ޕެރިސް (ޖެނުއަރީ 12) - ފްރާންސް ލީގުގައި ރޭ އެންޖާސް އަތުން 2-0 އިން ޕީއެސްޖީ މޮޅުވިއިރު، ޕީއެސްޖީގެ ތަރި ލިއޮނެލް މެސީ ލަނޑު ޖަހައިފި އެވެ.
މިއީ އާޖެންޓީނާ އަށް ވޯލްޑް ކަޕް ކާމިޔާބު ކޮށްދިނުމަށް ފަހު، އެނބުރި އައިސް، މެސީ ޕީއެސްޖީ އަށް ކުޅުނު ފުރަތަމަ މެޗެވެ.
ގަތަރުގައި އޮތް ފީފާ ވޯލްޑް ކަޕަށް ނެގި ބްރޭކަށް ފަހު ޕީއެސްޖީން ކުޅުނު ތިން މެޗުގައި އެ ކްލަބުން ވަނީ މެސީ އަށް ރެސްޓް ދީފަ އެވެ. ވޯލްޑް ކަޕްގެ ބްރޭކަށް ފަހު މެސީ ޕީއެސްޖީގެ ފަރިތަކުރުންތަކުގައި ބައިވެރިވާން ފެށީ މީގެ ހަފުތާއެއްހާ ދުވަސް ކުރިންނެވެ.
ފްރާންސް ލީގުގެ ފުލުގައި އޮތް އެންޖާސްއާ ދެކޮޅަށް ރޭ ޕީއެސްޖީން ނެރުނު ފުރަތަމަ 11 ގައި މެސީ ހިމެނުނެވެ. ސަސްޕެންޝަނާ އަނިޔާގެ މައްސަލައަކާ ގުޅިގެން ދެ މެޗު ގެއްލުމަށް ފަހު، ބްރެޒިލްގެ ތަރި ނޭމާ ވެސް ވަނީ ރޭ ޕީއެސްޖީގެ ފުރަތަމަ 11ގައި ކުޅެފަ އެވެ.
އެކަމަކު، ރޭގެ މެޗުގައި ވެސް ފްރާންސްގެ ތަރި ކިލިއަން އެމްބާޕޭ އަށް ޕީއެސްޖީން ވަނީ ރެސްޓް ދީފައެވެ. ފްރާންސް ލީގުގައި އާދިއްތަ ދުވަހު ރެންއާ ދެކޮޅަށް ޕީއެސްޖީ ކުޅޭ މެޗުގައި އެމްބާޕޭ ފެންނާނެ ކަމަށް ބެލެވެ އެވެ.
ރޭގެ މެޗުގެ ކުރީކޮޅު ޕީއެސްޖީ އަށް ލީޑު ހޯދައިދިނީ ޒުވާން ފޯވަޑް ހޫގޯ އެކިޓީކޭ އެވެ. ޕީއެސްޖީގެ ދެ ވަނަ ލަނޑު މެސީ ޖެހީ މެޗުގެ 72 ވަނަ މިނިޓުގަ އެވެ.
މި މެޗުން މޮޅުވެ، ތާވަލްގެ އެއް ވަނައިގައި އޮތް ޕީއެސްޖީ ވަނީ ހަ ޕޮއިންޓްގެ ލީޑެއް ނަގައިފަ އެވެ.
މެޗަށް ފަހު ޕީއެސްޖީގެ ކޯޗު ކްރިސްޓޮފް ގަލްޓީއޭ ބުނީ މެސީއާ އެކު ޕީއެސްޖީގެ ޓީމު ތަފާތު ކަމަށެވެ. އަދި ވޯލްޑް ކަޕްގެ ބްރޭކަށް ފަހު ޓީމު އެކުލަވާލުމަށް ވަގުތު ކޮޅެއް ނަގާނެ ކަމަށެވެ.
"މެސީއާއެކު ޓީމު ފެންނަނީ ތަފާތުކޮށް. މެސީ ހުރީ (ވޯލްޑް ކަޕަށް ފަހު) ވެސް ވަރަށް ފިޓުކޮށް،" ގަލްޓިއޭ ބުންޏެވެ. "ބްރޭކަށް ފަހު އަދި ވަގުތު ކޮޅެއް ނަގާނެ ޓީމު އެކުލަވާލަން. މި މެޗުގައި ވެސް އެތަން ފެނުނު."
ރޭގެ މެޗަށް ޕީއެސްޖީ ޓީމު ނުކުތްއިރު، މިދިޔަ މަހުގެ 29 ވަނަ ދުވަހު މަރުވި، ބްރެޒިލްގެ ފުޓްބޯޅަ ލެޖެންޑް، ޕެލޭގެ ހަނދާން އާ ކުރުމުގެ ގޮތުން ވަނީ ޕެލޭގެ ފޮޓޯ ޖެހި ހާއްސަ ޓީޝާޓެއް ބޭނުންކޮށްފަ އެވެ.
