މެޑްރިޑް (ޖެނުއަރީ 8) - ސްޕެނިޝް ލީގުގައި މިރޭ ކުޅުނު މެޗުން ވިޔަރެއާލް އަތުން 2-1 އިން ބަލިވެ، ލީގުގެ އެއް ވަނައިގައި އޮތް ރެއާލް މެޑްރިޑުން ލީގުގެ އެއް ވަނަ އަށް އަރަން ލިބުނު ފުރުސަތު ނަގާލައިފި އެވެ.
މިރޭގެ ބައްޔާ އެކު ރެއާލް ލީގުގެ ދެ ވަނައިގައި އޮތީ އެއް ވަނައިގައި އޮތް ބާސެލޯނާ އަށް ވުރެ އެއް މެޗު އިތުރަށް ކުޅެގެންނެވެ. ބާސެލޯނާ އަށް 15 މެޗުން 38 ޕޮއިންޓް ލިބިފައިވާއިރު، ރެއާލަށް 38 ޕޮއިންޓް ލިބިފައިވަނީ 16 މެޗު ކުޅެގެންނެވެ. ލީގުގައި މާދަމާރޭ އެތުލެޓިކޯ މެޑްރިޑް އަތުން މޮޅުވެގެން، ބާސެލޯނާ އަށް އެއް ވަނައިގައި ތިން ޕޮއިންޓުގެ ލީޑެއް ލިބޭނެ އެވެ.
ވިޔަރެއާލް ދަނޑުގައި ކުޅުނު މެޗު ފަށައިގެން ހަތަރު ވަނަ މިނިޓްގައި އެ ޓީމުގެ ފްރާންސިސް ކޮކަލިން އޭރިއާތެރެއިން ތިރިިތިރިން ޖެހި ބޯޅަ ބޭރުވީ ގޯލުގެ ދަނޑީގައި ޖެހިފަ އެވެ. މެޗުގެ 22 ވަނަ މިނިޓްގައި ރެއާލްގެ އޭރިއާތެރެއިން ވިޔަރެއާލްގެ ޔެރެމީ ޕީނޯ ހުސްކޮށް ވަދެ، ޖެހި ބޯޅަ ރެއާލްގެ ކީޕަރު ތިބައު ކޯޓުއާ ވަނީ މަތަކޮށްފަ އެވެ.
ފުރަތަމަ ހާފުގައި ރެއާލަށް ގޯލެއް ޖަހައިދޭން އެންމެ ހުސް ފުރުސަތެއް ލިބުނީ ވިނީޝިއުސް ޖޫނިއާ އަށެވެ. މެޗުގެ 39 ވަނަ މިނިޓްގައި ވިޔަރެއާލްގެ އޭރިއާތެރެއިން ރެއާލްގެ ކަރިމް ބެންޒެމާ ޖައްސާލި ބޯޅައެއް ހޯދައި، ވިނީޝިއުސް ޖެހި ޝޮޓް، ވިޔަރެއާލްގެ ކީޕަރު، ޕެޕޭ ރެއިނާ ވަނީ މަތަކޮށްފަ އެވެ.
ވިޔަރެއާލުން ވަނީ ދެ ވަނަ ހާފުގެ ކުޅުން ފަށައިގެން ދެ މިނިޓް ތެރޭ ލީޑުނަގައިފަ އެވެ. މި ލަނޑު ޖެހީ މެޗުގެ 47 ވަނަ މިނިޓްގައި ޔެރެމީ ޕީނޯ އެވެ. ވިޔަރެއާލްގެ ފޯވާޑް، ޖެރާޑް މޮރޭނޯ ހުސްކޮށްލާފައި އޭރިއާތެރެއިން ދިން ބޯޅަ ޔެރެމީ ޕީނޯ ފޮނުވާލުމުން، އެ ބޯޅަ ސަލާމަތްކުރަން ދިޔަ ރެއާލްގެ ވާތު ބެކް، ފާލަންޑް މެންޑީ ގައިގައި ޖެހިފައި ވަނީ ގޯލަށެވެ.
ރެއާލުން އެއްވަރުކުރީ މެޗުގެ 60 ވަަނަ މިނިޓްގައި ބެންޒެމާ ކާމިޔާބުކުރި ޕެނަލްޓީންނެވެ. މިއީ ވިޔަރެއާލްގެ ޑިފެންޑަރު، ހުއާން ފޮއިތު އަތުގައި ބޯޅަ ޖެހުނު ކަމަށް ބަލައި، ދިން ޕެނަލްޓީ އެކެވެ. މި ޕެނަލްޓީ ދިނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. އޭގެ ތިން މިނިޓް ފަހުން، ވިޔަރެއާލަށް ލިބުނު ޕެނަލްޓީ އަކުން އެ ޓީމު އަނެއްކާ ވެސް ލީޑުނެގި އެވެ. މިއީ ރެއާލްގެ ޑޭވިޑް އަލަބާ އަތުގައި ބޯޅަ ޖެހުމުން، ދިން ޕެނަލްޓީ އަކުން ޖެރާޑް މޮރޭނޯ ޖެހި ގޯލެކެވެ.
ވިޔަރެއާލަށް މެޗުގެ އިތުރު ވަގުތުގައި ތިން ވަނަ ގޯލެއް ޖަހަން ލިބުނެވެ. އެ ގޮތުން، އިތުރު ވަގުތުގެ ގޮތުގައި ދެއްކި އަށް މިނިޓްގެ ތެރެއިން ފަހު ވަގުތު ކޮޅުގެ ތެރޭގައި ކޯނަރެއްގައި ރެއާލްގެ ކީޕަރު ކޯޓުއާ ކުރިއަށް އެރި ވަގުތެއްގައި، ހުސް ގޯލަކަށް ފޮނުވާލަން، ލިބުނު ފުރުސަތުން ވިޔަރެއާލްގެ ފޯވާޑް އާނައުޓް ޑަންޖޫމާ ޖެހި ބޯޅަ ދިޔައީ ގޯލު ކުރިމަތިން ބޭރަށެވެ.
މިއީ 2018 ވަނަ އަހަރުގެ ޖެނުއަރީ މަހުގެ ފަހުން ލީގުގައި ވިޔަރެއާލަށް ރެއާލްގެ އަތުން ހޯދުނު ފުރަތަމަ މޮޅެވެ. މި މެޗުގެ ކުރިން ލީގުގައި ރެއާލުން ވަނީ ވިޔަރެއާލާ ދެކޮޅަށް ކުޅުނު ނުވަ މެޗުގައި ވެސް ބަލިނުވެ ނިންމާލައިފަ އެވެ. އެކަމަކު، ވިޔަރެއާލުން މި ވަނީ ދާދި ފަހުން އެ ޓީމާ ހަވާލުވި ކޯޗު ކިކޭ ސެޓިއެންގެ އިރުޝާދުގެ ދަށުން މުހިންމު މޮޅެއް ހޯދައިފަ އެވެ.
ރެއާލްގެ ކޯޗު ކާލޯ އަންޗެލޮޓީ ބުނީ ކުޅުމަށް ބަލާއިރު، ވިޔަރެއާލުން ރެއާލަށް ވުރެ މޮޅަށް ކުޅުނު ކަމަށާއި އެ ޓީމުން ހޯދީ ވެސް ހައްގު މޮޅެއް ކަމަށެވެ.
