ފާއިތުވި ހަތަރު އަހަރު ރައްޔިތުންގެ މަޖިލީހުގެ ތެރެއިން އެމްޑީޕީގެ ބައެއް މެމްބަރުން އިދިކޮޅު ޕާޓީން ދީފައި ނުވާ މިންވަރަށް މި ސަރުކާރަށް ގެއްލުން ދީފައިވާ ކަމަށް ޔޫތު މިނިސްޓަރު އަހްމަދު މަހްލޫފު ވިދާޅުވެއްޖެ އެވެ.
އެމްޑީޕީގެ ޕާލިމެންޓަރީ ގްރޫޕުގެ ތެރޭގައި ފެށުނީއްސުރެ ހިޔާލުތަފާތުވުންތަކެއް އޮތެވެ. އެ ހިޔާލު ތަފާތުވުންތަކުގެ ތެރެއިން އުފެދުނު މައްސަލަތަކުގެ ތެރެއިން ޕީޖީ ގްރޫޕު އޮތީ ދެ ފެކްޝަނަކަށް ބެހިފަ އެވެ. އެއީ، ރައީސް ސޯލިހަށް ތާއީދުކުރައްވާ މެމްބަރުންނާއި މަޖިލިސް ރައީސް މުހައްމަދު ނަޝީދަށް ތާއިދުކުރައްވާ މެމްބަރުންގެ ފެކްޝަންތަކެވެ. ދޭތެރެ ދޭތެރެއިން ސަރުކާރަށް މަޖިލީހުގެ ތެރެއިން ފިއްތުންތައް ކުރިމަތިކުރުވާ ކަމަށް އެމްޑީޕީގެ ބައެއް ވަޒީރުންނާއި މަޖިލިސް މެމްބަރުން ގެންދެވީ ވިދާޅުވަމުންނެވެ.
ގިނަ އަދަދެއްގެ ސަޕޯޓަރުންނާ އެކު މިރޭ އާޓިފިޝަލް ބީޗުގައި ބޭއްވި ރައީސް އިބްރާހިމް މުހައްމަދު ސޯލިހުގެ ކެމްޕޭން ރެލީގައި އެ މަނިކުފާނުގެ ކެބިނެޓުގައި އިންނަވާ މަހްލޫފް ވަނީ އެކަމާ ގުޅިގެން ވާހަކަ ދައްކަވާފަ އެވެ.
"މި ސަރުކާރުގެ އިތުބާރު ގެއްލުވާލުމަށް އިންތިހާއަށް މަސައްކަތްކޮށްފި. މި ސަރުކާރުން ކުރިއަށް ގެންދާ އެތައް ހާސް ޕްރޮޖެކްޓަކީ ބިލާހެއް ކަމަށް ހެދުމަށް މަސައްކަތްކޮށްފިި،" ކުރިން ރައްޔިތުންގެ މަޖިލީހުގެ މެމްބަރުކަން ވެސް ކުރެއްވި މަހުލޫފު ވިދާޅުވި އެވެ.
ރައީސް ސޯލިހާއި އެމަނިކުފާނުގެ ސަރުކާރާ ދެމެދު ބައެއް ބޭފުޅުންގެ އޮތް މައްސަލައަކީ ވަކި ބޭފުޅަކު ބޭނުންވާ ގޮތަށް "ޕަޕެޓެއްގެ" ގޮތުގައި ވެރިކަން ނުކުރުން ކަމަށް އެމްޑީޕީގެ މެދު އުތުރު ޕްރޮވިންސްގެ ރައީސްކަން ވެސް ކުރައްވާ މަހްލޫފް ވިދާޅުވި އެވެ.
"މައްސަލައަކީ ތިމާ އެންމެ ބޭނުންވާ މީހާ މިވަގުތު ވެރިކަމުގައި ނެތުން. މައްސަލައަކީ ރާއްޖޭގެ ކުޑަ ރަށެއްގެ ރައްޔިތަކު ރާއްޖޭގެ ވެރިކަން ކުރާތީ. ހަމައެކަނި މާލެ މީހުން ކުރަން އޮތް އެއްޗެއް ނޫނޭ ވެރިކަމަކީ. މައްސަލައަކީ ވަކި ބޭފުޅަކު ބޭނުންވާ ގޮތަށް މަގާމުތަކަށް މީހުން އައްޔަނު ނުކުރުން،" މަހްލޫފް ވިދާޅުވި އެވެ.
ނަޝީދު ވަނީ 2018 ގެ އިންތިހާބުގައި ރައީސް ސޯލިހަށް ވެރިކަން ހޯދައިދިނީ އެމަނިކުފާނު ކަމަށް ވިދާޅުވެފަ އެވެ. އަދި، ރައީސް ސޯލިހަށް އެ ފަހަރު ވެރިކަމަށް އާދެވުނީ ހުރިހާ ސިޔާސީ ލީޑަރުން ޖަލުގައި ތިއްބެވުމުން ކަމަށް ނަޝީދު ވިދާޅުވެފައިވެ އެވެ.
"މައްސަލައަކީ ވެރިކަން ރައީސް ސޯލިހަށް ދެއްވީ ވެސް ތިމަންނާ އެކަނި ކަމާއި ވެރިކަމުން ބާލާނީ ވެސް ތިމަންނާ އެކަނި ކަމަށް ގަބޫލުކުރާ ގަބޫލުކުރުން،" ނަޝީދުގެ މީގެކުރިން ދައްކަވާފައިވާ ބައެއް ވާހަކަފުޅުތަކަށް މަހްލޫފް ރައްދު ދެއްވި އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީއަކީ ސިޔާސީ ޕާޓީއަކުން ބާއްވާ އެންމެ މުހިންމު އެތެރޭގެ އިންތިހާބެވެ. ރައީސްކަން ކުރިން ކުރެއްވި ބޭފުޅަކާއި މިހާރުގެ ރައީސުލްޖުމްހޫރިއްޔާ ވާދަ ކުރައްވާ އިންތިހާބުގައި އެމްޑީޕީގެ 57،000 އަށް ވުރެ ގިނަ މެމްބަރުންނަށް ވޯޓު ލެވޭނެ އެވެ.
