ދުނިޔޭގެ ފެންވަރުގައި ބާސްކެޓްބޯޅައިގެ ޔޫތު ޑިވެލޮޕްމަންޓް ޕްރޮގްރާމްތައް އެންމެ ފުޅާ ދާއިރާއެއްގައި ހިންގަމުން އަންނަ އެންބީއޭ ސްކޫލް ޕްރޮގްރާމްގެ ކޯޗެއްގެ ގޮތުގައި ހަރަކާތްތެރިވުމުގެ ފުރުސަތު ރާއްޖޭގެ ބާސްކެޓްބޯޅަ ކޯޗު ހަސަން މުހައްމަދު ދީދީ އަށް ލިބިއްޖެ އެވެ.
ހަސަން އަކީ މޯލްޑިވްސް ބާސްކެޓްބޯޅަ އެސޯސިއޭޝަން (އެމްބީއޭ)އާ ގުޅިގެން ކުރިއަށްގެންދާ ޑިވެލޮޕްމަންޓް ޕްރޮގްރާމްގައި ޖޫނިއާ ޓީމްތައް ތަމްރީން ކުރުމުގައި މިދިޔަ ތިން އަހަރު މުހިންމު ދައުރެއް އަދާކުރި ކޯޗެކެވެ. ދުބާއީގައި ހުންނަ އެންބީއޭ ސްކޫލުގެ ކޯޗެއްގެ ގޮތުގައި މަސައްކަތްކުރަން ހަސަން އަށް ފުރުސަތު ލިބުނީ އޭނާ މާލޭގައި ތަމްރީން ކުރި ދެ ކުއްޖަކު އެންބީއޭ ސްކޫލްގައި ތަމްރީން ހަދަން ފެށި ހިސާބުންނެވެ.
"އެ ދެ ކުދިން އެކޮޅުގައި ޓްރެއިންނި ހަދަން ފެށި ފަހުން އެކޮޅުން ފުރުސަތުތައް އޮތްކަން އެނގުނީ. ދެން ހަމަ ކޯޗެއްގެ ވަޒީފާ އަށް އެޕްލައިކޮށްގެންގެން ހަތަރު ފަހަރު އިންޓަވިއުވެސް ކޮށްފައި އެންމެ ފަހުން އޮފާ ލިބުނީ" ދުނިޔޭގެ މިވަގުތު އެންމެ ފުޅާކޮށް ހިންގަމުން އަންނަ ތަމްރީން ޕްރޮގްރާމްގެ ކޯޗެއްގެ ގޮތުގައި ހަރަކާތްތެރިވާން ފުރުސަތު ލިބުނު ގޮތާ ގުޅޭގޮތުން ހަސަން ބުންޏެވެ.
ރާއްޖޭން ބޭރުން ލިބޭ ކޮންމެ ފުރުސަތެއްގެ ބޭނުން ވެސް ވީ އެންމެ ފުރިހަމަ އަށް ހިފުމަކީ ހަސަންގެ ވިސްނުން.
މި ވަގުތު، ހަސަން، ދުބާއީ އެންބީއޭ ސްކޫލުގައި ހުރީ ހަ މަސް ދުވަހުގެ ކޮންޓްރެކްޓެއްގަ އެވެ. އެ ކޮންޓްރެކްޓް އިތުރުކުރުމުގެ ފުރުސަތު ވެސް އޭނާ އަށް އެބައޮތެވެ. އެކަމަކު، އޭނާގެ ވިސްނުން މި ވަގުތު ހުރީ މި ހަ މަސްދުވަހު ގިނަ ކަންތައްތަކެއް ދަސްކޮށް އޭގެ ފައިދާ ދިވެހި ބާސްކެޓްބޯޅަ އަށް ފޯރުކޮށްދޭށެވެ.
އެންބީއޭ ސްކޫލުގެ އެކި އުމުރުފުރާގެ ޓީމްތަކަށް ހަސަން އިރުޝާދުދޭނެ އެވެ. އެ ގޮތުން ކޮންމެ ދުވަހެއްގައި ވެސް ކަނޑައެޅިފައިވާ ކަރިކިއުލަމްއާ އެއްގޮތަށް ތިއަރީ ކްލާސްތަކާއި، ތަމްރީންތައް ކުރިއަށްގެންދާނެ އެވެ.
