ރިޔާދު، ސައުދީ އަރަބިއްޔާ (ޖެނުއަރީ 20) - ކްރިސްޓިއާނޯ ރޮނާލްޑޯ ހިމެނުނު ރިޔާދު ސީޒަން ޓީމު އަތުން ފްރާންސްގެ ޗެމްޕިއަން ޕީއެސްޖީ 5-4 އިން މޮޅުވެ، ރިޔާދު ސީޒަން ކަޕް ކާމިޔާބުކޮށްފި އެވެ.
ކިންގް ފަހުދު އިންޓަނޭޝަނަލް ސްޓޭޑިއަމްގައި މިރޭ ކުޅުނު މެޗުގެ ބޮޑުބައި ޕީއެސްޖީން ކުޅެފައިވަނީ އެއް ކުޅުންތެރިއަކު މަދުކޮށެވެ. އެއީ 39 ވަނަ މިނިޓްގައި ޕީއެސްޖީގެ ފުލްބެކް، ހުއާން ބެނާޓަށް ސީދާ ރަތް ކާޑު ދެއްކުމުންނެވެ.
ރިޔާދު ސީޒަން ޓީމުގެ ކެޕްޓަންކަން ކޮށްފައިވަނީ، ދާދި ފަހުން ދުނިޔޭގެ ރެކޯޑް ޑީލެއްގައި ސައުދީގެ އަލް ނަސްރަށް ބަދަލުވި ރޮނާލްޑޯ އެވެ. މިއީ ރޮނާލްޑޯ ސައުދީ ލީގަށް ބަދަލުވި ފަހުން ކުޅުނު ފުރަތަމަ މެޗެވެ. މި މެޗަށް ރިޔާދު ސީޒަން ޓީމު ނެގީ، ސައުދީގެ ގަދަ ދެ ބާރު، އަލް ހިލާލް އާއި އަލް ނަސްރު އެއްކޮށްލައިގެންނެވެ. މި މެޗު، ހާއްސަވެފައި އޮތީ ރޮނާލްޑޯ އާއި ޕީއެސްޖީގެ ތަރި، މެސީގެ ކުރިމަތިލުމެއްގެ ގޮތުގަ އެވެ.
ރިޔާދު ސީޒަން ޓީމުގެ ގޯލަށް މެސީ ބޯޅަ ފޮނުވާލަނީ: މެސީ ވަނީ މި މެޗުގެ ފުރަތަމަ ގޯލު ޖަހާފައި.
މެޗުގައި ޕީއެސްޖީން ލީޑުނެގީ ނޭމާ ދިން ބޯޅައަކުން މެސީ އޭރިއާތެރެއަށް ވަދެ ޖެހި ގޯލުންނެވެ. ރިޔާދު ސީޒަން ޓީމުން އެއްވަރުކުރީ މެޗުގެ 34 ވަނަ މިނިޓްގައި، ރޮނާލްޑޯ ޖެހި ގޯލުންނެވެ. މިއީ ރޮނާލްޑޯ އަށް، ޕީއެސްޖީގެ ގޯލުގައި ހުރި ކޮސްޓަ ރިކާގެ ގޯލްކީޕަރު، ކޭލޯ ނަވާސް ކުރި ފައުލަކަށް ދިން ޕެނަލްޓީއެކެވެ. ރޮނާލްޑޯ ވަނީ ހަމަޖެހިލައިފައި ގޯލަށް ބޯޅަ ވައްދާލައިފަ އެވެ.
ޕީއެސްޖީން މެޗުގެ 43 ވަނަ މިނިޓްގައި އެ ޓީމުގެ ކެޕްޓަން މާކީނިއޯސް އޭރިއާތެރެއިން ލިބުނު ފުރުސަތަކުން ޖެހި ގޯލުން އަލުން ލީޑުނެގި އެވެ. ފުރަތަމަ ހާފުގެ އިތުރު ވަގުތުގެ ތިން ވަނަ މިނިޓްގައި، ޕީއެސްޖީގެ ނޭމާ އަށް ކުރި ފައުލަކަށް ދިން ޕެނަލްޓީ އަކުން އޭނާ ފޮނުވާލި ބޯޅަ އަމާޒުވީ ރިޔާދު ސީޒަން ޓީމުގެ ކީޕަރު، މުހައްމަދު އުވައިސް ވަނީ މަތަކޮށްފަ އެވެ.
ލީޑުފުޅާކުރަން ޕީއެސްޖީ އަށް ލިބުނު ފުރުސަތު ނަގާލުމުގެ ނަތީޖާ އަކަށްވީ، ރިޔާދު ސީޒަން ޓީމުން ފުރަތަމަ ހާފު ނިމުމުގެ ކުރިން ނަތީޖާ ހަމަހަމަކުރުމެވެ. އެ ގޮތުން، ރިޔާދު ސީޒަން ޓީމަށް ދެ ވަނަ ފަހަރަށް، އެއްވަރުކޮށްދިނީ ވެސް ރޮނާލްޑޯ އެވެ. ރޮނާލްޑޯ ބޮލުން ޖެހި ބޯޅަ ދަނޑީގައި ޖެހިފައި ނުކުތް ވަގުތު، ދެ ވަނަ ފަހަރު ލިބުމުން ރޮނާލްޑޯ ވަނީ ގޯލަށް ވައްދާލައިފަ އެވެ.
