ހުސްވި އަހަރު އޭލްވެލް އިމްތިހާނު ފުރިހަމަ ކުރި ދަރިވަރުންނަށް ހާއްސަކޮށްގެން ހުރި ފުރުސަތުތަކާ ބެހޭ މައުލޫމާތު ފޯރުކޮށްދިނުމާއި އެޕްލިކޭޝަން ފުރުމުގައި އެހީތެރިކަން ފޯރުކޮށްދޭ ސަޕޯޓު ޑެސްކެއް މާލޭގައި ހުންނަ ވިލާ ކޮލެޖުގެ ކިއުއައި ކެމްޕަހުގައި ބަހައްޓައިފި އެވެ.
ވިލާ ކޮލެޖުން ބުނީ މި ހަފުތާގެ ކޮންމެ ދުވަހަކު ވެސް ހަވީރު 3:00 އިން 5:00 އާ ދެމެދު އެ ޑެސްކުން އެހީތެރިކަން ފޯރުކޮށްދޭނެ ކަމަށާއި އެތަނަށް ޒިޔާރަތް ކުރާ ހުރިހާ ކުދިންނަށް ވެސް ވިލާ ކޮލެޖުގައި ހުރި ފުރުސަތުތަކާ ގުޅޭގޮތުން މައުލޫމާތު ފޯރުކޮށްދިނުމުގެ އިތުރުން އެޕްލިކޭޝަން ފޯމުވެސް ވަގުތުން ފުރާލެވޭނެ ކަމަށެވެ.
"ހަމައެކަނި ބޭނުންވާނީ އޭލެވެލްގެ ނަތީޖާއާއި އައިޑީކާޑު، މި ފެށޭ އިންޓޭކަށް އެޕްލިކޭޝަން ހުށަހެޅުމުގެ ފުރުސަތު އެ ޑެސްކުން ލިބޭނެ،" ވިލާ ކޮލެޖުގެ އޮފިޝަލަކު ބުންޏެވެ.
މިއަހަރުގެ ފުރަތަމަ އިންޓޭކުގައި ތަފާތު ދާއިރާތަކުން ސެޓިފިކެޓު ލެވެލް އެކަކުން ފެށިގެން މާސްޓާސް ޑިގުރީއާ ހަމައަށް ކިޔެވޭ ޖުމްލަ 139 ކޯހެއްގައި ބައިވެރިވުމުގެ ފުރުސަތު މިމަހުގެ 31 ވަނަ ދުވަހާ ހަމައަށް އެ ކޮލެޖުން ވަނީ ހުޅުވާލަފަ އެވެ.
ޖެނުއަރީ އިންޓޭކުގައި ފެށުމަށް ހަމަޖެހިފައިވާ ކޯސްތަކުގެ ތެރޭގައި މާސްޓާސް ފެންވަރުގެ 16 ކޯހަކާއި، ޕޯސްޓު ގުރެޖުއޭޓު ޑިޕްލޮމާ/ސެޓިފިކެޓު ފެންވަރުގެ ނުވަ ކޯހަކާއި، ޑިގުރީ ފެންވަރުގެ 38 ކޯހަކާއި، ޑިޕްލޮމާ ފެންވަރުގެ 29 ކޯހަކާއި ފައުންޑޭޝަން ފެންވަރުގެ 17 ކޯހަކާއި އަދި ސެޓިފިކެޓު ތިނެއް ފެންވަރުގެ 16 ކޯހަކާއި ސެޓިފިކެޓު ލެވެލް ދޭއްގެ އެއް ކޯސް ހިމެނެ އެވެ.
ހަމަ އެއާއެކު އޭސީސީއޭގެ ނޮލެޖު ލެވެލްއާއި، ސްކިލް ލެވެލް އަދި ޕްރޮފެޝަނަލް ލެވެލްގެ އިތުރުން، އޭސީސީއޭ ކިޔަވާ ދަރިވަރުންނަށް ހާއްސަ، އޭސީސީއޭ އެކްސެލެރޭޓު އަދި އިނގިރޭސިވިލާތުގެ އޮކްސްފޯޑް ބްރުކްސް ޔުނިވަރސިޓީގެ ބީއެސްސީ (އޮނާސް) އިން އެޕްލައިޑް އެކައުންޓިން ކޯހުގައި ބައިވެރިވުމަށް އެދި ހުށަހެޅުމުގެ ފުރުސަތު ވެސް ވިލާ ކޮލެޖުން ވަނީ ހުޅުވާލާފަ އެވެ.
