ރައީސް އިބްރާހިމް މުހައްމަދު ސޯލިހު ކުރައްވަމުން ގެންދަވާ ރިޔާސީ ޕްރައިމަރީގެ ކެމްޕޭން ދަތުރުފުޅުގައި އެމަނިކުފާނުގެ އަމިއްލުފުޅު ރަށަށް ރޭ ވަޑައިގެންނެވި އެވެ. އެހެން ރަށްތަކުގައި ބޭއްވެވި ބައްދަލުވުންތަކާއި, ޖަލްސާތައް މިރަށަކުން ފެނިގެނެއް ނުދިޔަ އެވެ. މުޅިން ވެސް ތަފާތު މަންޒަރެކެވެ.
ރައީސް ސޯލިހު ނިސްބަތްވެވަޑައިގަންނަވާ ޅ. ހިންނަވަރަށް ރޭ އިރާކޮޅު ވަޑައިގެންނެވުމުން ލިބިވަޑައިގެންނެވީ ދެގޮތެއް ނުވާ ހޫނު މަރުހަބާ އެކެވެ. ގާތްގަނޑަކަށް 5000 އެއްހާ މީހުންގެ އާބާދީގެ ތެރެއިން ރަށުގައި ދިރިއުޅެނީ 1500 އެއްހާ މީހުންނެވެ. އޭގެ ތެރެއިން ގިނަ އަދަދެއްގެ މީހުން ވަނީ ބަނދަރުމައްޗަށް ނިކުމެ ރައީސަށް ހޫނު މަރުހަބާއެއް ދަންނަވާފަ އެވެ.
ކެމްޕޭނު ޖަލްސާއެއް ނުބާއްވަވާ, އިންތިޒާމު ކުރެއްވި ބޮނޑިބަތާ އެކު އެމަނިކުފާނު ވަނީ އާއިލީ ބޭބޭފުޅުންނާއި, ރަށުގެ އާންމު ރައްޔިތުންނާ ބައްދަލުކުރައްވާފަ އެވެ. ނުރަސްމީކޮށް ބޭއްވި މި ހަރަކާތުގައި ރަށުގެ 700 އެއްހާ މީހުން ވަނީ ބައިވެރިވެފަ އެވެ.
"މީ އަމިއްލަ ރަށް, މިރަށުގައި ކޮން ޖަލްސާއެއްތޯ ބާއްވާނ،ީ" އަދަދު ނޫހާ ވާހަކަ ދައްކަވަމުން ހުޅުމާލެ ދާއިރާގެ މެންބަރު އަލީ ނިޔާޒް ވިދާޅުވި އެވެ.
ނިޔާޒް ވިދާޅުވީ ހިންނަވަރުގައި ރައީސްގެ ކެމްޕޭނު ޖަލްސާއެއް ބޭއްވުމުގެ ބޭނުމެއް ނެތް ކަމަށާއި, ބޮނޑިބަތާއެކު ރައްޔިތުންނާ ބައްދަލުކުރެއްވުމަކީ ވެސް ކެމްޕޭނު ހަރަކާތެއް ކަމަށެވެ. އަދި، މިރަށުގައި ޖަލްސާއެއް ބާއްވާ ވާހަކަތަކެއް ނުދެއްކިޔަސް, ރައްޔިތުންގެ ތާއީދު ރައީސަށް އޮތް ކަމަށް ވިދާޅުވި އެވެ.
ކެމްޕޭނު ދަތުރުފުޅެއްގައި ރައީސް ހިންނަވަރަށް ވަޑައިގެންނެވުން; ރައްޔިތުންނާ ގާތުން ކެމްޕޭނު ކުރެއްވި -- ފޮޓޯ: އެމްޑީޕީ
ނިޔާޒްގެ އިތުރުން ހިންނަންވަރު ކައުންސިލުގެ ރައީސް ހަސަން ޝާފިއު ވެސް ވިދާޅުވީ ރަށުގައި ޖަލްސާއެއް ބާއްވާ, ރައީސަށް ވޯޓު ދިނުމަށް އެދުމަށް ވުރެ ރަށު ރައްޔިތުންނާ ބައްދަލުކޮށް ގުޅުން ބަދަހިކުރުން މުހިންމު ކަމަށެވެ. އަދި، އެގޮތަށް އަމަލު ކުރެއްވުމުން ހިންނަވަރު ރައްޔިތުންނާ ރައީސް ބަހައްޓަވާ ގާތްކަން ވެސް ދެމެހެއްޓިގެންދާނެ ކަމަށް ވިދާޅުވި އެވެ.
އޭގެ އިތުރުން ހިންނަވަރު އެމްޑީޕީ އަށް ސަޕޯޓުކުރާ ޒުވާނަކު ބުނި ގޮތުގައި ރައީސް ޖަލްސާ ބާއްވަވާ ކެމްޕޭނު ކުރެއްވިނަމަ އިހުސާސް ކުރެވޭނީ އެހެން ރަށްތަކާއި ހިންނަވަރާއި އެއްވެސް ތަފާތެއް ނެތުން ކަމަށެވެ. އަދި، އެއާ ހިލާފަށް ރައްޔިތުންނާ ގާތުން ބައްދަލުކުރައްވާ ގާތްކަން ދެމެހެއްޓުމަކީ ރައްޔިތުން މާ ހިތްހަމަޖެހޭ ކަމެއްގެ ގޮތުގައި އޭނާ ވަނީ ސިފަ ކޮށްފަ އެވެ.
ރައީސް ހިންނަވަރަށް ވަޑައިގެންނެވުމުން ހޫނުމަރުހަބައެއް ލިބިވަޑައިގެންނެވި -- ފޮޓޯ: އެމްޑީޕީ
ހިންނަވަރުން ރައީސް ސޯލިހަށް ދެގޮތެއް ނުވާ ތާއީދު އޮތްއިރު, 2018 އެކޭ އެއްފަދައިން މިހާރުވެސް ރައީސް ރަށަށް ވަޑައިގެންނެވުމުން ހިންނަވަރު ރައްޔިތުންނަށް ކުރެވެނީ އެއްބަނޑު މީހަކު ރަށަށް އައުމުން ކުރެވޭ އުފާވެރި އިހުސާސެވެ.
ހިންނަވަރު ރައްޔިތުން ސިފަ ކުރި ގޮތުގައި ކުރިން ރައީސަކު ވަޑައިގެންނެވުމުން ފެންނަނީ ވަރަށް ދުރުުން ރައީސްގެ އިސްތަށިފުޅުގެ ފުއްކިބަ އެވެ. އެއާ ހިލާފަށް ރައީސް ސޯލިހު ވަޑައިގެންނެވުމުން ގާތްކަން އިހުސާސް ކުރެވޭ ކަމަށާއި, ބޭނުންވާ ކަންކަން ރައީސްއާ ފަސޭހައިން ހިއްސާ ކުރެވޭ ކަމަށް ވެސް ބުންޏެވެ.
