ޕެރިސް (ޖެނުއަރީ 16) - ފްރެންޗް ލީގުގައި ރޭ ރެން އަތުން 1-0 އިން ޕީއެސްޖީ ބަލިވިއިރު، އެ ޓީމުގެ މި ވަގުތުގެ ހާލަތާ މެދު ކަންބޮޑުވާންޖެހޭ ކަންތައްތަކެއް އެބަހުރި ކަމަށް ކޯޗު ކްރިސްޓޮފް ގަލްޓިއޭ ބުނެފި އެވެ.
ރޭގެ މެޗުން ޕީއެސްޖީ ބަލިވިއިރު، އެ ޓީމު މި ވަނީ އެންމެ ފަހުން ރަށުންބޭރުގައި ކުޅުނު ދެ މެޗުން ވެސް ބަލިވެފަ އެެވެ. މިއީ މިދިޔަ އަހަރު މާޗްގެ ފަހުން، ޕީއެސްޖީ ރަށުންބޭރުގައި ޖެހިޖެހިިގެން ދެ މެޗުން ބަލިވި ފުރަތަމަ ފަހަރެެވެ.
ރޭގެ ނަތީޖާއާ އެކު ޕީއެސްޖީ، ފްރެންޗް ލީގުގެ އެއް ވަނައިގައި އޮތީ ތިން ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 19 މެޗުން 47 ޕޮއިންޓް ލިބިފައިވާއިރު، ދެ ވަނައިގައި އޮތް ލޯންސް އަށް ވަނީ 19 މެޗުން 44 ޕޮއިންޓް ލިބިފަ އެވެ.
ސީޒަން ފަށައިގެން ފުރަތަމަ 23 މެޗުން ބަލިނުވެ އޮތް ޕީއެސްޖީ މިހާރު މި ވަނީ ގާތްގާތުގައި ދެ މެޗުން ބަލިވެފަ އެވެ. ޕީއެސްޖީގެ ކޯޗު ގަލްޓިއޭ ބުނީ ރަނގަޅަށް ނުކުޅެވޭ އެންމެ ބޮޑު ސަބަބަކީ ވޯލްޑް ކަޕަށް ފަހު މުޅި ޓީމު އެކުގައި ބޭނުންވާ ލެވަލަށް ފަރިތަކުރުންތައް ކުރިއަށް ނުގެންދެވުން ކަމަށެވެ.
"އަށް ހަފްތާ ވަންދެން މި ސްކޮޑުގައި ތިބި އެކި ކުޅުންތެރިން އެކި ތަންތަނުގައި ގައުމީ ޓީމާއި ޗުއްޓީ އާއި އެކި ދިމަދިމާލުގައި އުޅެފައި އެ އައީ. އަހަރެމެންނަށް މި ހަފްތާގައި ހުރިހާ ކުޅުންތެރިން ހިމަނައިގެން ކުރެވުނީ އެންމެ ދެ ޕްރެކްޓިސް، އެހެންވީމަ، ކުރިން އޮތް ފޯމަށް ދާން އެކުގައި ޕްރެކްޓިސްތަކެއް ކުރެެވިގެން ރަނގަޅުވާނީ،" ޓީމުގެ ފޯމާ ބެހޭގޮތުން ކުރި ސުވާލަށް ގަލްޓިއޭ ބުންޏެވެ.
ރެން ދަނޑުގައި ރޭ ކުޅުނު މެޗަށް ޕީއެސްޖީން ނުކުތީ ނޭމާ އާއި ލިއޮނަލް މެސީ ފުރަތަމަ އެގާރައިގައި ހިމަނައިގެންނެވެ. ކުރި ޗުއްޓީ އަކަށް ފަހު އެނބުރި އައީ ކީލިއަން އެމްބާޕޭ މެޗު ފެށީ ބެންޗުންނެވެ. ފަހުން އެމްބާޕޭ ކުޅެން އެރި ނަމަވެސް މި މެޗުގައި ޕީއެސްޖީ ޓީމުގައި ހިމެނޭ ތިން ތަރިންގެ ފަރާތުން ވެސް މާ އެދެވޭ ކުޅުމެއް ނުފެނުނެވެ.
މި މެޗުގައި ފެނިގެންދިޔަ ހަމައެކަނި ގޯލު، ރެން އަށް ކާމިޔާބުކޮށްދިނީ 65 ވަނަ މިނިޓްގައި އެ ޓީމުގެ ކެޕްޓަން ހަމާރީ ޓްރައޯރޭ އެވެ. ރެންގެ އެޑްރިއަން ޓްރަފާޓް އޭރިއާތެރެއިން ހުސްކޮށްލާފައި، ޓްރައޯރޭ އަށް ދިން ބޯޅަ އޭނާ ވަނީ ގޯލުގެ ދުރު ކަނަށް ފޮނުވާލައިފަ އެވެ.
ޕީއެސްޖީ އަށް އެއްވަރުކޮށްދޭން އެމްބާޕޭ އަށް ލިބުނު ހުސް ފުރުސަތުން ޖެހި ބޯޅަ ދިޔައީ ހުރަސްދަނޑިމަތިންނެވެ.
