ސްރީލަންކާގައި ހިނގި ނުރައްކާތެރި މަގުމަތީގެ އެކްސިޑެންޓެއްގައި ހަތް މީހުން މަރުވެ ގިނަ އަދަދެއްގެ ބަޔަކަށް އަނިޔާވެއްޖެ އެވެ.
ހުކުރު ދުވަހު އެކްސިޑެންޓު ހިނގީ ފަރުބަދަ މަތީ ނޫރަލިޔާގެ ނާނުއޮޔާ މަގުގައި ބަހަކާއި، ޓުކްޓުކެއް އަދި ވޭނެއް ޖެހިގެންނެވެ.
އެކްސިޑެންޓުވި ބަހުގައި ތިބީ ކޮލޮމްބޯގެ ތާސްޓަން ކޮލެޖުން ތައުލީމީ ޓުއާއެއްގައި ނޫރަލިޔާއަށް ދިޔަ ދަރިވަރުންނެވެ. އެކްސިޑެންޓުވީ އެނބުރި ކޮލޮމްބޯއަށް ދިޔަ މަގުމަތީގަ އެވެ.
ހުކުރު ދުވަހުގެ ރޭ ފުލުހުން ބުނީ ހަތް މީހުން މަރުވެފައިވާ ކަމަށާއި މީހުން ސަލާމަތް ކުރުމުގެ އޮޕަރޭޝަން އަދިވެސް ކުރިއަށްދާ ކަމަށެވެ.
ރިޕޯޓުތައް ބުނާ ގޮތުން އެކްސިޑެންޓު ހިނގީ ބަހުގެ ކޮންޓްރޯލް ނެއްޓިގެން ގޮސް ޓުކްޓުކާއި ވޭނުގައި ޖެހިގެންނެވެ. އޭގެ ފަހުން ފަރުބަދަ މަތީގެ މަގުން ފުރޮޅާލައި ބަސް ވެއްޓުނީ އެވެ.
މަރުވި މީހުންގެ ތެރޭގައި ޓުކްޓުކް ޑްރައިވަރާއި ވޭނުގައި ތިބި ހަ ޕަސެންޖަރުން ހިމެނެ އެވެ. ބަހުގައި ދަތުރު ކުރަމުން ދިޔައީ 41 ދަރިވަރުންނެވެ.
ފުލުހުން ބުނީ އެ ހުރިހާ ދަރިވަރުން ވެސް ހޮސްޕިޓަލުގައި އެޑްމިޓުކޮށްފައިވާ ކަމަށެވެ. އެކަމަކު އެއްވެސް ކުއްޖަކަށް ސީރިއަސް ޒަހަމެއް ލިބިފައެއް ނުވެ އެވެ.
