ލަންޑަން (ޖެނުއަރީ 17) - ފްރާންސްގެ ޕީއެސްޖީ އަށް ކުޅެމުންދިޔަ ސްޕެއިންގެ ވިންގް، ޕަބްލޯ ސަރާބިއާ އިނގިރޭސި ޕްރިމިއާ ލީގުގެ ވުލްވްސް އަށް ވިއްކާލުމަށް ދެ ކްލަބުގައި މެދުގައި އެއްބަސްވުމަކަށް އާދެވިއްޖެ އެވެ.
މީޑިއާ ރިޕޯޓްތަކުން ބުނާގޮތުގައި ސްޕެއިންގެ ގައުމީ ޓީމަށް ވެސް ކުޅެމުންދާ ސަރާބިއާ ،30، ވުލްވްސް އަށް ބަދަލުވާނީ 4.4 މިލިއަން ޕައުންޑްގެ ޓްރާންސްފާ ފީއެއްގަ އެވެ. އަދި ވުލްވްސްގެ މެޑިކަލްތައް މިއަދު ފުރިހަމަކޮށް، އެ ކްލަބާއެކު ދެ އަހަރާއި ބައިގެ އެއްބަސްވުމެއްވައި މިއަދު ސަރާބިއާ ސޮއިކުރާނެ ކަމަށެވެ.
ސްޕެއިންގެ ސެވިއްޔާ އިން 2019 ވަނަ އަހަރު ޕީއެސްޖީ އަށަ ބަދަލުވި ސަރާބިއާ ވަނީ ފްރާންސް ލީގުގައި އެ ކްލަބަށް ކުޅުނު 35 މެޗުން 11 ލަނޑު ޖަހައިފަ އެވެ. މިދިޔަ އަހަރު ސަރާބިއާ ވަނީ ލޯނު އުސޫލުގެ ދަށުން ޕޯޗުގަލްގެ ސްޕޯޓިން ލިސްބަން އަށް ކުޅެފައެވެ.
ސަރާބިއާ އަކީ ވުލްވްސްގެ ކޯޗު ސްޕެއިންގެ ހޫލެން ލޮޕެޓެގީ ވަރަށް ރަނގަޅަށް ދަންނަ ކުޅުންތެރިއެކެވެ. ސްޕެއިން ޔޫތު ޓީމުތަކުގައި ސަރާބިއާ ވަނީ ލޮޕަޓޭގީގެ އިރުޝާދުގެ ދަށުން ކުޅެފަ އެވެ. އަދި ސެވިއްޔާގައި ވެސް ކުޑަ ދުވަސްކޮޅަކު، ލޮޕެޓެގީ އާއި ސަރަބިއާ އެއްކޮށް މަސައްކަތްކުރިއެވެ.
މިއީ ރެލިގޭޝަނުން ސަލާމަތްވުމަށް މަސައްކަތް ކުރަމުންދާ ވުލްވްސް އިން ޖެނުއަރީގެ ޓްރާންސްފާގައި ގެނައި ތިން ވަނަ ކުޅުންތެރިޔާއެވެ. އެ ކްލަބުން ވަނީ މީގެ ކުރިން އެތުލެޓިކޯ މެޑްރިޑަށް ކުޅެމުންދިޔަ ބްރެޒިލްގެ ފޯވަޑް މަތެއަސް ކުންޔާ އާއި ނީސް އަށް ކުޅެމުންދިޔަ ގެބޮންގެ މިޑްފީލްޑަރު މާރިއޯ ލެމީނާ އެ ކްލަބަށް ގެނެސްފަ އެވެ.
