ރ. އަލިފުށީގައި ކެންސަރުބަލި އިތުރުވެފައިވާތީ އެކަމުގެ ސަބަބުތައް ދެނެގަތުމަށް ދިރާސާއެއް ހެދުމަށް ބޭނުންވާކަމަށް އެރަށުގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީން ބުނެފި އެވެ.
ރައީސް އިބްރާހިމް މުހައްމަދު ސޯލިހް ރ. އަލިފުއްޓަށް ކުރައްވާ ދަތުރުފުޅުގައި އެރަށު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާ ބައްދަލުކުރެއްވުމުން އެ ކޮމިޓީން ވަނީ އެރަށު ބޯޓުޔާޑު ސަރަހައްދުގައި އުފެދޭ ފައިބަރު ކުނި ނައްތާލެވޭނެ ނިޒާމެއް ގާއިމުކުރުމަށާއި އެރަށުގައި ކެންސަރުބަލި އިތުރުވެފައިވާތީ އެކަމުގެ ސަބަބުތައް ދެނެގަތުމަށް ދިރާސާއެއް ހެދުމަށް ބޭނުންވާކަން ފާހަގަކޮށްފައިވެ އެވެ.
އެރަށު ކައުންސިލުން ވަނީ މި ސަރުކާރުން އަލިފުށީގެ ތަރައްގީއަށް ކޮށްދީފައިވާ ކަންކަމާއި މިހާރު ކުރަމުންދާ ކަންކަން ފާހަގަކޮށް ރައީސަށް ޝުކުރު އަދާކޮށްފަ އެވެ. އެގޮތުން، ފާއިތުވި ވިއްސަކަށް އަހަރު ތެރޭގައި އަލިފުއްޓަށް ނާންނަހައި ބޮޑު ތަރައްގީއެއް މި ދައުރުގައި އައިސްފައިވާކަން ކައުންސިލުން ފާހަގަ ކުރެ އެވެ.
މިހާރު އަލިފުށީގައި ކުރިއަށްދާ އުމަރާނީ ތަރައްގީގެ މަޝްރޫއުތަކުގެ ތެރޭގައި އެއާޕޯޓުގެ މަސައްކަތާއި ފެނާއި ނަރުދަމާގެ މަސައްކަތް ހިމެނެ އެވެ. ރައީސް ސޯލިހު ވަނީ އަލިފުށީގައި މިހާރު ކުރިއަށްދާ މަޝްރޫއުތައް ކުރިއަށް ގޮސްފައިވާ ހިސާބާއި ކުރިއަށް ރާވަފައިވާ މަޝްރޫއުތަކުގެ މައުލޫމާތު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް ހިއްސާކޮށްފަ އެވެ.
އަލިފުށީގައި ސަރުކާރުން އިމާރާތްކުރަމުންދާ އާ ހޮސްޕިޓަލުގެ މަސައްކަތް އަވަސް ކުރުމަށް ބޭނުންވާކަން ކައުންސިލުން ފާހަގަކުރުމުން ރައީސް ވަނީ އާ ހޮސްޕިޓަލަށް ފަންޑު ހަމަޖެހިފައިވާކަން ފާހަގަކުރައްވާފަ އެވެ.
އަލިފުށީ ކައުންސިލުން ވަނީ އެރަށަށް ބޭނުންވާ އިތުރު ކަންކަން ވެސް ފާހަގަކޮށްފަ އެވެ. އޭގެ ތެރޭގައި އަލިފުށީގެ އިރުމަތި ފަރާތު ބަނދަރު މަރާމާތު ކުރުމާއި ސިނާއީ ސަރަހައްދަށް ބިން އިތުރު ކުރުމާއި އިޖުތިމާއީ މަރުކަޒެއް އެޅުން ހިމެނެ އެވެ. ރައީސް ވަނީ ސަރުކާރުގެ ކަމާބެހޭ އިދާރާތަކާ މަޝްވަރާކުރައްވާ އެކަންކަން ކުރިއަށް ގެންދެވުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ.
