މެންޗެސްޓާ (ޖެނުއަރީ 14) - އިނގިރޭސި ޕްރިމިއާ ލީގުގައި މިރޭ ކުޅުނު މެޗުން މެންޗެސްޓާ ސިޓީ އަތުން ފަހަތުން އަރައި 2-1 އިން މޮޅުވެ، މެންޗެސްޓާ ޔުނައިޓެޑް ލީގު ތާވަލުގެ ތިން ވަނަ އަށް ޖެހިލައިފި އެވެ.
ޔުނައިޓެޑް ލީގުގެ ތިން ވަނަ އަށް ޖެހިލިއިރު، ދެ ވަނައިގައި އޮތް ސިޓީއާ ދެމެދު އޮތީ ޕޮއިންޓެއްގެ ތަފާތެވެ. އެއް ވަނައިގައި އޮތް އާސެނަލަށް 17 މެޗުން 44 ޕޮއިންޓް ލިބިފައިވާއިރު، ދެ ވަނައިގައި ސިޓީ އޮތީ 18 މެޗުން 39 ޕޮއިންޓެވެ. ތިން ވަނައިގައި ޔުނައިޓެޑް އޮތީ 18 މެޗުން 38 ޕޮއިންޓާ އެކު އެވެ. ހަތަރެއްގައި އޮތް ނިއުކާސަލް ޔުނައިޓެޑަށް 18 މެޗުން ވަނީ 35 ޕޮއިންޓް ލިބިފަ އެވެ.
އޯލްޑް ޓްރެފޯޑް ސްޓޭޑިއަމްގައި މިރޭ ކުޅުނު މެޗުގެ ފުރަތަމަ ހާފުގައި ޔުނައިޓެޑްގެ މާކަސް ރަޝްފޯޑަށް ގޯލު ޖަހަން ލިބުނު ދެ ފުރުސަތެއްގެ ބޭނުން ނުހިފުނެވެ. އެ ގޮތުން ރަޝްފޯޑްގެ އެއް ހަމަލާ، ސިޓީގެ ގޯލްކީޕަރު އެޑަސަން މޮރާއެސް މަތަކުރިއިރު، އަނެއް ބޯޅަ ގޯލާ ދިމާލަށް ދަނިކޮށް ސިޓީގެ ޑިފެންޑަރު މެނުއަލް އަކަންޖީ ވަނީ ބްލޮކްކޮށްފަ އެވެ.
ފުރަތަމަ ހާފަށް ވުރެ ރަނގަޅަށް ސިޓީން ދެ ވަނަ ހާފު ފަށައިގެން ކުޅުނުއިރު، އެ ޓީމުން ވަނީ މެޗުގެ 60 ވަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ ބަދަލަކަށް ކުޅެން އެރި ޖެކް ގްރީލިޝް އެވެ. މިއީ އޭރިއާތެރެއިން ސިޓީގެ ކެވިން ޑިބްރޭނާ ނެގި ހުރަަހަކަށް ހުސްކޮށް އަރައި، ގްރީލިޝް ބޮލުން ޖެހި ގޯލެކެވެ.
ޔުނައިޓެޑުން އެއްވަރުކުރީ މެޗުގެ 78 ވަނަ މިނިޓްގައި ބްރޫނޯ ފެނާންޑޭސް ޖެހި ގޯލަކުންނެވެ. މެދުތެރެއިން ޔުނައިޓެޑްގެ ކަސެމީރޯ ކުރިއަށް ޖައްސާލި ބޯޅައަށް ޔުނައިޓެޑްގެ ފޯވާޑް މާކަސް ރަޝްފޯޑް ވެސް ދުވުނެވެ. އެކަމަކު، އެ ބޯޅަ ގޯލަށް ފޮނުވާލީ ފެނާންޑޭސް އެވެ. އެންމެ ފުރަތަމަ ލައިންސްމަން ވަނީ އޮފްސައިޑް ކަމަށް ދިދަ ނަގައިފަ އެވެ. އެކަމަކު، އޮފްސައިޑްގައި ހުރި ރަޝްފޯޑް ބޯޅައިގައި ފައި ނުޖައްސާތީ، އެ ގޮތަށް ބަލައި، ރެފްރީ ނިންމީ ގޯލު ބަލައިގަންނާށެވެ.
މެޗުގެ 82 ވަނަ މިނިޓްގައި ޔުނައިޓެޑް މޮޅުކޮށްދިން ލަނޑު ޖެހީ ފަހަކަށް އައިސް ރަނގަޅު ފޯމެއްގައި ހުރި ރަޝްފޯޑް އެވެ. މިއީ އޭރިއާތެރެއިން ޔުނައިޓެޑްގެ ޒުވާން ތަރި، އަލެހަންދްރޯ ގާނާޗޯ ނެގި ހުރަހަކަށް ހުސްކޮށް އަރައި، ރަޝްފޯޑް ޖެހި ގޯލެކެވެ. ރަޝްފޯޑް ވަނީ އެންމެ ފަހުން ޔުނައިޓެޑް ކުޅުނު ހަތް މެޗުގައި ވެސް ގޯލު ޖަހައިފަ އެެވެ. އެންމެ ފަހުން، ޔުނައިޓެޑަށް ކުޅެމުން ޖެހިޖެހިގެން ހަތް މެޗުގައި ލަނޑު ޖެހީ 2009 ވަނަ އަހަރު ކްރިސްޓިއާނޯ ރޮނާލްޑޯ އެވެ.
މިއީ 2021 ވަނަ އަހަރުގެ އޭޕްރީލް މަހުގެ ފަހުން ލީގުގައި ޔުނައިޓެޑް ޖެހިޖެހިގެން ފަސް މެޗުން މޮޅުވި ފުރަތަމަ ފަހަރެވެ. މިއީ ސިޓީގެ ކޯޗު ޕެޕް ގާޑިއޯލާގެ ކޯޗިން ކެރިއަރުގައި އޭނާ އިރުޝާދުދިން 500 ވަނަ މެޗެވެ. ސިޓީ މި ވަނީ އެންމެ ފަހުން ކުޅުނު ދެ މެޗުން ވެސް ބަލިވެފަ އެވެ.
