މުމްބާއީ، އިންޑިއާ (ޖެނުއަރީ 6) - އިންޑިއާ ގައުމީ ކްރިކެޓް ޓީމުގެ ވިކެޓްކީޕަރު ރިޝަބް ޕާންޓް އަށް ކާރު އެކްސިޑެންޓެއްގައި ލިބުނު އަނިޔާއެއްގެ ސަބަބުން ދިގު މުއްދަތަކަށް ކުޅުމާ ދުރަށް ދާން ޖެހޭނެކަން ކަށަވަރުވެއްޖެ އެވެ.
މީގެ ހަފްތާއެއްހާ ދުވަސްކުރިން، ޕާންޓް، 25، އުފަން ސަރަހައްދު، ރޫރްކީން، ކާރުގައި ދުއްވާފައި އައިއިރު، މަގުގެ ޑިވައިޑަރެއްގައި ޖެހި ކާރު އެކްސިޑެންޓްވިއިރު، ވަގުތުން ކާރުގައި އަލިފާން ހިފި އެވެ. މި ހާދިސާ ތަހުގީގު ކުރަމުން އަންނަ ފުލުހުން ބުނީ، އެކްސިޑެންޓްވުމާ އެކު ކާރުގައި އަލިފާން ހިފާފައިވާ ކަމަށާއި ސަލާމަތްވުމަށް، ޕާންޓް ވަނީ ވިންޑްސްކްރީން ތަޅާލުމަށް ފަހު ބޭރަށް ނުކުމެފައި ކަމަށެވެ.
އެކްސިޑެންޓްވާން ދިމާވި ސަަބަބެއް ކަމަށް މިހާތަނަށް ހޯދުނު ހޯދުންތަކުން އެނގިފައިވަނީ މަގުގައި ހުރި އަޑިގަނޑަކުން ސަލާމަތްވާން ކާރު އަނބުރާލި ވަގުތު ހިނގި ކަމެއް ކަމަށެވެ.
ޕާންޓް އަށް ފަރުވާ ދޭން އެންމެ ފުރަތަމަ ގެންދިޔައީ، އެކްސިޑެންޓް ހިނގި ސަރަހައްދު ކައިރީގައި ރޫރްކީންގެ ހޮސްޕިޓަލަކަށެވެ. އެކަމަކު، އިންޑިއާގެ ކްރިކެޓްގެ ބެލެނިވެރި ފަރާތް، ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި) އިން ނިންމީ އިންޑިއާގެ ދެހެރާދުން ސަރަހައްދުގެ މަތީ ފެންވަރުގެ ހޮސްޕިޓަލަކަށް ޕާންޓް ބަދަލުކުރުމަށެވެ.
އެކްސިޑެންޓްގައި މިހާތަނަށް ހެދި ޓެސްޓްތަކުން އެނގިފައިވަނީ ޕާންޓްގެ ބޮލާއި ބުރަކަށީގެ އިތުރުން ފަޔަށް ވަނީ އެކި ވަރުގެ އަނިޔާތަކެއް ވެފައިވާ ކަމަށެވެ. އެ ގޮތުން ޕާންޓްގެ ކަކުލުގެ ލިގަމެންޓަށް ލިބިފައިވާ އަނިޔާއިން ރަނގަޅުވާން ބޮޑު އޮޕަރޭޝަނެއް ކުރަން ޖެހޭއިރު، އޭނާ އަށް މި ފަހަރުގެ އިންޑިއަން ޕްރިމިއާ ލީގު (އައިޕީއެލް) އާއި އިންޑިއާ ގައުމީ ޓީމުގެ މުހިންމު މެޗުތަކެއް ގެއްލޭނެ އެވެ.
ދިއްލީގެ ޑިސްޓްރިކްޓް ކްރިކެޓް އެސޯސިއޭޝަންގެ ޑިރެކްޓަރު، ޝިޔާމް ޝަރްމާ އަކީ ބީސީސީއައިގެ ފަރާތުން ޕާންޓްގެ ފަރުވާގެ ކަންކަން ދާ ގޮތް ބަލަން ހަވާލުވެ ހުރި ފަރާތެވެ. މިހާތަނަށް ލިބިފައިވާ މެޑިކަލް ރިޕޯޓްތަކުގައިވާ ގޮތުން، ޕާންޓްގެ ކަކުލާއި ބުރަކަށީގެ އޮޕަރޭޝަންތަކަށް ފަހު، 6-9 މަހާ ދެމެދުގެ މުއްދަތަކަށް އޭނާ ކުޅުމާ ދުރަށް ދާން ޖެހޭނެ އެވެ.
އިންޑިއާގެ ބައެއް ކުޅިވަރު މީޑިއާތަކުން ރިޕޯޓްކުރާ ގޮތުގައި އެއްކޮށް ފިޓްވެގެން ޕާންޓް އެނބުރި ދަނޑަށް ނުކުންނަން އަހަރެއްހާ ދުވަސް ނަގާނެ އެވެ.
