ކޮމިއުނިސްޓް ވެރިކަމެއް އޮންނަ ވިއެޓްނާމްގެ ރައީސް ނުޔެން ޝުއާން ފުކް އިސްތިއުފާ ދެއްވައިފި އެވެ.
މީގެ ކުރިން ދެ ޑެޕިއުޓީ ބޮޑު ވަޒީރުން އިސްތިއުފާ ދެއްވާފައިވާ އިރު، ރައީސް އިސްތިއުފާ ދެއްވަން އުޅޭކަމުގެ އަޑުތައް އޮތީ ފެތުރިފަ އެވެ.
ކުރިން ބޮޑު ވަޒީރުކަން ކުރެއްވި ފުކް ރައީސްކަމަށް ވަޑައިގެންނެވީ 2021 ވަނަ އަހަރު އެވެ. އިސްތިއުފާ ދެއްވި އިރު، ކޮރަޕްޝަަނާ ދެކޮޅަށް ގިނަ އޮޕަރޭޝަންތަކެއް ދަނީ ހިންގަމުންނެވެ.
ކޮމިއުނިސްޓް ޕާޓީގެ އެތައް ސަތޭކަ މެމްބަރުންނާ ގުޅުން ހުރި ކޮރަޕްޝަން މައްސަލަތައް ބަލަމުންދާ ކަމަށް ރިޕޯޓުތައް ބުނެ އެވެ.
ރައީސް އިސްތިއުފާ ދެއްވުމުން، މަޖިލިސް ކުރާގެ ނޭޝަނަލް އެސެމްބްލީއިން އެކަމާ މެދު ގޮތެއް ނިންމަން ޖެހޭނެ އެވެ. ބުދަ ދުވަހު މަޖިލީހުގެ ބައްދަލުވުމެއް އޮންނާނެ އެވެ.
ކޮމިއުނިސްޓް ޕާޓީއިން ނެރުނު ބަޔާނެއްގައި ފުކްގެ ލީޑާޝިޕަށް ތައުރީފު ކުރި އެވެ. އެކަމަކު ސަރުކާރުގެ އޮފިޝަލުން ގަވާއިދާ ހިލާފަށް ހިންގި ކަންކަމަށް ސިޔާސީ ގޮތުން ޒިންމާވާން ޖެހޭނީ އެމަނިކުފާނު ކަމަށް ބުންޏެވެ.
މި މަހު އިސްތިއުފާ ދެއްވި ދެ ޑެޕިއުޓީ ބޮޑު ވަޒީރުންނާއި އޭގެ ކުރިން އިސްތިއުފާ ދެއްވި ދެ މިނިސްޓަރުން އަދި ގިނަ އޮފިޝަލުންނާ ދެކޮޅަށް ޖިނާއީ ދައުވާ ވަނީ އުފުލައިފަ އެވެ.
އުމުރުން 69 އަހަރުގެ ފުކް ބޮޑު ވަޒީރުކަން ކުރެއްވީ 2016 އިން އެޕްރީލް 2021 އަށެވެ. އޭގެ ފަހުން ރައީސްކަމަށް އިންތިހާބުވެވަޑައިގެންނެވި އެވެ.
ވިއެޓްމާމްގެ ވެރިކަމުގައި އޮންނަނީ ބާރުގަދަ ހަތަރު މަގާމެވެ. އޭގެ އެއް ބާރަކީ ރައީސެވެ. ދެން އޮންނަނީ ބޮޑު ވަޒީރުކަމާއި ނޭޝަނަލް އެސެމެބްލީގެ ޗެއާމަންކަމާއި ކޮމިއުނިސްޓް ޕާޓީގެ ސެކެޓްރީ ޖެނެރަލް ކަމެވެ. އޭގެ ތެރެއިން އެންމެ ބާރުގަދަ މަގާމަކީ ޕާޓީގެ ސެކެޓްރީ ޖެނެރަލް ކަމެވެ.
ކޮރަޕްޝަނާ ދެކޮޅު އޮޕަރޭޝަންތައް ފެއްޓެވީ މިހާރު ޕާޓީގެ ސެކެޓްރީ ޖެނެރަަލްގެ މަގާމުގައި ހުންނެވި ނުޔެން ފޫ ޓްރޯންގް އެވެ.
ކޮމިއުނިސްޓް ޕާޓީން ބުނާ ގޮތުގައި 2022 ވަނަ އަހަރު އެކަނިވެސް ކޮރަޕްޝަނާއި "ގަސްދުގައި ގަވާއިދު ހިލާފުވެގެން" ޕާޓީގެ 539 މެމްބަރުންނާ މެދު "އިސްލާހީ ފިޔަވަޅު" އެޅި އެވެ. އޭގެ ތެރޭގައި މިނިސްޓަރުންނާއި އިސް އޮފިޝަލުންނާއި ޑިޕްލޮމެޓުން ހިމެނެ އެވެ.
އޭގެ އިތުރުން 2022 ވަނަ އަހަރު ފުލުހުން ވެސް 453 ކޮރަޕްޝަން މައްސަލަ ބެލި އެވެ. އެއީ 2021 އަށް ވުރެ 50 ޕަސެންޓް އިތުރެވެ.
