕޭ އަށް ޗެމްޕިއަންސް ލީގުގެ ގަދަ 16 ބުރުގައި ބަޔާން މިއުނިކާ ކުޅޭ މެޗާއި ފްރެންޗް ކަޕްގައި މާސޭއާ ދެކޮޅަށް ކުޅޭ މެޗާއި ލީގުގައި މޮނާކޯއާ ދެކޮޅަށް ޕީއެސްޖީން ނުކުންނަ މެޗު ގެއްލޭނެކަން މި ވަނީ ޔަީންވެފަ އެވެ.
މި ސީޒަނުގައި އެމްބާޕޭ ހުރީ ރަނގަޅު ފޯމެއްގަ އެވެ. މިހާތަނަށް ޕީއެސްޖީ އަށް ކުޅެދިން 26 މެޗުން ވަނީ 25 ލަނޑު ޖަހައިފަ އެވެ.
މިހާރު އޮތްގޮތުން ޕީއެސްޖީން ޗެމްޕިއަންސް ލީގުގެ ގަދަ 16 ބުުރުގެ ދެ ވަނަ ލެގުގައި ބަޔާން ދަނޑުގައި ކުޅޭ މެޗަށް އެމްބާޕޭ އެއްކޮށް ފިޓްވާނެ އެވެ.