މެޗުގެ 60 މިނިޓްގައި ކުޅުނު ރޮނާލްޑޯ ވަނީ އެ ޓީމަށް ދެ ލަނޑު ޖަހައިދީ ސަޕޯޓަރުން ހޮވި މެޗުގެ މޮޅު ކުޅުންތެރިޔާގެ މަގާމަށް ހޮވިފައި.
ދެ ވަނަ ހާފްގެ ކުޅުން ފެށިގެން ނުވަ މިނިޓް ތެރޭ، މެޗުގެ 54 ވަނަ މިނިޓްގައި، ޕީއެސްޖީގެ ކީލިއަން އެމްބާޕޭ ހުސްކޮށްލާފައި ދިން ބޯޅަ ސާޖިއޯ ރާމޯސް ވަނީ ގޯލަށް ވައްދާލައިފަ އެވެ. އޭގެ ދެ މިނިޓް ފަހުން، ރިޔާދު ސީޒަން ޓީމަށް މެޗުގައި ތިން ވަނަ ފަހަރަށް އެއްވަރުކޮށްދިނީ ޑިފެންޑަރު ހިޔުން ސޫ ޖަންގްއެވެ. ކޯނަރެއްގައި ޕީއެސްޖީ އޭރިއާތެރެއިން ސޫ ޖަންގް ވަނީ ބޮލުން ގޯލަށް ބޯޅަ ފޮނުވާލައިފަ އެވެ.
ޕީއެސްޖީން މެޗުގެ 60 ވަނަ މިނިޓްގައި އަލުން ލީޑުނެގީ ޕެނަލްޓީ އަކުން އެމްބާޕޭ ޖެހި ގޯލުންނެވެ. މިއީ މެސީ ފޮނުވާލި ހަމަލާއެއް ރިޔާދު ސީޒަން ޓީމުގެ އަލީ ބޫލާހީ އަތުގައި ޖެހުމުން ރެފްރީ ދިން ޕެނަލްޓީ އެކެވެ. މި ގޯލަށް ފަހު، ޕީއެސްޖީން ވަނީ އެއް ފަހަރައި ގިނަ ބަދަލުތަކެއް ގެނެސްފަ އެވެ. މެސީ، އެމްބާޕޭ، ނޭމާ ބަދަލުކުރި އެވެ. އަނެއްކޮޅުން، ރިޔާދު ސީޒަން ޓީމުން ވަނީ ރޮނާލްޑޯ ވެސް ބަދަލުކޮށްފަ އެެވެ.
މެޗުގެ 78 ވަނަ މިނިޓްގައި، ޕީއެސްޖީން ވަނީ ކައުންޓަ އެޓޭކުގައި ހޫގޯ އެކިޓިކޭ ޖެހި ގޯލުން ލީޑުފުޅާކޮށްފަ އެވެ. މެޗުގެ އިތުރު ވަގުތުގައި ރިޔާދު ސީޒަން ޓީމަށް އެ ޓީމުގެ ބްރެޒިލް ކުޅުންތެރިޔާ، އެންޑަސަން ޓަލިސްކާ ވަނީ އޭރިއާބޭރުން ގޯލެއް ޖަހައިދީ އުންމީދެއް ހޯދައިދީފަ އެވެ. އެކަމަކު، އިތުރު ގޯލެއް ޖަހައި، މެޗު އެއްވަރުކުރަން ވަގުތު ނުލިބި ބަލިވީ އެވެ.
ސައުދީ އަރަބިއްޔާގެ ސަރުކާރުން 2019 ވަނަ އަހަރުން ފެށިގެން، ކޮންމެ އަހަރެއްގެ އޮކްޓޫބަރުން ފެށިގެން މާޗު މަހާ ދެމެދު އެ ގައުމުގެ ޓޫރިޒަމާ ގުޅިފައި އޮންނަ، ކުޅިވަރު ފެސްޓިވަލް ޕްރޮމޯޓް ކުރުމުގެ ގޮތުން “ރިޔާދު ސީޒަން” ގެ ނަމުގައި ގިނަ ކަންކަަން ރާވަނީ އެ ގައުމު އިޝްތިހާރު ކުުރުމުގެ މަގުސަދުގަ އެވެ. މި ފަހަރުގެ ރިޔާދު ސީޒަންގެ އެންމެ ބޮޑު ހަރަކާތެއްގެ ގޮތުގައި ރޭވީ މިރޭގެ މި މެޗެވެ.
