ޕެރިސް (ފެބްރުއަރީ 2) - މެންޗެސްޓާ ޔުނައިޓެޑަށް ކުޅެމުން އަންނަ އިތުބާރު ޑިފެންޑަރު، ރަފައެލް ވަރާން، ފްރާންސް ގައުމީ ޓީމަށް ކުޅުން ހުއްޓާލައިފި އެވެ.
ވަރާން، 29، އަކީ 2018 ވަނަ އަހަރު ފީފާ ވޯލްޑް ކަޕް ކާމިޔާބުކުރި ފްރާންސް ޓީމުގެ މުހިންމު ކުޅުންތެރިއެކެވެ. އޭނާ ވަނީ މިދިޔަ އަހަރުގެ ނޮވެމްބަރާއި ޑިސެމްބަރު މަހު، ގަަތަރުގައި ބޭއްވި ފީފާ ވޯލްޑް ކަޕްގެ ފައިނަލަށް ފްރާންސް ގެންގޮސްދިނުމުގައި ވެސް އިސް ރޯލެއް ކުޅުނު ކުޅުންތެރިއެކެވެ.
"އެންމެ މަތީ ފަންތީގައި 10 އަހަރު ދުވަހު ގައުމީ ޓީމަށް ކުޅުމަކީ އަހަރެންގެ ކެރިއަރުގައި ވެސް އަދި ދިރިއުޅުުމުގައި ވެސް އެންމެ ފަހުރުވެރިކަމާ އެކު ފާހަަގަކުރާނެ އެއް ކަންތައް،" 2013 ވަނަ އަހަރު އެންމެ ފުރަތަމަ ފްރާންސް ޓީމަށް މެޗެއް ކުޅެދިން ވަރާން ބުންޏެވެ.
"ފްރާންސް ޖޯޒީގައި ކުޅެން ލިބުނު ކޮންމެ މެޗެއްގައި އެންމެ ރަނގަޅަށް މަސައްކަތް ކުރީ ގައުމުގެ ހައްގުގައި، އޭގެއިން ކޮންމެ ހަނދާނެއް ވެސް އަބަދު އާ ކުރާނީ ފަހުރުވެރިކަމާ އެކު،"
ވަރާން، 2018 ވަނަ އަހަރުގެ ފީފާ ވޯލްޑް ކަޕް ތަށި ހިފައިގެން.--- ފޮޓޯ: އޭއެފްޕީ
ފްރާންސް ގައުމީ ޓީމަށް ކުޅެދިން 93 މެޗުން ވަރާން ވަނީ ފަަސް ގޯލު ޖަހައިފަ އެވެ.
ގައުމީ ޓީމާ އެކު ކުރެވުނު ހާއްސަ ތަޖުރިބާގެ ހަނދާން އާ ކޮށް، ވަރާން ބުނީ 1998 ވަނަ އަހަރު ފްރާންސް އިން ވޯލްޑް ކަޕް ޗެމްޕިއަންކަން ހޯދިތަން ޓީވީން ބެލިއިރު، ގައުމީ ޓީމަށް ކުޅުުމުގެ ހާއްސަ ޝައުގުވެރިކަމެއް އުފެދުނު ކަމަށާއި އޭގެ 20 އަހަރު ފަހުން ފްރާންސުން ދުނިޔޭގެ ތަށި އުުފުލާލިިއިރު، ޓީމުގައި ހުރެވުމަކީ ހުވަފެން ހަގީގަތަކަށް ވުން ކަމަށެވެ.
މި ފަހަރުގެ ވޯލްޑް ކަޕަށް ފަހު ފްރާންސް ޓީމަށް ކުޅުން ހުއްޓާލިކަން އިއުލާނުކުރި ފުރަތަމަ ކުޅުންތެރިއަކީ ޓީމުގެ ކެޕްޓަން، ގޯލްކީޕަރު ހޫގޯ ލޮރީސް އެވެ.
ފްރާންސްގެ ކޯޗު ޑިޑިއޭ ޑެޝޯމްޕްސް ބުނީ ވަރާންގެ ނިންމުމަށް އިހުތިރާމްކުރާ ކަމަށާއި ފްރާންސް ޓީމުން ގެންލިގެން އެ ދިޔައީ ލީޑަރެއް ކަމަށެވެ.
