މެންޗެސްޓާ (ޖެނުއަރީ 7) - އިނގިރޭސި އެފްއޭ ކަޕްގެ ތިން ވަނަ ބުރުގައި ރޭ ކުޅުނު މެޗުން އެވަޓަން އަތުން 3-1 އިން މޮޅުވެ، މެންޗެސްޓާ ޔުނައިޓެޑް މުބާރާތުގެ އަނެއް ބުރުން ފުރުސަތު ހޯދައިފި އެވެ.
އޯލްޓް ޓްރެފޯޑް ސްޓޭޑިއަމްގައި ކުޅުނު މެޗު ފަށައިގެން ހަތަރު ވަނަ މިނިޓްގައި އެ ޓީމުން ލީޑުނެގި އެެވެ. މި ލަނޑު ޖެހީ މާކަސް ރެޝްފޯޑް އޭރިއާތެރެއިން ތިރިތިރިން ނަގައިދިން ބޯޅައަކުން އެންޓޮނީ އެވެ. އޭގެ އިރުކޮޅެއް ފަހުން، އެވަޓަންގެ ވިންގް، ޑެމަރާއި ގްރޭ ޖެހި ބޯޅައެއް އަމާޒުވީ ގޯލުގެ ދަނޑިއަށެވެ.
ޔުނައިޓެޑަށް ލީޑު ހިފަހައްޓައިލެވުނީ 10 މިނިޓް އެވެ. މެޗުގެ 14 ވަނަ މިނިޓްގައި އެވަޓަން އިން ވަނީ ނަތީޖާ ހަަމަހަމަކޮށްފަ އެވެ. ޔުނައިޓެޑްގެ ގޯލްކީޕަރު، ޑޭވިޑް ޑެހެއާ ހެދި ބޮޑު ގޯހެއްގެ ފައިދާނަގައި، މި ލަނޑު ޖެހީ އެވަޓަންގެ ޑިފެންޑަރު، ކޮނާ ކޯޑީ އެވެ. އޭރިއާތެރެއިން އެވަޓަންގެ ފޯވާޑް، ނީލް މޯޕޭ ޖެހި ބޯޅައެއް ކީޕަރު ޑެހެއާ ފައިގައި ޖެހިފައި ގޯލު ކުރިމައްޗަށް އައި ވަގުތު ކޯޑީ ވަނީ ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިފަ އެވެ.
ފުރަތަމަ ހާފުގައި ދެ ޓީމުން ވެސް އިތުރު ގޯލެއް ޖަހަން ކުރި މަސައްކަތް ކާމިޔާބެއްނުވި އެވެ. އެވަޓަންގެ ކީޕަރު، ޖޯޑަން ޕިކްފޯޑް ވަނީ ޔުނައިޓެޑުން އޭރިއާބޭރުން ފޮނުވާލި ބޯޅަތައް ހުއްޓުވައިފަ އެވެ.
ޔުނައިޓެޑުން އަލުން ލީޑުނެގީ ދެ ވަނަ ހާފުގެ ކުޅުން ފެށިތާ ހަ މިނިޓް ތެރޭގަ އެވެ. މިއީ އެވަޓަންގެ ޑިފެންޑަރު، ކޯޑީ އަތުން ބައިކޮޅަށް ވަން ގޯލެކެވެ. ރަޝްފޯޑް އަރިމަތިން ނެގި ބާރު ބޯޅައެއް ސަލާމަތްކުރަން ކޯޑީ ފައިން ޖައްސާލި ބޯޅަ ވަނީ ބައިކޮޅަށެވެ.
ބަދަލަކަށް ކުޅެން އެރި، އެވަޓަންގެ ޑޮމިނިކް ކަލްވެޓް-ލެވިން ވަނީ އެ ޓީމަށް ގޯލެއް ޖަހައިދީ އެއްވަރުކޮށްދީފަ އެވެ. އެކަމަކު، އެ އެޓޭކް ފެށިއިރު، އެވަޓަންގެ ގްރޭ އޮފްސައިޑް ކަމަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމުމުން، މެޗުގެ ރެފްރީ ވެސް ވަނީ އެ ގޯލު ބަލައިނުގަންނަން ނިންމައިފަ އެވެ.
ޔުނައިޓެޑުން ތިން ވަނަ ގޯލު ޖެހީ މެޗުގެ އިތުރު ވަގުތުގައި ލިބުނު ޕެނަލްޓީ އަކުންނެވެ. ރަޝްފޯޑް ގޯލަށް ވައްދާލި މި ޕެނަލްޓީ ލިބުނީ، އެވަޓަންގެ އޭރިއާތެރެއިން އެ ޓީމުގެ ޑިފެންޑަރު، ބެން ގޮޑްފްރޭ، ޔުނައިޓެޑްގެ ޒުވާން ވިންގް، އަލެހަންދްރޯ ގާނާޗޯ އަށް ފައުލުކުރުމުންނެވެ.
ރޭގެ މެޗުގައި މޮޅު ކުޅުމެއް ދެއްކި ރަޝްފޯޑް މި ވަނީ ޔުނައިޓެޑުން އެންމެ ފަހުން އަމިއްލަ ދަނޑުގައި ކުޅުނު ހަތް މެޗުގައި ވެސް ގޯލު ޖަހައިފަ އެވެ. މިއީ 2012 ވަނަ އަހަރު، އަމިއްލަ ދަނޑުގައި ކުރީގެ ފޯވާޑް، ވޭން ރޫނީ ހަތް މެޗުގައި ލަނޑު ޖެހި ފަހުން، އެ ފަދަ ފޯމެއްގައި ކުޅުންތެރިއަކު ރެކޯޑެއް ދަމަހައްޓާ ފުރަތަމަ ފަހަރެވެ.
އެވަޓަން އަތުން މޮޅުވެ، ޔުނައިޓެޑް ވަނީ ހުރިހާ މުބާރާތެއްގައި ޖެހިޖެހިގެން ހަތް މެޗުން މޮޅުވެފަ އެވެ. ވޯލްޑް ކަޕްގެ ބްރޭކަށް ފަހު ޔުނައިޓެޑުން ރަނގަޅު ފޯމެއްގައި ކުޅެމުން އަންނައިރު، އެ ޓީމުގެ ކޯޗު އެރިކް ޓެން ހާގް ބުނީ އަދިވެސް ރަނގަޅު ކުރަން ޖެހޭ ގިނަ ކަންތައްތަކެއް އެބަހުރި ކަމަށެވެ.