އެންބީއޭ ސްކޫލުގެ ތަމްރީން ޕްރޮގްރާމާ ގުޅޭގޮތުން އޭނާ ބުނީ އެންމެ ބޮޑަށް ފާހަގަވަނީ ހުރިހާ ކަމެއްވެސް ހަރުދަނާ އުސޫލެއްގެ ތެރެއިން ރޭވިގެން ދިޔުން ކަމަށެވެ. މިއީ ރާއްޖޭގައި ނުފެންނަ މަންޒަރެއް ކަމަށާއި، ކޮންމެ ކުޅިވަރެއްގައިވެސް މި ގޮތަށް ކަންކަން ކުރުން މުހިންމު ކަމަށް އޭނާ ބުންޏެވެ.
"އަސްލު ވަރަށް ލޯ ހުޅުވިއްޖެ މިވީ ކުޑަ ދުވަސްކޮޅުގެ ތެރޭގައިވެސް. މި ކޮޅުގައި ހުރިހާ ކަމެއް ވެސް ވަރަށް އޯގަނައިޒް، ވަކި ސްޓްރަކްޗާ އަކަށް ހުރިހާ ކަމެއް ދަނީ. މީޓިންތަކާ، ޓްރެއިނިން ބްރީފިންއާ ކަންކަން ވެސް ހިމެނޭނެ ކޮންމެ ދުވަހަކު ވެސް. ކޯޗުން ވެސް އެހެން މީހުން ވެސް ހުރިހާ ކަމަކަށް ވަރަށް ތައްޔާރުވެގެން ޓްރެއިނިން އަށް ނިކުންނަނީ" މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ އެހީތެރިކަމާ އެކު އެމެރިކާގައި އޮތް ކޯޗިންގެ ކޯހެއް ވެސް ފުރިހަމަކުރި ހަސަން ބުންޏެވެ.
މެޗެއްގެ ތެރެއިން ހަސަން ކުޅުންތެރިންނަށް ބުނެދެނީ: ރާއްޖޭ ހުރިހާ ކުޅިވަރެއްގައި ޖުމްލަކޮށް މި ހިމެނޭ ކޯޗިން އޮފިޝަލުންގެ ތެރެއިން އެންމެ އުންމީދީ ކޯޗުންގެ ތެރޭގައި ހަސަން ހިމެނޭ.
ހަސަންގެ އުއްމީދަކީ އެންބީއޭ ސްކޫލުގައި އޭނާ އަށް ލިބޭ ތަޖުރިބާގެ އެހީގައި ރާއްޖޭގައި ބާސްކެޓްބޯޅަ ކުރިއެރުވުމަށް ރަނގަޅު ޕްލޭނެއްގެ ތައްޔާރުކުރެވި ޖޫނިއާ ޕްރޮގްރާމްތައް ހަރުދަނާ ކުރުމެވެ. އެ ކަމަށް، އޭނާގެ އެހީތެރިކަން ކުރިއެކޭ އެއްގޮތަށް ލިބޭނެ ކަމަށް ވެސް ހަސަން ބުންޏެވެ.
ދުބާއީގައި ހުރެ ފޯނުން ވާހަކަދައްކަމުން ހަސަން ބުނީ މިވަގުތު އެންމެ ދެރަވާ ކަމަކީ މިހާރު ކުރިއަށްދާ ޖޫނިއާ ޗެމްޕިއަންޝިޕްގައި ބައިވެރިވާން މާލޭގައި ނުހުރެވުމެވެ. އޭނާގެ އިރުޝާދުގެ ދަށުން ޖޫނިއާ ޓީމްތަކުގައި ކުޅުނު ގިނަ ކުދިން މި މުބާރާތުގައި ވާދަކޮށް ދައްކަމުން އަންނަ ކުޅުން ހަސަން ފާހަގަކުރަނީ އުފަލާއެކުގަ އެވެ.
"ހުރިހާ ކުދިންނަށް ގުޑްލަކް ބުނެލަން ބޭނުން ހަސަންގެ ފަރާތުން ހުރިހާ ކުދިންނަށް. އެންމެން މަތިންވެސް ވަރަށް ހަނދާންވޭ. ހުރިހާ ކުދިންވެސް އެންމެ ބެސްޓް ޕާފޯމް ކުރާނެކަމަށް އުއްމީދަ ކުރަން" ހަސަން ބުންޏެވެ.