އޭގެއިތުރުން ޗާޓަޑް އިންސްޓިޓިއުޓު އޮފް މެނޭޖްމަންޓު އެކައުންޓެންޓްސް (ސީމާ) ގެ ސެޓްފިކެޓް ލެވެލްއާއި، އޮޕްރޭޝަންސް ލެވެލްއާއި، މެނޭޖްމަންޓް ލެވެލް އަދި ސްޓްރެޓިޖިކް ލެވެލްގެ އިތުރުން ސެޓިފައިޑް އެކައުންޓިން ޓެކްނިޝަންގެ (ކެޓް) ލެވެލް އެކެއް، ދޭއް އަދި ތިނެއްގެ ކޯސްތަކަށް ވެސް މި އިންޓޭކުގައި ކުރިމަތިލުމުގެ ފުރުސަތު އެ ކޮލެޖުން ވަނީ ހުޅުވާލާފަ އެވެ.
މި އަހަރަށް ހުޅުވާލި ކޯސްތަކުގެ ތެރޭގައި އޮންލައިންކޮށްނާއި ކިލާހަށް ހާޒިރުވެގެން ކިޔެވޭ ކޯސްތައް ހިމެނޭ ކަމަށް ވިލާ ކޮލެޖުން ބުނެ އެވެ.
އަހަރުގެ ފުރަތަމަ އިންޓޭކުގައި ހުޅުވާލެވުނު ކޯސްތަކުގެ ތެރޭގައި ވިލާ ކޮލެޖުގެ އަމިއްލަ ކޯސްތަކާއި އިނގިރޭސިވިލާތުގެ މަޝްހޫރު ޔުނިވާސިޓީ، ޔުނިވާސިޓީ އޮފް ދަ ވެސްޓް އޮފް އިންގްލެންޑްގެ މާސްޓާސް އަދި ފުރަތަމަ ޑިގުރީގެ ކޯސްތައް ހިމެނެ އެވެ.
އެ ކޯސްތަކަކީ އެ ދާއިރާތަކުގެ އެންމެ ފުންނާބު އުސް މާހިރުންގެ އިތުރުން، އެކި ސިނާއަތްތައް ގަބޫލުކުރާ މިންގަނޑުތަކަށް ފެތޭ، ދަރިވަރުން ވަޒީފާގެ މައިދާނަށް އެންމެ ފުރިހަމައަށް ތައްޔާރުކޮށްދެވޭނެ ގޮތަށް ފަރުމާ ކުރެވިގެން ހިންގާ ކޯސްތަކެއް ކަމަށް ވިލާ ކޮލެޖުން ބުނެ އެވެ.
ވިލާ ކޮލެޖުގެ މާލޭގައި ހުންނަ ކިއުއައި ކެމްޕަހުގެ އިތުރުން ވިލާ ކޮލެޖުގެ ނައިފަރު ކެމްޕަހާއި، ލ. ގަމު ކެމްޕަހާއި، މަހިބަދޫ ކެމްޕަހާއި ވިލާ ކޮލެޖުގެ ހިތަދޫ ކެމްޕަހާއި ކުޅުދުއްފުށީ ކެމްޕަހުގައި ވެސް އަންނަ އަހަރުގެ ޖެނުއަރީގައި ކޯސްތައް ފެށުމަށް ވަނީ ހަމަޖެހިފަ އެވެ.
ވިލާ ކޮލެޖުގެ ދަރިވަރުންނަށް ފީ ދެއްކުމުގައި ލުއި ފަސޭހަ ގޮތްތަކެއް ހޯދައި ދިނުމުގެ މަގުސަދުގައި ދަރިވަރުންނަށް މަހުން މަހަށް ބަހާލައިގެން ފީ ދެއްކޭނެ ގޮތް ވެސް އެ ކޮލެޖުން ވަނީ އިންތިޒާމުކޮށްފަ އެވެ.
މީގެ އިތުރުން ސަރުކާރުން ހަމަޖައްސާފައިވާ ފުރަތަމަ ޑިގުރީއަށް ހިލޭ ކިޔެވުމުގެ ސްކީމްގެ ދަށުން ވިލާ ކޮލެޖުގެ ހުރިހާ ބެޗްލާސް ޑިގުރީ ޕްރޮގްރާމްތަކަށް ކިޔެވޭނެ ކަމަށް އެ ކޮލެޖުން ބުނެ އެވެ.
