އަފްގާނިސްތާނުގެ އުތުރުން ތެޔޮ ނަގަން ޗައިނާގެ ކުންފުންޏަކާ އެކު އެއްބަސްވުމެއްގައި ސޮއިކުރުމަށް ތާލިބާން ސަރުކާރުން ނިންމައިފި އެވެ.
އެއީ 2021 ވަނަ އަހަރު ތާލިބާނުން ވެރިކަމަށް އައުމަށް ފަހު ބޭރުގެ ކުންފުންޏަކާ އެކު ސޮއިކުރާ ހަކަތައާ ބެހޭ އެންމެ ބޮޑު އެއްބަސްވުމެވެ.
އެއްބަސްވުމުގެ މުއްދަތަކީ 25 އަހަރެވެ. އެއްބަސްވުމުން ދައްކުވައިދެނީ އަފްގާނިސްތާނުގެ އިގްތިސާދީ ކަންކަމުގައި ޗައިނާއިން ބައިވެރިވާން ބޭނުންވާ މިންވަރެވެ.
މިދިޔަ ބުރާސްފަތި ދުވަހު ތާލިބާން އޮފިޝަލުން ބުނީ ޗައިނާގެ ވިޔަފާރިވެރިން އާއްމުކޮށް ތިބޭ ހޮޓަލަކަށް ހަމަލާދިން އިސްލާމިކް ސްޓޭޓް (އައިއެސް) ޓެރަރިސްޓުންނާ ދެކޮޅު އޮޕަރޭޝަނެއް ހިންގާފައިވާ ކަމަށެވެ.
އެ އޮޕަރޭޝަނުގައި އައިއެސްގެ އަށް ޓެރަރިސްޓުން މަރާލައި ގިނަ ބަޔަކު ހައްޔަރުކުރި އެވެ.
ޑިސެމްބަރު މަހު ކާބުލްގައި ހުންނަ ލޮންގަން ހޮޓަލަށް ދިން ހަމަލާގައި ތިން މީހުން މަރުވެ 18 މީހުންނަށް އަނިޔާވި އެވެ. އޭގެ ތެރޭގައި ޗައިނާގެ ފަސް މީހުން ހިމެނެ އެވެ.
ތެޔޮ ނެގުމާ ގުޅޭ އެއްބަސްވުން ގާއިމްކުރަނީ ޝިންޖިއާންގް ސެންޓްރަލް އޭޝިއާ ޕެޓްރޯލިއަމް އެންޑް ގޭސް ކޮމްޕެނީއާ އެކު އެވެ. އެއްބަސްވުމުގެ ދަށުން ތެޔޮ ނަގަން ހަމަޖެހިފައި ވަނީ އަމޫ ދަރްޔާ ހިސާބުންނެވެ.
"އަމޫ ދަރްޔާ ތެލާ ގުޅޭ އެއްބަސްވުމަކީ ޗައިނާ އާއި އަފްގާނިސްތާނާ ދެމެދު ކުރިއަށް ގެންދަން ހަމަޖެހިފައިވާ މުހިއްމު މަޝްރޫއެއް،" ތާލިބާނުންގެ ތަރުޖަމާނު ޒަބީހުﷲ މުޖާހިދު ބުންޏެވެ.
އަފްގާނިސްތާނުގެ އުތުރުގައި ކޮޕާ މައިން ކުރުމުގެ މަޝްރޫއެއް ފެށުމާ ގުޅޭ ގޮތުން ވެސް ތާލިބާނުން ދަނީ ޗައިނާގެ ދައުލަތުގެ ކުންފުންޏަކާ އެކު މަޝްވަރާ ކުރަމުންނެވެ.
އަފްގާނިސްތާނަކީ ގުދުރަތީ ގޮތުން މުއްސަނދި ގައުމެކެވެ. އެ ގައުމުގައިވާ ގުދުރަތީ ގޭސް، ކޮޕާ އަދި އެހެނިހެން މައުދަނުގެ އަގު އެއް ޓްރިލިއަން ޑޮލަރަށް ވުރެ މަތިވާނެ ކަމަށް ބެލެވެ އެވެ.
އެހެން ނަމަވެސް ދާހިލީ ހަމަނުޖެހުމާއި ހަނގުރާމައިގެ ސަބަބުން ގުދުރަތީ ވަސީލަތްތަކުގެ ބޭނުމެއް ނުހިފެ އެވެ.
