ނަސާރާއިން ފާހަގަކުރާ އީސްޓާއާ ދިމާކޮށް 2019 ވަނަ އަހަރު ސްރީލަންކާގައި ދިން ހަމަލާތަކުގެ ޝިކާރައަކަށްވީ މީހުންނަށް ބަދަލުގެ ގޮތުގައި 100 މިލިއަން ރުޕީޒް ދެއްކުމަށް އެ ގައުމުގެ ކުރީގެ ރައީސް މައިތްރިޕާލާ ސިރިސޭނާއަށް އަންގަވައިފި އެވެ.
ލަންކާގެ ސުޕްރީމް ކޯޓުން ބުރާސްފަތި ދުވަހު އަމުރު ކުރީ ސިރިސޭނާ ހިމެނޭ ގޮތަށް ކުރީ ސަރުކާރުގެ ގިނަ އޮފިޝަލުންތަކެއް ފައިސާގެ ބަދަލު އަދާކުރުމަށެވެ.
ސުޕްރީމް ކޯޓުން އެގޮތަށް އަމުރު ކުރީ އީސްޓާ ހަމަލާތައް ދޭން އުޅޭކަމުގެ ޖާސޫސީ މައުލޫމާތު ކުރީ ބައިގައި ލިބުނު ނަމަވެސް، ހަމަލާތައް ހުއްޓުވުމުގައި ފެއިލްވެފައި އޮތުމުން، ކޯޓަށް ހުށަހެޅި މައްސަލައެއްގެ ހުކުމް އިއްވަމުންނެވެ.
ކޯޓުން ސިރިސޭނާއަށް އެންގެވީ 100 މިލިއަން ރުޕީޒް (273,313 އެމެރިކާ ޑޮލަރު) ދެއްކުމަށެވެ. އޭގެ އިތުރުން ކުރީގެ ޑިފެންސް ސެކެޓްރީ ހެމާސިރީ ފެނަންޑޯއަށް އެންގެވީ 50 މިލިއަން ރުޕީޒް (136،656 ޑޮލަރު) ދެއްކުމަށެވެ.
އޭގެ އިތުރުން ކުރީގެ ސްޓޭޓް އިންޓެލިޖެންސް ސާވިސް ޑިރެކްޓަރު ނިލާންތަ ޖަޔަވަރްދެނަ އާއި ކުރީގެ އިންސްޕެކްޓާ ޖެނެރަލް އޮފް ޕޮލިސް ޕުޖިތު ޖާޔަސުންދަރަ 75 މިލިއަން ރުޕީޒް (204،984 ޑޮލަަރު) ދައްކަން އެންގި އެވެ.
ކުރީގެ ނޭޝަނަލް އިންޓެލިޖެންސް ވެރިޔާ ސިސިރަ މެންދިސްއަށް އެންގީ 10 މިލިއަން ރުޕީޒް (27،331 ޑޮލަރު) ބަދަލުގެ ގޮތުގައި ދެއްކުމަށެވެ.
އެ މީހުންނާ ދެކޮޅަށް 12 ޕެޓިޝަން ހުށަހެޅީ ސްރީލަންކާގެ ބާ އެސޯސިއޭޝަނާއި، ހަމަލާގެ ޝިކާރައަކަށްވީ މީހުންގެ އާއިލާތަކާއި، ކެތޮލިކް ފާދިރީންނާއި އިތުރު ބަޔަކު ގުޅިގެންނެވެ.
ދެހާސް ނަވާރަ ވަނަ އަހަރުގެ އެޕްރީލް 21 ވަނަ ދުވަހު ބޮން ގޮއްވީ ވެރިރަށް ކޮލޮމްބޯގެ ތިން ފައްޅިއަކާއި ތިން ލަގްޒަަރީ ހޮޓަލެއްގަ އެވެ. އެ ހަމަލާގައި 290 މީހުން މަރުވި އެވެ.
އޭޕްރިލް މަހު ބަޔަކު ހަމަލާތަކެއް ދޭން އުޅޭ ކަމަށް ބުނެ، އިންޑިއާގެ ޖާސޫސީ އެޖެންސީއިން ސްރީލަންކާއަށް އިންޒާރު ދިނެވެ. އެހެން ނަމަވެސް، އެ އިންޒާރަށް މާ ބޮޑު ފަރުވާލެއް ނުދެ އެވެ.
