ތައިލޭންޑް ރަސްގެފާނުގެ ދޮށީ ދަރިކަނބަލުންނަށް ހިތުގެ މައްސަލައެއް ދިމާވެ ކުއްލި ގޮތަކަށް ވެއްޓި ވަޑައިގެންނެވިތާ ތިން ހަފުތާ ފަހުން ވެސް ހޭނަރާ ކަމަށް ޝާހީ ގަނޑުވަރުން ބުނެފި އެވެ.
ޑޮކްޓަރުން ބުނީ މައިކޮޕްލާސްމާ އިންފެކްޝަނެއްގެ ސަބަބުން ހިތަށް މައްސަލަ ދިމާވެ އެރިތުމިއާ ކުރިމަތިވި ކަމަށެވެ. އަމީރާ ބަޖްރަކިތިޔަބާ ވެއްޓި ވަޑައިގަތީ ޑިސެމްބަރު މަހުގެ ތެރޭގަ އެވެ.
އުމުރުފުޅުން 44 އަހަރުގެ އަމީރާއަކީ ރަސްގެފާނު ވަޖިރަލޮންގްކޯންގެ އެންމެ ދޮށީ ދަރިކަނބަލުންނެވެ. ޝާހީ ގަނޑުވަރުން ބުނީ އެކަމަނާގެ ހިތާއި ފުއްޕާމޭ އަދި ކިޑްނީ ހިންގުމަށް މެޑިކަލް އިކުއިޕްމަންޓް ގުޅާފައިވާ ކަމަށެވެ.
އަމީރާ ބަޖްރަކިތިޔަބާ، ރަސްގެފާނުގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވަ އެވެ. އެކަމަނާއަކީ ރަސްގެފާނުގެ ޕާސަނަލް ގާޑުގައި އިސް އޮފިސަރެކެވެ.
ތައިލޭންޑްގެ ޝާހީ އާއިލާގެ ތެރޭގައި ތައުލީމީ ގޮތުން އެންމެ ގިނަ ކާމިޔާބީތައް ހޯއްދަވާފައިވާ ބޭފުޅުންގެ ތެރޭގައި އެކަމަނާ ހިމެނިވަޑައިގަންނަވަ އެވެ. އެގޮތުން އެމެރިކާގެ ދެ ޔުނިވާސިޓީއަކުން ގްރެޖުއޭޓް ޑިގްރީ ހާސިލްކުރެއްވި އެވެ.
ތައިލޭންޑުގެ ވަލީ އަހުދުގެ ގޮތުގައި ރަސްގެފާނު އެއްވެސް ފަަރާތެއްގެ ނަން އިއުލާނު ކުރައްވާފައެއް ނުވެ އެވެ. އެހެން ނަމަވެސް ގިނަ ބަޔަކު ދެކޭ ގޮތުގައި ރަސްގެފާނަށް ފަހު ތަހުތު ލިބިވަޑައިގަންނަވާނީ އަމީރާ ބަޖްރަކިތިޔަބާ އަށެވެ.
