ވިއެޓްނާމްގައި އިމާރާތް ކުރަމުން ދިޔަ ސައިޓެއްގައި ފުން، ހަނި ގޮޅިއަކަށް ވެއްޓުނު 10 އަހަރުގެ ފިރިހެން ކުއްޖާ މަރުވެއްޖެ އެވެ.
ރިޕޯޓުތައް ބުނާ ގޮތުން ލީ ހާއޯ ނާމް ގޮޅީގެ ތެރެއަށް ވެއްޓުނީ ބާ ދަގަނޑު ހޯދަން އުޅެނިކޮށް ޑިސެމްބަރު 31 ވަނަ ދުވަހުގެ ރޭ ދެކުނު ޑޮންގް ތަޕް ޕްރޮވިންސްގަ އެވެ.
އެ ދުވަހުން ފެށިގެން އެ ކުއްޖާ ސަލާމަތް ކުރުމުގެ އޮޕަރޭޝަަން ކުރިއަށް ދިޔަ އިރު، 35 މީޓަރުގެ ފުން ގޮޅި ތެރެއަށް އޮކްސިޖަން ވެސް ޕަމްޕް ކުރި އެވެ.
މީގެ ހަތަރު ދުވަސް ކުރިން އެ ކުއްޖާ ރޯ އަޑު އިވުނު ނަމަވެސް، ހޯމަ ދުވަހު ކެމެރާއެއް ތިރިކުރި އިރު އެ ކުއްޖާގެ އެއްވެސް ހިލަމެއް ނުވެ އެވެ.
އެ ކުއްޖާ ވެއްޓުނު ގޮޅިއަކީ ވަށަމިނުގައި 25 ސެންޓިމީޓަރު ހުރި ވަޅެކެވެ. އެހެންވެ، އެހާ ހިމަ ގޮޅިއަކަށް ކުއްޖަކު ވެއްޓުނު ގޮތާ މެދު ވަނީ ސުވާލު އުފެދިފަ އެވެ.
ކެރޭނާއި އެކްސްކެވޭޓަރު ފަދަ އުޅަނދުގެ އެހީގައި ދަގަނޑު ހޮޅި އުފުއްލާލެވޭތޯ ކުރި މަސައްކަތް މިހާތަނަށް ކާމިޔާބެއް ނުވެ އެވެ.
ރެސްކިއު ޓީމުން މިހާރު މަސައްކަތް ކުރަނީ ޖަނާޒާއަށް ކުއްޖާގެ ހަށިގަނޑު އެ ތަނުން ނެގުމަށެވެ. އޮފިޝަލުން ބުނީ ކުއްޖާ މަރުވީ އެކަށީގެންވާ ވަރަށް އޮކްސިޖަން ނުލިބެގެން ކަމަށެވެ.
