ލާމަރުކަޒީ ގާނޫނު ތަންފީޒުނުކުރެވޭ ކަމަށް ވިދާޅުވެ އެމްޑީޕީގެ ޕްރައިމަރީގައި ވާދަކުރައްވާ އެ ޕާޓީގެ ރައީސް މުހައްމަދު ނަޝީދު ސަރުކާރަށް ފާޑުވިދާޅުވެއްޖެ އެވެ.
އެމްޑީޕީ ޕްރައިމަރީގެ ކެމްޕޭނުގެ ތެރެއިން ތ. ވިލިފުއްޓަށް ރޭ ވަޑައިގެން ވާހަކަދައްކަވަމުން ނަޝީދު ވިދާޅުވީ ލާމަރުކަޒީ ނިޒާމު ގާއިމުކުރެވިފައިވީ ނަމަވެސް އެކި ބޭނުންތަކަށް މާލެ ދިއުމަށް އަދިވެސް ކުޑަނަމަވެސް ބަދަލެއް ނާންނަ ކަމަށެވެ. ނަޝީދު ވިދާޅުވީ ލާމަރުކަޒީ ނިޒާމުގެ ފުރިހަމަ ބޭނުން ސަރުކާރަށް ނުކުރެވޭ ކަމަށެވެ.
"ލާމަރުކަޒީ ނިޒާމު އަޅުގަނޑުމެންނަށް ގާއިމުކުރެވިއްޖެ. އެހެން ނަމަވެސް ކައުންސިލްތަކުން ވަފުދު ހަދާފައި މާލެ ދިއުން މަދެއް ނުވޭ. ރައްރަށުގެ ކުދިން މާލޭ މަދަރުސާތަކަށް ވައްދާ މިންވަރު މަދެއް ނުވޭ. ބޭސްފަރުވާއަށް މާލެ އަންނަ މިންވަރު މަދެއް ނުވޭ. މި ނިޒާމުގެ ފުރިހަމަ ބޭނުން އަަޅުގަނޑުމެންނަށް މިއޮތީ ނުކުރެވި،" ނަޝީދު ވިދާޅުވި އެވެ.
ވިލިފުށީގެ ގެތަކަށް ޒިޔާރަތްކޮށްލުމަށް ފަހު ނަޝީދުގެ ތަޖުރިބާ ހިއްސާކުރައްވަމުން ވިދާޅުވީ ފާހަގަކުރެވުނީ ވިލިފުށީގެ އާބާދީ އިންތިހާ ދަރަޖައަށް މަދުވެފައިވާ ކަމަށާއި، ރަށުގައި 15 އަހަރުތެރޭގައި ލިބުނު އާމުދަނީ އިތުރުވި އުޅެނީ މަދު ބައެއް ކަމަށެވެ.
އަދި ރައްޔިތުންް ތިބީ އިންތިހާއަށް ތަރައްގީގެ އެކި ކަންކަމަށް ފެންބޮވައިގަނެފައި ކަމަށް ނަޝީދު ވިދާޅުވި އެވެ.
"މިއަދު ހަވީރު އަޅުގަނޑު ވިލިފުއްޓަށް އައުމުން އަޅުގަނޑަށް ފާހަގަވީ ވިލިފުށީގެ މާޔޫސްކަން. ވިލިފުށީ ރައްްޔިތުން އިންތިހާއަށް މާޔޫސްކަންމަތީ މިތިބީ. މި ރަށުގެ ރައްޔިތުންނަށް ސަރުކާރުން ވައުދުވެފައިވާކަންކަން ސަރުކާރުން ކޮށްދެމުން ނުދާކަމަށް ތަކުރާރުކޮށް ރައްޔިތުން އެބަ ވިދާޅުވޭ،" ނަޝީދު ވިދާޅުވި އެވެ.
