ރައީސް އިބްރާހިމް މުހައްމަދު ސޯލިހް، އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ކެންޑިޑޭޓަށް ވުމާއެކު ރައީސްގެ މަގާމުން ދުރުވާން ޖެހޭނެ ކަމަށް އެ ޕްރައިމަރީގައި އެމަނިކުފާނާ ދެކޮޅަށް ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރިޔާސީ ޕްރައިމަރީގެ ކެމްޕޭނަށް ގދ. ހޯނޑެއްދުއަށް ވަޑައިގެން އެމްޑީޕީގެ ރައީސްކަން ވެސް ކުރައްވާ ނަޝީދު ވިދާޅުވީ، އުތުރުގެ ރަށްރަށުން ރައީސް ސޯލިހަށް ތާއީދު ނެތް ކަން މިހާރު ސާފުވާނެ ކަމަށެވެ. ނަޝީދު އިޝާރާތް ކުރެއްވީ ކުޅުދުއްފުއްޓާއި އިހަވަންދުއާއި ދިއްދުއަށް ރައީސް ސޯލިހު ވަޑައިގަތުމުން ލިބުނު ފިނި ތަރުހީބަށެެވެ.
"އަޅުގަނޑުމެން މި ދަތުރު ކުރަނީ މި ޕްރައިމަރީ މޮޅުވުމުގެ ފަހު ބުރަށް، ހުވަދޫ ނިންމާފައި އައްޑޫއަށް ދާން މި އޮތީ، މިއާއެކީ އެ ބޭފުޅުންނަށް (ރައީސް ސޯލިހުގެ ޓީމަށް) ސާފުވާނެ މި ކަން ވާން ނެތްކަން،" އެމްޑީޕީގެ ފުރަތަމަ ސަރުކާރުގެ ރައީސަކަށް ހުންނެވި ނަޝީދު ވިދާޅުވި އެވެ.
ނަޝީދު ދެން ގޮވާލެއްވީ ސަރުކާރުގެ ވަޒީރުންނާއި، މިނިސްޓްރީތަކުގެ ނައިބުންނާއި، ކުންފުނިތަކުގެ މެނޭޖިން ޑިރެކްޓަރުންނާއި، ސިޔާސީ މަގާމުތަކުގައި ތިބި އެމްޑީޕީގެ މެންބަރުން އެމަނިކުފާނާ ގުޅިވަޑައިގަތުމަށެވެ.
ހުވަދު އަތޮޅުގެ ރަށްރަށް ކުރައްވަމުން ގެންދަވާ ކެމްޕޭން ދަތުރުފުޅުގައި ނަޝީދުގެ އަރިހުގައި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވެސް ބައިވެރިވެވަޑައިގަތެވެ. މިއީ ނަޝީދުގެ ކެމްޕެއިނު ފެއްޓެވި ފަހުން، ކެމްޕެއިނު ހަރަކާތެއްގައި އަމްރު ބައިވެރިވެވަޑައިގަތް ފުރަތަމަ ފަހަރެވެ.
"ރައީސުލްޖުމްހޫރިއްޔާ ކެންޑިޑޭޓަކަށްވާ ހިސާބުން ރައީސުލްޖުމްހޫރިއްޔާކަން އެ ވަގުތަށް ދެން ދޫކޮށްލައްވަން. ހަމަހަމަކަމާ އެކީގައި އަޅުގަނޑާ ވާދުކުރައްވައި ރިވެތި ގޮތުގައި އެ ކަން ކުރަން ޖެހޭނީ،" ރައީސް ސޯލިހު ވެސް ދެން ނަޝީދާ ގުޅިވަޑައިގަތުމަށް ގޮވާލައްވައި ނަޝީދު ވިދާޅުވި އެވެ.
ޖެނުއަރީ 28 ގައި އޮންނަ އެމްޑީޕީގެ ރިޔާސީ ޕްރައިމަރީގައި 57،000 މީހުންނަށް ވޯޓު ދެވެ އެވެ. އެ ޕްރައިމަރީގައި ވާދަކުރައްވާ ނަޝީދަކީ 2008 އަދި 2013 ގައި ވެސް އެމްޑީޕީގެ ރިޔާސީ ކެންޑިޑޭޓެވެ.
އަދި، 2018 ވަނަ އަހަރު ވެސް އެމްޑީޕީގެ ރިޔާސީ ކެންޑިޑޭޓެއްގެ ގޮތުގައި ޕްރައިމަރީން ނިންމީ ނަޝީދެވެ. ނަމަވެސް އޭރު އެމަނިކުފާނަށް އިއްވާފައިވާ ޖަލު ހުކުމުގެ ސަބަބުން އިންތިހާބުގައި ވާދަނުކުރެވޭތީ، އެމްޑީޕީގެ ކޮންގްރެސް މެދުވެރިކޮށް ރައީސް ސޯލިހަށް ޓިކެޓު ދިނުމަށް ނިންމީ އެވެ.
