ޕެރިސް (10 ޖެނުއަރީ) - ލިއޮނެލް މެސީ ކުޅޭ ފްރާންސްގެ ޕީއެސްޖީ އާއި ކްރިސްޓިއާނޯ ރޮނާލްޑޯ ދާދި ފަހުން ގުޅުނު ސައުދީ އަރަބިއްޔާ އަލް ނަސްރާއި އެ ގައުމުގެ އަލް ހިލާލުން ހޮވާލެވޭ ޓީމަކުން މި މަހުގެ 19 ވަނަ ދުވަހު ކުޅޭ އެކުވެރިކަމުގެ މެޗެއް ކުޅޭގޮތަށް ހަމަޖެހިއްޖެ އެވެ.
މި މަހުގެ 17 ވަނަ ދުވަހު ޕީއެސްޖީން ގަތަރަށް ކުރާ ދަތުރަށް ފަހު، ޕީއެސްޖީން މި މެޗު ކުޅުމަށް ސައޫދީ އަރަބިއްޔާގެ ވެރިރަށް ރިޔާދަށް ދަތުރުކުރާނެ އެވެ.
ރޮނާލްޑޯ، 37، އާއި މެސީ، 35، އަކީ ފާއިތުވި 15 ވަރަކަށް އަހަރުގެ ތެރޭގައި ފުޓްބޯޅައިގެ އެންމެ މަތީ ފަންތީގައި ވާދަވެރިކަން ބޮޑު ދެ ކުޅުންތެރިންނެވެ.
މި ވާދަވެރިކަން އެންމެ ބޮޑުވެގެން ދިޔައީ މި ދެ ކުޅުންތެރިން ވެސް ސްޕެއިންގައި ކުޅުނުއިރު އެވެ. ރެއާލް މެޑްރިޑަށް ރޮނާލްޑޯ ކުޅުނުއިރު، މެސީ ހުރީ ބާސެލޯނާގަ އެވެ. ފަހުން، ރޮނާލްޑޯ، ޔުވެންޓަސްގައި ހުރެ ވެސް މެސީގެ ބާސެލޯނާއާ ދެކޮޅަށް ވަނީ ކުޅެފަ އެވެ.
ބާސެލޯނާގެ މެސީ (ކ) ކައިރިން ޔުވެންޓަސްގެ ރޮނާލްޑޯ ބޯޅަ ހިފައިގެންދަނީ.
ރޮނާލްޑޯ އަށް ޖުމްލަ 400 މިލިއަން ޑޮލަރު ނަސްރުން ލިބޭނެ: ރިޕޯޓް
ޔޫރަޕްގެ ފުޓްބޯޅަ ދޫކޮށް ދާދި ފަހުން ރޮނާލްޑޯ އަލް ނަސްރަށް ބަދަލުވީ ދުނިޔޭގެ އެންމެ މުސާރަ ބޮޑު ކުޅުންތެރިޔާގެ ގޮތުގަ އެވެ. ރިޕޯޓްތަކުން ބުނާގޮތުގައި އަލް ނަސްރުން ރޮނާލްޑޯ އަށް އަހަރު 200 މިލިއަން ޔޫރޯ (200 މިލިއަން ޑޮލަރު) ދޭނެ އެެވެ.
ރޮނާލްޑޯ ނަސްރަށް ގެނައި އެއް ސަބަބަކީ، ސައުދީ އަރަބިއްޔާގެ ފުޓްބޯޅައިގެ ޕްރޮފައިލް ރަނގަޅު ކުރުމެވެ. ރިޕޯޓްތަކުން ބުނާގޮތުގައި ސައުދީ އަރަބިއްޔާ އިން ދަނީ 2030 ވަނަ އަހަރުގެ ވޯލްޑް ކަޕަށް ބިޑުކުރުމަށް ތައްޔާރު ވަމުންނެވެ. އެއީ މިސްރާއި ގްރީސްއާ ގުޅިގެން ކުރާ ޖޮއިންޓް ބިޑެކެވެ. އެ ބިޑް ލީޑުކުރަނީ ސައުދީ އަރަބިއްޔާ އިންނެވެ.
އެކަމަކު، ރިޕޯޓްތަކުން ބުނާގޮތުގައި، އަލް ނަސްރުން ދޭ މުސާރައިގެ އިތުރުން، ސައުދީގެ ވޯލްޑް ކަޕް ބިޑް ޕްރޮމޯޓް ކުރުމަށް ކުރާ މަސައްކަތުގައި ބައިވެރިވާތީ ރޮނާލްޑޯ އަށް އިތުުރު 200 މިލިއަން ޔޫރޯ (200 މިލިއަން ޑޮލަރު) ލިބޭނެ ކަމަށް، އިތުބާރު ހުރި ފަރާތަކުން އޭއެފްޕީ އަށް ވަނީ ކަށަވަރުކޮށްދީފަ އެވެ.
އެހެންވެއްޖެ ނަމަ، އަލް ނަސްރަށް ބަދަލުވި ޑީލްގެ ތެރެއިން ރޮނާލްޑޯ އަށް އަހަރަކު 400 މިލިއަން ޔޫރޯ (400 މިލިއަން ޑޮލަރު) ލިބޭނެެ އެވެ.
"ސައުދީ ވޯލްޑް ކަޕް 2030ގެ ބިޑުގެ އެމްބެސަޑެރެއްގެ ގޮތުން ރޮނާލްދޯ އަށް އިތުރު 200 މިލިއަން ޔޫރޯ (200 މިލިއަން ޑޮލަރު) ލިބޭނެ،" އެ ފަރާތުން ބުނެފައިވެ އެވެ.
