އިންޑިއާގެ ކަރްނާޓަކާ ސްޓޭޓުގެ އެއާޕޯޓެއްގެ ރަންވޭގައި ތިބި 50 އަށް ވުރެ ގިނަ ޕަސެންޖަރު ނުލައި ގޯ ފަސްޓްގެ ފްލައިޓެއް ފުރި މައްސަލަ އެ ގައުމުގެ އޭވިއޭޝަން ރެގިއުލޭޓަރުން ބަލަން ފަށައިފި އެވެ.
ގޯ ފަސްޓަކީ ކުރީގެ ގޯ އެއާލައިނެވެ. އެ އެއާލައިންގެ ފްލައިޓެއް ބެންގަލޫރުން ފުރީ 50 އަށް ވުރެ ގިނަ ޕަސެންޖަަރުން ރަންވޭ މަތީގައި ބަހުގައި މަޑުކޮށްގެން ތިއްބަ އެވެ.
ރިޕޯޓުތައް ބުނާ ގޮތުން ޕަސެންޖަރުން ތިބީ ޗެކްއިންވުމަށް ފަހު ފްލައިޓަށް އަރަން ބޯޑިން ޕާސް ވެސް ނަގައިގެންނެވެ. ގޯ ފަސްޓުން ބުނީ އެ ހާދިސާ ބަލަމުންދާ ކަމަށެވެ.
އެކަމާ ގުޅިގެން ޕަސެންޖަރުން ހިތްހަމަނުޖެހި ޓްވިޓާގައި ޝުއޫރު ފާޅުކުރަން ފެށުމުން، ގޯ ފަސްޓުން މައާފަށް އެދުނެވެ. އެކަމަކު އެ ހާދިސާ ހިނގަން މެދުވެރިވި ސަބަބު އަދިވެސް ހާމައެއް ނުކުރެ އެވެ.
އޭއެންއައި ނޫހުން ބުނީ ނުފުރި ތިބި 53 ޕަސެންޖަރުންނަށް އެހެން އެއާލައިނެއްގެ ފްލައިޓުގައި ނިއު ދިއްލީއަށް ދަތުރު ކުރުމަށް ފުރުސަތު ފަހިކޮށްދިން ކަމަށާއި ދެ ޕަސެންޖަރުން ހޯދީ ރީފަންޑް ކަމަށެވެ.
ފަހަކަށް އައިސް އިންޑިއާގެ އެއާލައިންތަކާ ގުޅުން ހުރި މައްސަލަތައް ދަނީ ފެންމަތިވަމުންނެވެ. އެގޮތުން ރައްކާތެރިކަމާ ގުޅުން ހުރި ކަންކަމާއި ފްލައިޓްގެ ކްރޫއިންގެ އިހުމާލާ ގުޅޭ މައްސަލަތައް ހިމެނެ އެވެ.
މިދިޔަ ހަފުތާގައި އެއާ އިންޑިއާގެ ފްލައިޓެއްގައި މަސްތުވެފައި ހުރި ފިރިހެނަކު އުމުރުން ދުވަސްވީ އަންހެނެއްގެ ގަޔަށް ކުޑަކަމުދިޔަ މައްސަލަ ވެސް ޖެހުނެވެ.
އެކަމުގެ ތުހުމަތު ކުރެވޭ މީހާ ހައްޔަރުކޮށްފައިވާ އިރު، ފްލައިޓްގެ ޕައިލެޓާއި ކެބިން ކްރޫ އަމަލުކުރި ގޮތުގައި އިހުމާލު ހިމެނޭ ކަމަށް ބެލެވޭތީ އެ މީހުންނާ މެދު ވެސް ވަނީ ފިޔަވަޅު އަޅައިފަ އެވެ.
