އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޅ. އަތޮޅަށް ކުރައްވަމުން ގެންދަވާ ދަތުރުފުޅުގައި، މަޝްހޫރު ވިޔަފާވެރިޔާ ޗަމްޕާ މުހައްމަދު (އުއްޗު) ގެ އަރިހަށް ޒިޔާރަތެއް ކުރައްވައިފި އެވެ.
އުއްޗު އާންމުކޮށް ދިރިއުޅުއްވާ ކުރެއްދޫ ރިސޯޓަށް ނަޝީދު ވަޑައިގަތީ މިއަދު ހަވީރެވެ. އުއްޗުއާ އެކު ހަވީރު ސައިފޮދެއް ވެސް ބައްލަވައިގަތެވެ. އަދި, އުއްޗުއާ ގުޅޭ ގޮތުން މެލޭޝިއާ ޔުނިވާސިޓީގެ ޕްރޮފެސަރަކު ލިޔުއްވާފައިވާ ފޮތެއް ވެސް ނަޝީދަށް އެރުވި އެވެ.
ޖެނުއަރީ 28 ގައި އޮންނަ ރިޔާސީ ޕްރައިމަރީ ކައިރިވަމުން އަންނައިރު، ނަޝީދު އުއްޗުއާ ބައްދަލުކުރެއްވުމުން ރިޔާސީ އިންތިހާބާ ގުޅޭ ގޮތުން މަޝްވަރާ ކުރައްވާނެ ކަމަށް ވަރަށް ބޮޑަށް ބެލެވެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ ނަޝީދުގެ އިތުރުން ރައީސް އިބްރާހީމް މުހައްމަދު ސޯލިހެވެ. އެ ޕްރައިމަރީގައި 57،000 އެއްހާ މީހުނަށް ވޯޓު ދެވެ އެވެ.
އެ ޕްރައިމަރީގައި ވާދަކުރައްވާ ނަޝީދަކީ 2008 އަދި 2013 ގައި ވެސް އެމްޑީޕީގެ ރިޔާސީ ކެންޑިޑޭޓެވެ. 2018 ވަނަ އަހަރުގެ ރިޔާސީ ކެންޑިޑޭޓަކީ ރައީސް ސޯލިހެވެ.
2018 ގައި ވެސް އެމްޑީޕީ ޕްރައިމަރީން ޓިކެޓު ދިނީ ނަޝީދަށެވެ. އެކަމަކު އޭރު ނަޝީދަށް އިއްވާފައިވާ ޖަލު ހުކުމުގެ ސަބަބުން ވާދަނުކުރެވޭތީ، އެމްޑީޕީ ކޮންގްރެސް މެދުވެރިކޮށް ސޯލިހަށް ޓިކެޓު ދިނުމަށް ނިންމީ އެވެ.
ރިޔާސީ ޕްރައިމަރީގައި ނަޝީދާއި ރައީސް ސޯލިހު ވާދަކުރައްވާއިރު، ޕާޓީ ވަނީ އެ ދެ ފެކްޝަނަށް ބެހިފަ އެވެ. އަދި, ދެ ފެކްޝަނަށް ނިސްބަތްވާ މެންބަރުންނާއި ސަޕޯޓަރުން ވެސް ގެންދަނީ އެކަކު އަނެކަކަށް ބަހުގެ ހަމަލާތައް ދެމުންނެވެ.
